DUVI. Diario da Universidade de Vigo
Inicio arrow Campus de Pontevedra
Venres, 04 de agosto do 2017

Nun concerto promovido pola Vicerreitoría, que terá lugar o xoves 10 no Conservatorio Manuel Quiroga

O pianista Josep Colom recreará en Pontevedra os estudos de Chopin

O recital conta con entrada gratuíta, previa recollida de invitación na Casa das Campás


ImageComo o seu propio nome indica, os estudos son pezas musicais destinadas primordialmente ao desenvolvemento da técnica, o que fai que adoitasen basearse nun único motivo musical. Dos milleiros de estudos para piano escritos durante o século XIX, os realizados polo compositor polaco Fryderyk Chopin foron os primeiros “nos que se realizou plenamente o ideal de combinar esta finalidade práctica cun contido de elevada significación musical”. Así o destaca o pianista barcelonés Josep Colom, que o vindeiro xoves 10 de agosto recreará 24 destes estudos no concerto que, da man da Vicerreitoría do campus, ofrecerá no Conservatorio Manuel Quiroga.
Xoves, 03 de agosto do 2017

‘Mediación Móbil’ é unha das iniciativas escollidas para esta aceleradora centrada na innovación social

O programa 'Vodafone Connecting for Good' selecciona a un dos premiados nos Incuvi-Emprende


Como un “salto cualitativo” na súa iniciativa de dar forma a un proxecto empresarial centrado en ofrecer servizos de mediación a través das novas tecnoloxías definen os estudantes Ángel Torres e Ignacio Fernández a selección do seu proxecto Mediación Móbil, premiado na última edición dos premios Incuvi-Emprende, no programa Vodafone Connecting for Good Galicia. Torres, estudante do grao en Dereito, e Fernández, egresado do grao en Dirección e Xestión Pública, veñen traballando nos últimos meses no desenvolvemento dun proxecto empresarial dirixido a ofrecer servizos de mediación a empresas, organizacións ou particulares a través dunha páxina web, unha aplicación para dispositivos móbiles ou unha plataforma de elearning na incubadora de AJE-Pontevedra, tras seren unha das dúas iniciativas premiadas no campus pontevedrés na sexta convocatoria dos premios ao emprendemento que promove a Universidade de Vigo.
Luns, 31 de xullo do 2017

O grupo dx5, de BBAA, estudará ata 2019 o cómic de campo expandido e o hiperlibro de artista

Un proxecto con financiamento estatal para teorizar nas fronteiras do cómic e a arte

O estudo parte da ausencia de literatura específica e busca tamén promover a experimentación artística


ImageDas súas páxinas xurdiron películas que xeran ingresos multimillonarios e icónicas personaxes, así como unha linguaxe visual, marcada pola secuenciación, que se ten expandido máis aló dos seus soportes tradicionais. Mais, ao mesmo tempo, a banda deseñada é tamén un medio pouco explorado desde o punto de vista investigador, en especial desde ámbitos como as Belas Artes. Promover unha reflexión teórico-conceptual sobre a idea do “cómic de campo expandido”, aquelas obras que combinan as peculiaridades narrativas e conceptuais do cómic con outras manifestacións artísticas é un dos obxectivos centrais do proxecto de investigación, financiado polo Ministerio de Economía e Competitividade, que o grupo dx5 da Facultade de Belas Artes desenvolverá ao longo dos próximos tres anos e que no que afondarán tamén noutro soporte ”na fronteira da arte gráfica” como é o hiperlibro de artista, ao tempo que estudarán a animación desde un enfoque transversal.
Mércores, 26 de xullo do 2017

Traballará transversalmente a creatividade, a innovación e a sustentabilidade

Un programa de doutoramento multidisciplinar para Campus CREA S2i

Presentado hoxe en Casa das Campás, comezará a impartirse o vindeiro curso 2017-2018


Image O vindeiro 25 de agosto abre o seu período de preinscrición o Programa de doutoramento Creatividade e innovación social e sustentable, unha iniciativa do campus de especialización de Pontevedra CREA S2i, co obxectivo de formar doutoras e doutores, desde unha perspectiva interdisciplinar e transdisciplinar, nos ámbitos da creatividade, a innovación e a sustentabilidade. O programa foi presentado este mediodía na Casa das Campás, nun acto no que o reitor da Universidade de Vigo, Salustiano Mato e o vicerreitor do campus pontevedrés, Juan Manuel Corbacho, destacaron a importancia que para CREA S2i ten a posta en marcha deste programa de doutoramento, que definen como “un salto académico de calidade e referencia dento do proxecto de especialización e supón a consolidación dos esforzos feitos pola comisión para reflectir unha das principais fortalezas do CREA S2i: a multidisciplinariedade".
Mércores, 26 de xullo do 2017

A organización vén de facer pública a selección de participantes na edición deste ano

Pont-Up Store dará protagonismo a 41 casos de emprendemento

A cita desenvolverase do 21 ao 23 de setembro


ImageA feira Pont-Up Store celebrarase do do 21 ao 23 de setembro en Pontevedra por cuarto ano consecutivo consolidada xa como o evento de referencia do novo emprendemento en Galicia. Despois dun intenso proceso de selección entre un total de 123 solicitudes de participación recibidas, a organización da cita vén de escoller a 41 casos de emprendemento para ter presenza neste evento. “Nesta edición constatouse un importante incremento na calidade dos emprendementos que presentaron candidatura, tanto no seu carácter innovador como no potencial de desenvolvemento”, destaca Pedro Figueroa, director da feira.
Luns, 24 de xullo do 2017

Dentro da programación de obradoiros de verán da Vicerreitoría do campus de Pontevedra

54 persoas participarán esta semana nun curso sobre o apego

Dende o mércores 26 ao venres 28 no auditorio municipal de Catoira


Preto do 35% dos bebés forman apegos inseguros como consecuencia do xeito no que pais e nais responden aos estímulos de apego dos seus fillos, por exemplo, ignorando ou rexeitando as necesidades dos bebés ou reaccionando ás mesmas de xeito inconstante. Para analizar a importancia do apego e o seu impacto como factor de protección na vida adulta, o profesor Manuel Isorna dirixe o curso de verán da Vicerreitoría do campus de Pontevedra A importancia do apego na saúde física e psicolóxica dende a concepción ata a adolescencia: resiliencia. A docencia desenvolverase dende este mércores 26 e ata o venres no auditorio municipal de Catoira e conta, como explica o profesor Isorna, con máis de medio cento de inscritos, “procedentes de toda España, principalmente de Galicia, Madrid, País Vasco, Cataluña e Baleares”.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 3303

Duvi. Diario da Universidade de Vigo. | Contacta con nós