DUVI. Diario da Universidade de Vigo
Inicio arrow Campus de Pontevedra
Martes, 26 de setembro do 2017

O ente presentou na escola o seu premio á innovación neste sector

A Cámara de Comercio convida ao alumnado da EE Forestal a desenvolver proxectos innovadores

O prazo de presentación de propostas permanece aberto ata o 16 de outubro


ImagePotenciar o sector forestal e a súa capacidade de innovación é o propósito co que a Cámara de Comercio de Pontevedra, Vigo e Vilagarcía de Arousa impulsou, a través da súa mesa forestal, da que forma parte a EE Forestal e no marco do Plan Social de Ence, o premio ao proxecto innovador forestal, dotado cun galardón de 5000 euros e un accésit de 2000 euros. Co propósito de dalo a coñecer entre o alumnado e animalo a emprender e innovar, o vicepresidente primeiro da Cámara, Eduardo Barros, presentou nesta xornada esta iniciativa no centro, acompañado polo director da escola, Juan Picos, e o director territorial de Ence, Ence Antonio Casal.
Martes, 26 de setembro do 2017

A deseñadora Arantza Vilas imparte un taller en Belas Artes dentro das actividades do Tek-Fest

Do vestiario de ‘Xogo de Tronos’ aos talleres de Esdemga

Tomando como inspiración pezas do Museo de Pontevedra, céntrase no traballo coa temperatura


ImageFundadora de Pinaki Studios, a deseñadora Arantza Vilas ten trasladado os seus procesos de traballo, nos que as técnicas tradicionais se combinan coas novas tecnoloxías, á elaboración do vestiario de producións audiovisuais como a serie Xogo de Tronos. Algunhas das técnicas empregadas no seu labor son desde este martes a base do obradoiro que, no marco do Tek-Fest, Vilas imparte en Belas Artes. Calor+Memoria é o título dun workshop no que “traballaremos cunha serie de técnicas que teñen como fío común o uso do calor e a temperatura” e para as que toman como punto de partida "unha selección de obxectos téxtiles do Museo de Pontevedra”.
Luns, 25 de setembro do 2017

Impartido polos directores do programa promovido polo alumnado ‘El Escaparate’

Un obradoiro busca que o “verme da radio” se espalle polo campus

Inserido na programación de Extensión Universitaria da Vicerreitoría, ten lugar en CCSS e da Comunicación


ImageEspallar polo campus o “verme" pola radio que hai tres anos motivou o nacemento, na Facultade de CCSS e da Comunicación, do Escaparate, un programa que o alumnado difunde a través da rede, foi un dos motivos que levou aos directores deste espazo, José Jardón e Jorge Gómez, a promover, baixo a coordinación da profesora Aurora García, o obradoiro Iniciación á creación dun programa de radio, que nestas semanas se desenvolve nesta facultade. Inserido no programa de obradoiros da Vicerreitoría do campus, este taller ten como propósito ofrecer ao alumnado un primeiro achegamento aos diferentes xéneros radiofónicos.
Venres, 22 de setembro do 2017

40 empresas amosan os seus produtos e servizos neste evento do Campus CREA S2i

O Pont-Up Store converte Pontevedra no escaparate do emprendemento

Un laboratorio de fabricación dixital e un espazo de degustación, novidades desta edición


ImageXente que se atreve a soñar. Ese é o lema da cuarta edición do Pont-Up Store, un evento promovido pola Universidade, dentro do Campus CREA S2i, co Concello de Pontevedra como patrocinador principal, dirixido a dar apoio e visibilidade aos novos emprendedores e emprendedoras. 40 novas empresas que son “a constatación dun futuro prometedor” para o emprendemento en Galicia, como salienta o director do evento, Pedro Figueroa, dan a coñecer os seus proxectos nas xornadas de venres e sábado no recinto instalado na Praza de España. Fano nos stands e nas actividades que engloba un evento que fai de Pontevedra “un escaparate da innovación, da creatividade e da vangarda dos emprendedores e emprendedoras de Galicia".
Xoves, 21 de setembro do 2017

Lara Piñeiro e Sergio Pérez participan coa investigadora Laura Ruiz no encontro que se celebra en Menorca

O alumnado súmase ao debate da Rede de Universidades Saudables

Representantes de diferentes institucións participan nos grupos de traballo sobre nutrición e actividade física


ImageA Rede Española de Universidades Saudables (REUS), da que a Universidade de Vigo forma parte e da que o técnico da Área de Benestar, Saúde e Deporte Román Lago é un dos vogais da súa xunta directiva, celebra en Menorca o seu quinto encontro. A institución viguesa está representada nestas xornadas de debate, centradas nos eidos da actividade física e da alimentación saudable, pola investigadora do campus de Ourense Laura Ruiz, así como por dous estudantes da Facultade de Ciencias da Educación e do Deporte, Lara Piñeiro e Sergio Pérez, que se suman por primeira vez aos debates e aos seus grupos de traballo.
Xoves, 21 de setembro do 2017

Como continuidade aos obradoiros de interpretación de instrumentos populares dos últimos cursos

O campus impulsa unha aula permanente de música tradicional

A Vicerreitoría abre tamén a inscrición nos cursos de locución audiovisual, oratoria e comisariado artístico


ImageNos dous últimos cursos, os obradoiros de interpretación de instrumentos populares promovidos pola Vicerreitoría contribuíron a que a gaita, o pandeiro ou a zanfona contasen cun espazo propio no campus e mesmo á que nacese nel un grupo de música tradicional. Co propósito de dotar dunha maior continuidade e entidade a esta formación, á Área de Extensión Cultural impulsa agora unha Aula Permanente de Música Tradicional Galega, que mantén aberto o seu período de inscrición. Así mesmo, a Vicerreitoría suma a estas actividades novas edicións dos talleres de locución audiovisual, oratoria e comisariado artístico.
Resultados 37 - 42 de 3363

Duvi. Diario da Universidade de Vigo. | Contacta con nós