DUVI. Diario da Universidade de Vigo
Cabeceira
Mércores, 28 de setembro do 2016

O catedrático da Universidade de Vigo será o primeiro español en ocupar este cargo

Humberto Michinel é elixido presidente da European Optical Society

O seu nomeamento supón, afirma, un recoñecemento á investigación estatal que se realiza neste eido


ImageHumberto Michinel, catedrático de Óptica da Universidade de Vigo, vén de ser elixido este martes presidente da European Optical Society (EOS). O docente do campus de Ourense será o primeiro español en ocupar este cargo na entidade que agrupa ás sociedades estatais de óptica da Unión Europea e que ten como obxectivo contribuír ao progreso nesta área de coñecemento e promover o seu desenvolvemento tanto no contexto comunitario coma no internacional. O seu nomeamento supón, afirma, un recoñecemento ao nivel de calidade acadado pola investigación que en España se realiza neste eido. “É unha honra ter sido elixido por unanimidade para o posto. Este nomeamento supón un espaldarazo a toda a comunidade óptica española”, comenta o docente. A elección, engade, ten un valor especial porque “non deixamos de traballar desde un campus pequeno como é o de Ourense”.

Duvi. Diario da Universidade de Vigo. | Contacta con nós