DUVI. Diario da Universidade de Vigo
Inicio arrow Campus de Ourense
Mércores, 05 de xullo do 2017

As persoas beneficiarias terán de balde a matrícula e axudas para gastos de viaxe e aloxamento

As Bolsas Ourense Exterior financiarán estudos de mestrado a cinco estudantes estranxeiros

O prazo de solicitude está aberto ata o día 12 de xullo


ImageNo marco das actuacións para o fomento da internacionalización do campus de Ourense, cada ano véñense convocando as Bolsas Ourense Exterior, financiadas pola Universidade de Vigo, o Consello Social da Universidade de Vigo e a Deputación Provincial de Ourense. O seu obxectivo é facilitar a mobilidade de cidadáns residentes no estranxeiro que queiran cursar estudos de primeiro curso de mestrado nos centros e escolas deste campus. As persoas beneficiarias terán de balde a matrícula e axudas para gastos de viaxe e aloxamento. O prazo para solicitar algunha das cinco bolsas que se outorgarán para o curso 2017/2018 xa está aberto.
Martes, 04 de xullo do 2017

O reitor presidiu este martes o último Consello de Campus de 2016/2017

O curso remata co primeiro plan de actuación do Campus da Auga executado case ao 100%

A aprobación definitiva do programa de doutoramento está entre os seus fitos


ImageEste martes celebrouse a última reunión do Consello de Campus de Ourense do curso 2016/2017 e nela, entre outros puntos, fíxose balance do estado de execución do proxecto de especialización Campus da Auga. “Xa executamos case o 100% do primeiro plan de actuación, polo tanto o balance é moi claro e moi positivo. Temos todos os produtos en marcha, desde o programa de doutoramento ata a construción do novo edificio”, destacou ao remate da xuntanza Salustiano Mato, reitor da Universidade de Vigo. Estes bos resultados, recalcou, están en sintonía coa evolución que está tendo o campus, salientando como “Ourense está amosándose como un campus de gran fortaleza”.
Martes, 04 de xullo do 2017

Segundo o último informe de conxuntura do Foro Económico de Galicia

A economía galega continúa na senda de crecemento con taxas superiores ao 3%

O mercado de traballo presenta un comportamento cuantitativo positivo


ImageO Foro Económico de Galicia presentou este martes o II Informe de Conxuntura Socioeconómica do Ano 2017, coordinado por Fernando González Laxe e contando tamén coa participación de José Francisco Armesto, Patricio Sánchez e Santiago Lago. Nesta ocasión, xunto coa análise das contas económicas do segundo trimestre do ano e a síntese estatística dos indicadores de conxuntura, o traballo compleméntase con comentarios sobre o motor externo, elaborados por Albino Prada, e sobre o brazo investidor da Xunta de Galicia, elaborado por José Francisco Armesto.
Luns, 03 de xullo do 2017

A cita desenvolverase do 4 ao 7 de xullo na localidade ourensá

O Curso de Medios Audiovisuais de Celanova aposta pola suma de talentos na súa XIV edición

Entre os protagonistas este ano están Carlos Casares, a produción 'Dhogs' e Youtubeir@s


ImageEntre as citas que cada ano repiten na programación de cursos de extensión universitaria organizados desde o campus de Ourense está o Curso de Medios Audiovisuais de Celanova, feito en colaboración co Fundación Carlos Casares. Este ano, a actividade terá lugar do 4 ao 7 de xullo e levará por lema A obra audiovisual. Suma de talentos. Arredor de 20 profesionais do audiovisual achegaranse á localidade ourensá para analizar as últimas producións e iniciativas no sector, estando entre os protagonista desta edición a produción Dhogs, o proxecto Youtubeir@s e o potencial fílmico da obra de Carlos Casares.
Luns, 03 de xullo do 2017

Ata o venres 60 xogadores e xogadoras participan nesta competición no campus

Fedorchuk, Lariño e Sousa lideran un disputado IV Torneo Internacional de Xadrez

En total entregaranse 6480 euros en premios nas diferentes categorías


ImageXa na súa presentación se anunciaba que este IV Torneo Internacional de Xadrez Campus Ourense ía estar moi disputado e así está ocorrendo nos primeiros días de competición. Este sábado arrancou o certame e na súa terceira xornada están empatados a tres vitorias de tres partidos disputados os xogadores Sergey A. Fedorchuk, gran mestre cun Elo maior de 2600 que ten estado entre os cen mellores xogadores do mundo; David Lariño, galego campión de España en diferentes categorías, e o portugués Andre Ventura Sousa. Arian González, mestre internacional gañador da última edición do torneo, non está de momento nestes postos de cabeza ao sufrir unha derrota.
Venres, 30 de xuño do 2017

A Escola Superior de Enxeñaría Informática celebrou este venres un cuarto de século

25 anos despois, #SomosEsei

Egresados e egresadas de diferentes promocións uníronse á conmemoración


ImageNo ano 1991, cando aínda non existían os teléfonos móbiles e cando apenas se anuncia publicamente a creación da World Wide Web, botaba a andar no campus de Ourense a entón Escola Universitaria de Enxeñaría Técnica Informática de Xestión. Transcorreu desde entón un cuarto de século no que a informática mudou radicalmente e radicalmente mudou o mundo. Durante ese tempo, tamén o centro sufriu transformacións ata converterse no que é hoxe en día a Escola Superior de Enxeñaría Informática. O que non cambiou desde entón foi a paixón pola informática e polo ensino, tal e como quedou de manifesto na celebración este venres dos 25 anos do centro.
Resultados 43 - 48 de 3743

Duvi. Diario da Universidade de Vigo. | Contacta con nós