DUVI. Diario da Universidade de Vigo
Inicio arrow Investigación arrow Campus Pontevedra

Campus Pontevedra

Mércores, 11 de xaneiro do 2017

Un estudo analizou 75 partidos das ligas europeas para cuantificar os efectos de competir cun xogador menos

Tras unha expulsión, o equipo con 11 futbolistas incrementa nun 14% a posesión de balón e o número de pases

O profesor de CC da Educación e do Deporte Carlos Lago é un dos autores deste traballo


ImageFronte á clásica sentencia de Helenio Herrera de que “ao fútbol xógase mellor con dez que con once”, unha expulsión ten uns claros efectos negativos para o equipo que a padece. Concretamente, ve reducido o seu dominio do balón e as súas accións ofensivas ao tempo que o seu rival incrementa nun 14% o tempo de posesión e en idéntica porcentaxe o número de pases curtos que realiza. Efectos que vén de cuantificar un grupo de investigadores, entre os que figura o profesor da Facultade de Ciencias da Educación e do Deporte Carlos Lago, despois de analizar 75 partidos das principais ligas europeas nos que se tivese producido unha expulsión, co propósito de poñer cifras aos efectos que ten un cartón vermello neste deporte. O traballo está recollido pola revista International Journal of Performance and Analysis in Sport, xunto co investigador da Politécnica de Madrid Miguel Gómez Rúano; Jaime Sampaio, da UTAD, e Adam Owen, do Centre for Football Research de Xenebra.
Martes, 20 de decembro do 2016

Desenvolven un programa de adestramento de forza na Facultade de Ciencias da Educación e do Deporte

O Club Ciclista Rías Baixas comeza a rodar no campus

Este traballo permitirá aos investigadores medir os efectos deste tipo de preparación neste deporte


ImagePor terceiro ano consecutivo, os traballos de preparación para unha nova tempada deportiva achegan á Facultade de Ciencias da Educación e do Deporte aos deportistas do Club Ciclista Rías Baixas, que baixo a supervisión do profesor Óscar García e do titulado José Abalo inician nestas semanas un programa de adestramento de forza e flexibilidade dirixido a mellorar as súas prestacións sobre a bicicleta dentro duns meses. “O ano pasado fixemos un seguimento dos ciclistas ao longo da tempada e comprobamos que o adestramento de forza é un estímulo moi útil para o ciclista, moito máis mesmo do que pensabamos”, salienta García.
Venres, 16 de decembro do 2016

A Deputación recoñeceu os traballos de fin de grao e máster de seis egresadas cos Premios Sofía Novoa

Seis exemplos de como a perspectiva de xénero aflora nas aulas

O xurado nomeou gañadores os proxectos de Laura Serén, Cristina Gandón, Lucía Pereyra e Isabela Andrés


ImageAs mensaxes que trasladan os libros de texto, o uso de asembleas como recurso educativo para fomentar a igualdade ou o impacto psicosocial na muller mastectomizada son algúns dos ámbitos nos que se centran os traballos de fin de grao e máster defendidos na Universidade de Vigo que a Deputación de Pontevedra vén de recoñecer cos Premios Sofía Novoa Ortiz á inclusión da perspectiva de xénero nestes traballos académicos. Laura Serén e Cristina Gandón, na categoría de grao, e Lucía Pereyra e Isabela Andrés, na de máster, foron as catro gañadoras da primeira edición deste certame, no que se outorgaron accésits a Carla Novo e Andrea Álvarez.
Mércores, 23 de novembro do 2016

Fundación CEER e IEEM organizan os días 28 e 29 un foro sobre xeopolítica na Casa das Campás

Expertos en seguridade analizarán no campus o papel de España e Portugal nun mundo global

Na súa terceira edición, abordará cuestións como a gobernanza global, o Brexit ou a crise dos refuxiados


ImageAfondar nas relacións entre España e Portugal desde a perspectiva da seguridade é o propósito co que o Instituto Español de Estudos Estratéxicos, xunto coa Fundación Centro de Estudos Eurorrexionais Galicia Norte de Portugal impulsaron en 2014 un foro sobre xeopolítica ibérica que, tras centrarse en primeiro termo na dimensión peninsular e, posteriormente, no contexto europeo, abordará na súa terceira edición o papel destes dous países nun mundo global. Farao os días 28 e 29 na Casa das Campás, nun curso organizado coa colaboración da Vicerreitoría que reunirá a investigadores de universidades españolas e lusas, xunto con expertos do IEEE.
Mércores, 16 de novembro do 2016

Investigadores de Belas Artes promoven en Pontevedra e Santiago un congreso sobre performance

Teoría e práctica da acción

Mesas de redondas e relatorios combinaranse no seu programa cunha serie de intervencións artísticas


ImageConsolidar unha reflexión teórica sobre a arte de acción, un proceso artístico efémero marcado polo momento presente, o contexto e a coincidencia física de artista e espectador, que “sen dúbida alimentou moitas das prácticas da arte contemporánea”, pero que, pola contra, foi escasamente analizado desde o punto de vista académico. Con este propósito nace, segundo explica o profesor de Belas Artes Carlos Tejo, o primeiro Congreso de Arte de Acción Fugas e Interferencias, que se desenvolverá entre o 1 e o 3 de decembro en Pontevedra e Santiago e combinará o estudo desta disciplina en mesas redondas e relatorios, cun ciclo de performances.
Xoves, 06 de outubro do 2016

José María Cancela e Irimia Mollinedo analizan os seus beneficios con membros da asociación Apropark

Investigadores do campus pontevedrés deseñan un programa de pilates para persoas con Párkinson

Despois de tres meses, os participantes no estudo experimentaron melloras no seu control corporal


ImageMelloras no seu equilibrio, nos seus niveis de forza e no seu control corporal. Isto foi o que experimentaron as persoas enfermas de Párkinson que participaron no estudo desenvolvido polos investigadores da Facultade de Ciencias da Educación e do Deporte José María Cancela e Irimia Mollinedo, que traballan na validación dun protocolo de exercicio físico baseado no método pilates dirixido especificamente a persoas afectadas por esta enfermidade neurodexenerativa. Un protocolo que, coa colaboración da asociación Apropark, puxeron xa en práctica cun grupo de afectados e afectadas por esta patoloxía, co propósito de analizar se a práctica dunha serie de “exercicios intensos”, contribuía a unha mellora “da súa capacidade pulmonar e aeróbica e do seu nivel de forza muscular.
<< Inicio < Ant. 1 2 3 4 5 6 7 8 9 Seg. > Remate >>
Resultados 1 - 6 de 51

Duvi. Diario da Universidade de Vigo. | Contacta con nós