DUVI. Diario da Universidade de Vigo
Inicio arrow Campus de Pontevedra
Xoves, 22 de xuño do 2017

Especialistas de cinco países debaten sobre experiencias multimodais na Casa das Campás

Como o mundo dixital do século XXI redefiniu os recursos educativos

Nun coloquio promovido polo grupo Litex, centrado na creación de contidos docentes e artísticos


Image“Non ten sentido que eduquemos cunha linguaxe do século XIX ou XX cando estamos no XXI”. Deste xeito puña o acento María Lobo, da empresa Gingko, na importancia que ten a contorna dixital na definición de contidos e metodoloxías docentes capaces de espertar o interese do alumnado ao achegalo ás narrativas dixitais. Fíxoo no primeiro dos relatorios do coloquio internacional Multimodalidades e espazos dixitais, que este xoves reúne na Casa das Campás a expertos e expertas procedentes de España, Portugal, Francia, Canadá e Suíza co propósito de debater sobre diferentes experiencias sustentadas na idea da multimodalidade.
Mércores, 21 de xuño do 2017

Despois de que non se presentasen candidaturas ás eleccións convocadas no centro

Rafael Durán, novo decano en funcións de Fisioterapia

Lilian Rosana Ferreira, como vicedecana, e Lourdes Maceiras, como secretaria, completan o equipo directivo


ImageO profesor do Departamento de Bioloxía Funcional e Ciencias da Saúde Rafael Durán vén de ser nomeado este mércores novo decano en funcións da Facultade de Fisioterapia, en substitución de Gustavo Rodríguez, despois de que, rematado o mandado deste último, non se presentasen candidaturas ás eleccións convocadas no centro o pasado mes. Lilian Rosana Ferreira, como vicedecana, e Lourdes Maceiras, que continúa na secretaría académica completan o equipo que se situará á fronte do centro ao longo do vindeiro ano e que inicia a súa etapa co propósito de completar os preparativos para curso 2017/2018.
Mércores, 21 de xuño do 2017

O centro acolle dous talleres sobre esta técnica, inseridos no programa de cursos de verán da Vicerreitoría

Belas Artes propón un dobre achegamento ao universo da cerámica

Tras un primeiro obradoiro sobre moldes, a actividade desta semana céntrase na produción manual


ImageUn achegamento teórico e práctico a unha disciplina que combina arte e artesanía reúne nestes días a 27 alumnos e alumnas na Facultade de Belas Artes, participantes na segunda edición de Cerámica agora, un dos cursos de extensión universitaria promovidos para este verán pola Vicerreitoría do campus. Iimpartido polo artista Pablo Barreiro, este taller viuse precedido pola primeira edición dun curso de iniciación aos moldes cerámicos, sumando deste xeito o concepto da serie a este dobre achegamento a unhas técnicas que forman parte da historia da humanidade, pero que tamén están presentes na produción artística contemporánea.
Mércores, 21 de xuño do 2017

Nenas e nenos gozaron coas súas familias dunha tarde de celebración

A Escola Infantil celebra o seu fin de curso máis tropical

Música e xogos abriron un evento que pechou a entrega de diplomas


ImageNon só pola calor que marcou as últimas xornadas, senón pola ambientación e vestiario, a Escola Infantil do campus celebrou na tarde deste martes a súa festa de fin de curso máis tropical. Desta volta, optouse por facer desta celebración unha festa hawaiana que levou tanto aos nenos e nenas como as profesoras do centro e a algúns dos familiares que lles acompañaron a sumar algunhas flores ao seu vestiario nunha xornada dedicada a despedir aos nenos e nenas neste curso rematan a súa etapa na escola. Na celebración que tivo lugar no patio do centro non faltaron a música, os xogos, as pompas de xabón ou a merenda.
Martes, 20 de xuño do 2017

Grazas ao convenio asinado coa Deputación de Pontevedra, que destina 170.000 euros a este proxecto

O Cinae desenvolverá unha tecnoloxía de detección con drones de especies invasoras e prevención de lumes forestais

O ente provincial colabora tamén nun programa de visibilización de mulleres directivas na industria pesqueira


ImageDesenvolver unha tecnoloxía que permita traducir as imaxes captadas por vehículos aéreos non tripulados en información coa que traballar na detección e no seguimento da evolución de especies vexetais invasoras, así como na detección de posibles factores de risco de lumes forestais. Este é o propósito central do proxecto que desenvolverán os investigadores e investigadoras do Cinae (Centro de Innovación Aeroespacial de Galicia), grazas ao convenio asinado nesta xornada coa Deputación de Pontevedra. Cunha duración de dous anos, o acordo contempla o investimento de 170.000 euros nun proxecto centrado no desenvolvemento dun sistema de procesado da información obtida por drones, satélites ou sensores para poder intervir nos sectores medioambiental, agroforestal e mariño.

Martes, 20 de xuño do 2017

Alumnado de doutoramento e da EE Forestal coñeceu en Cotorredondo o funcionamento dun multicóptero

Unha clase práctica de cartografía desde o aire

A actividade enmárcase nun curso de doutoramento do Campus do Mar


ImageMáis de 25 estudantes de posgrao das tres universidades galegas e da Universidade de Cabo Verde participan desde comezos de xuño no curso de especialización Coastal Dinamics and Environmental Evaluation, inserido no programa de doutoramento de excelencia internacional do Campus do Mar e dirixido a achegalos ás novas tecnoloxías cartográficas que permiten modelizar contornas costeiras. Tecnoloxías como os vehículos aéreos non tripulados que, dotados de tecnoloxía LiDAR permiten tamén realizar labores cartográficos de espazos como masas forestais. De aí que, a última xornada do curso que dirixe a profesora da EE Forestal Julia Armesto trasladase a súa última sesión aos montes de Pontevedra, co propósito de que tanto os investigadores e investigadoras como o alumnado da escola puidese de coñecer de primeira man o traballo que un multicóptero pode desenvolver neste eido.
Resultados 37 - 42 de 3303

Duvi. Diario da Universidade de Vigo. | Contacta con nós