DUVI. Diario da Universidade de Vigo
Inicio arrow Campus de Ourense
Xoves, 16 de marzo do 2017

Segundo o I Informe de Conxuntura Socioeconómica do Ano 2017 presentado este xoves

Galicia mantén un crecemento do 3,1% pero perde competitividade

O documento tamén destaca os datos da economía relacionada co mar


ImageEste xoves, o Foro Económico de Galicia, liderado polo Grupo Gen (Governance and Economics Research Network) da Universidade de Vigo, presentou o I Informe de Conxuntura Socioeconómica do Ano 2017. Nel, os expertos salientan como “o relativo dinamismo que acompaña desde 2016 o crecemento da economía galega non dá para recuperar unha competitividade lastrada por factores de eficiencia, ao tempo que o mercado laboral segue amosando preocupantes datos de temporalidade e incremento do paro de longa duración”.
Mércores, 15 de marzo do 2017

Este mércores asinouse o convenio para a posta en marcha deste órgano

Créase na Facultade de Dereito o Observatorio de Estudos sobre Corrupción Pública

Estará financiado pola Fundación Alfonso Martín Escudero e dirixido por Roberto Bustillo


Image“Crear, impulsar e difundir coñecemento sobre aspectos xurídicos e metaxurídicos relacionados co fenómeno da corrupción do poder público”. Con este obxectivo presentouse este mércores no campus de Ourense o novo Observatorio de Estudos sobre Corrupción Pública. Xestionado desde a Facultade de Dereito polo Grupo de Investigación Medea Iuris deste centro, o laboratorio nace grazas á alianza da Universidade de Vigo coa Fundación Alfonso Martín Escudero, que financiará o funcionamento deste instrumento. O profesor Roberto Bustillo será o seu director.
Mércores, 15 de marzo do 2017

O 20 de marzo proxectarase o documental coa presenza de Pedro Pablo Alonso e Santiago Formoso

'Alén do Cosmos' e os seus protagonistas farán parada no campus

O audiovisual conta a historia dun emigrante galego que rematou xogando no equipo de fútbol de Nova York


ImageAlén do Cosmos “é un documental sobre o periplo vital de Santiago Formoso, un galego que a finais dos 60 emigrou a Nova York, onde empezou a estudar grazas a unha bolsa deportiva universitaria e acabou gañando a vida como futbolista no lexendario New York Cosmos, xunto a estrelas como Pelé, Beckenbauer, Carlos Alberto ou Johan Cruyff”. Con estas palabras preséntase o documental sobre “un galego-americano máis dos moitos que viven en Queens ou Newark” pero que ten detrás de si “unha interesante experiencia que contar sobre o deporte, o negocio e a vida concibida como espectáculo”. O audiovisual e o seus protagonistas farán parada o 20 de marzo no campus.
Martes, 14 de marzo do 2017

Nunha conferencia ofrecida polos emprendedores Daniel Diéguez e Pablo Piñeiro

Ciencias Empresariais e Turismo introduce ao seu alumnado nas vantaxes da cooperación

Os relatores destacaron a importancia de colaborar pensando en solucionar problemas aos demais


ImageÁ hora de falar de cooperación, recoñecen Daniel Diéguez e Pablo Piñeiro, emprendedores e socios cooperativistas, son moitas as persoas ás que lles xorden moitas dúbidas sobre a súa conveniencia ou non. Para explicar ao alumnado da Facultade de Ciencias Empresariais e Turismo do campus de Ourense como cooperar si lles pode axudar a sacar adiante proxectos propios, Diéguez e Piñeiro ofreceron este martes unha conferencia neste centro. “O noso obxectivo con este tipo de accións é facer pensar ás persoas sobre o que realmente precisan para sacar adiante un proxecto entre varios”, destacou Daniel Diéguez.
Martes, 14 de marzo do 2017

Os Martes Saudables deste cuadrimestre arrancaron co reto de fomentar a doazón de sangue e órganos

Dez minutos de solidariedade que contribúen á saúde dos demais

Os postos da iniciativa complétanse nesta edición coa presenza dunha unidade móbil de Ados


ImageNa primeira campaña de doazón de sangue nos campus galegos deste curso académico o número de doazóns na Universidade de Vigo ascendeu a 747. Ante esta cifra e a das demais universidades, a Axencia de Doazón de Órganos e Sangue de Galicia (Ados) lanzou recentemente a segunda fase da campaña nos campus facendo unha chamada á participación ante o descenso paulatino de doazóns dos últimos anos. Co obxectivo de contribuír a incrementar estas cifras, os postos informativos dos Martes Saudables arrancaron hoxe no Edificio Xurídico-Empresarial a súa programación deste cuadrimestre dedicando especial atención a este tema.
Luns, 13 de marzo do 2017

Alex Ferradás achegouse este luns ao campus a ofrecer a I Xornada Super-Acción

Unha lección en primeira persoa do que supón a diversidade funcional

A iniciativa do Gabinete Psicopedagóxico ten como obxectivo fomentar a integración deste colectivo


ImageCada día son máis as persoas con algún tipo de diversidade funcional que estudan no campus de Ourense. Co obxectivo de que os diferentes membros da comunidade universitaria poidan relacionarse con este colectivo en equidade, o Gabinete Psicopedagóxico do campus puxo en marcha este luns unha serie de actividades que terán como obxectivo visibilizar as necesidades destas persoas e contribuír á súa integración fóra e dentro das aulas. A primeira das sesións correu a cargo de Álex Ferradás, persoa dependente dunha cadeira de rodas dende o ano 2006 e un dos fundadores do proxecto Working Wheels.
Resultados 19 - 24 de 3570

Duvi. Diario da Universidade de Vigo. | Contacta con nós