DUVI. Diario da Universidade de Vigo
Inicio arrow Campus de Pontevedra
Mércores, 20 de setembro do 2017

Este encontro centrado nas novas tecnoloxías conta coa colaboración da Vicerreitoría do campus

Esdemga afondará no patrimonio téxtil da cidade no marco do Tek-Fest

A deseñadora Arantxa Vilas impartirá un taller na Facultade de Belas Artes


ImageUn proxecto a medio camiño entre a arte e o deseño, centrado na creación de superficies e tecidos, combinando procesos tradicionais e novas tecnoloxías. Así se presenta o taller Calor. Memoria téxtil da cidade, que a fundadora de Pinaki Studios, Arantza Vilas, impartirá a vindeira semana na Facultade de Belas Artes no marco do Tek-Fest 2017, o encontro de tecnoloxía e patrimonio que se desenvolverá en Pontevedra entre o 25 o 30 de setembro. O evento, que conta tamén coa colaboración da Vicerreitoría do campus, presentou este mércores o seu programa no Museo de Pontevedra.
Mércores, 20 de setembro do 2017

Unha xornada aborda en Belas Artes a situación da muller nestas disciplinas en Galicia

Falta de apoios e desigualdade, a dobre barreira das profesionais das artes efémeras

O coloquio contou coas intervencións das artistas Lola Correa, Gena Baamonde e María Roja


ImageA falta de apoios para o desenvolvemento de proxectos en eidos como a performance, a danza ou as artes escénicas xunto coa existencia de factores de desigualdade e de discriminación. Esta é a dobre barreira que as mulleres artistas teñen que enfrontar nestas disciplinas e que tres profesionais do eido, Lola Correa, Gena Baamonde e María Roja coincidiron en sinalar nun coloquio na Facultade de Belas Artes. Promovida polo profesor Carlos Tejo e patrocinada pola Unidade de Igualdade da Universidade, a xornada Entre a escena e a arte de acción, tiña por obxecto promover unha reflexión “sobre o complexo presente e difícil futuro” destas disciplinas.
Mércores, 20 de setembro do 2017

Unhas xornadas en CC da Educación e do Deporte abordan a idea de xénero na arte e no deporte

Os deportes artísticos non son só cousa de mulleres

A existencia de “barreiras sociais”, non obstante, dificulta aos homes a práctica destas disciplinas


ImageOs deportes artísticos son cousa de mulleres? Esta é a pregunta á que a profesora da UDC Elena Sierra tratou de responder na conferencia de apertura das xornadas Expresión artística e xénero. Unha mirada plural, que se desenvolven en Ciencias da Educación e do Deporte. E o seu propósito foi demostrar que non, “que, polas súas características, os deportes artísticos non dependen do xénero, senón de se tes realmente as calidades necesarias para eles”. Non obstante, como salientou a profesora Rebeca Freire, deportes como a ximnasia rítmica vense afectados por unha serie “de estereotipos e barreiras sociais".
Martes, 19 de setembro do 2017

Grazas ao convenio asinado este martes para pór en marcha un curso con 40 prazas

Universidade e Deputación alíanse para formar en igualdade a profesorado e alumnado

Impartido por María Álvarez Lires e Azucena Arias, desenvolverase entre outubro e marzo


ImageGrazas ao convenio de colaboración asinado este martes no Pazo Provincial, a Universidade de Vigo e a Deputación Provincial de Pontevedra impulsarán un programa de formación en igualdade dirixido tanto ao profesorado e alumnado universitario como ao persoal docente dos centros dependentes da institución provincial e dos centros de ensino dependentes da Consellería de Educación. O ente provincial financiará, con máis de 7000 euros, este curso coordinado polas profesoras María Álvarez Lires e Azucena Arias, que conta cun total de 40 prazas e que se desenvolverá no campus entre o vindeiro mes de outubro e marzo de 2018.
Martes, 19 de setembro do 2017

A conmemoración da Semana Europea de Mobilidade pecha ao tráfico parte da estrada central

A diversión substitúe aos coches no campus de Pontevedra

Diferentes actividades lúdicas buscan nestas xornadas sensibilizar sobre o uso de transportes alternativos


ImageUn circuíto dedicado a medios de transporte alternativos, a realización dun mural ou postos informativos sobre actividades para a mocidade e hábitos de ocio saudable ocupan desde este martes un espazo habitualmente reservado aos vehículos no campus de Pontevedra. A conmemoración da Semana Europea da Mobilidade pecha durante estes días ao tráfico o treito da estrada central situado entre a rotonda de acceso ao campus da Xunqueira e a situada fronte a Ciencias da Educación e do Deporte, ambas abertas á circulación. No seu lugar, este espazo é ocupado nos mediodías de martes, mércores e xoves, por unha serie de propostas lúdicas abertas ao conxunto da cidadanía. “É o segundo ano que celebramos esta actividade, que se enmarca no plan de acción do proxecto Green Campus”, salienta o vicerreitor do campus, Juan Manuel Corbacho.
Luns, 18 de setembro do 2017

CCSS e da Comunicación acolle o II Congreso de Estudos Internacionais de Galicia

Preto de 20 especialistas afondan na necesidade dun novo relato para a Unión Europea

Na conferencia inaugural, Camilo Nogueira defendeu a UE como un "fito democrático revolucionario"


ImageTras formular unha ollada integral á acción exterior de Galicia na súa edición inaugural, o Congreso de Estudos Internacionais de Galicia que a Área de Ciencia Política e da Administración da Universidade promove xunto co Igadi buscou para a súa segunda edición centrarse nun dos marcos de acción exterior de maior incidencia para o país. Ese non podía ser outro que a Unión Europea, “o primeiro bloque internacional no que debe saber desenvolverse Galicia” e o eixo do debate que hoxe luns e mañá martes reúne na Facultade de Ciencias Sociais e da Comunicación a preto de 20 expertos en áreas como a política ou a economía, co propósito de analizar, desde Galicia, o futuro dunha unión “que está atravesando uns momentos de crise, sobre todo arredor do Brexit, pero tamén da rexeneración que busca o eixo franco-alemán”, como apunta o director do Igadi, Daniel González Palau.
Resultados 43 - 48 de 3363

Duvi. Diario da Universidade de Vigo. | Contacta con nós