Cincocentos deportistas danse cita en Vigo no Campionato Galego de Deportes Colectivos

D. Besadío |Vigo
Arredor de cincocentos deportistas procedentes de toda Galicia danse cita este mércores e xoves no campus de Vigo con motivo do XI Campionato Galego Universitario de Deportes Colectivos, no que participan estudantes das tres universidades galegas e que, este curso, está organizado polo Servizo de Deportes da Universidade de Vigo.
En total compiten 14 modalidades, xa que na maior parte hai versión masculina e feminina: baloncesto, balonmán, fútbol 7, fútbol 11, fútbol sala, rugby 7, rugby 15 e voleibol. O xoves é a quenda de balonmán, masculino e feminino, rugby 7 e fútbol 7, os dous últimos equipos femininos. O resto de modalidades disputaranse o xoves.
“Participan tres equipos por categoría e modalidade, son os campións das ligas universitarias de cada unha das tres universidades galegas, agás no caso de rugby, que non ten representación de Santiago, e balonmán e baloncesto feminino, que non teñen participación da Universidade de Coruña”, explicaba Eduardo Rodríguez, técnico do Servizo de Deportes e coordinador do campionato.

Por primeira vez o campionato dura dous días

A principal novidade deste curso é que o torneo se leva a cabo durante dous días, mentres que no resto de edicións se tiñan concentrado todas as modalidades na mesma xornada. Segundo o coordinador, “deste xeito non temos que desprazarnos das instalacións deportivas da Universidade, evitando así traslados en autobús. Todas as competicións se van a levar a cabo no campus, agás o venres fútbol sala, que será no pavillón do Círculo Mercantil”.
A vicerreitora de Extensión Cultural e Estudantes, Mª del Carmen Cabeza, e o director da área de Estudantes e Deportes, Miguel Ángel Nombela, serán os encargados de facer a entrega de trofeos aos vencedores de cada unha das modalidades. Estarán acompañados por responsables do Servizo de Deportes das universidades de Coruña e Santiago de Compostela. A entrega farase no Pavillón Universitario, o xoves ás 17.15 horas e o venres ás 18.30 horas.