DUVI. Diario da Universidade de Vigo
Inicio arrow Campus de Vigo
Xoves, 14 de setembro do 2017

Entre o 20 e 22 de setembro co gallo da celebración das 35ª Jornadas de Gerencia Universitaria

Vigo converterase a próxima semana no epicentro da análise dos retos da xestión universitaria

200 profesionais abordarán cuestións como financiamento, profesionalización ou xestión de recursos


Image A Universidade de Vigo acollerá entre os días 20 ao 22 de setembro a 35ª edición das Jornadas de Gerencia Universitaria nas que uns 200 profesionais, entre poñentes e público, analizarán cuestións fundamentais para o desenvolvemento da súa actividade nas universidades. “O formato das xornadas deste ano é totalmente distinto a como se fixeron en anteriores ocasións. Trátase de abordar temáticas que non sexan lugares comúns para todos e nós pretendemos que se fale de temas diferentes, cousas que preocupan e que van enlazadas con poñer en valor, tanto á Universidade de Vigo como o Sistema Universitario Galego, SUG”, explica o xerente da institución académica viguesa, Manuel Fernández Jáuregui, que hai ano e medio aceptou o reto de deseñar as xornadas, organizadas por Crue Universidades Españolas. As xornadas desenvolveranse baixo o lema Retos en la gestión de los recursos en las universidades, desarrollo y estrategias de futuro.
Mércores, 13 de setembro do 2017

A Unidade de Igualdade convoca os premios que levan o nome da escritora galega

Egeria, unha muller pioneira que rachou cos roles tradicionais

Recoñecen a inclusión da perspectiva de xénero nos traballos fin de grao e de mestrado


ImageDiversos estudos sitúan a orixe da viaxeira e escritora Egeria na Gallaecia no século IV. Muller pioneira en moitos aspectos, peregrinou a Terra Santa e, ao seu regreso, recolleu a súa experiencia no libro Itinerarium ad Loca Sancta, converténdose na primeira cronista de viaxes galega. O seu exemplo de muller aventureira, peregrina e escritora, toda unha pioneira rompendo roles de xénero na antigüidade, é o que tratan de preservar os Premios Egeria que convoca a Unidade de Igualdade da Universidade de Vigo para poñer en valor a inclusión da perspectiva de xénero nos traballos fin de grao e de mestrado. O prazo de presentación de solicitudes remata o 20 de deste mes de setembro.
Mércores, 13 de setembro do 2017

Elixiron o seu póster entre os máis de 1700 que se presentaron ao 19 congreso desta entidade

A Sociedade Europea de Endocrinoloxía premia á bióloga Yolanda Diz

O seu traballo abre novas liñas para o tratamento da diabetes, a obesidade e trastornos asociados


ImageA investigadora do Laboratorio de Endocrinoloxía da Universidade de Vigo Yolanda Diz Chaves, adscrita ao Centro de Investigación Biomédica, Cinbio, é unha das tres gañadoras do Poster Prize Winner que cada ano outorga a Sociedade Europea de Endocrinoloxía en recoñecemento aos mellores pósters presentados no seu congreso anual. Nesta ocasión presentáronse máis de 1700 traballos e entre os tres mellores na categoría de ciencia básica atópase o de Diz-Chaves, un estudo no que autora demostra que o liraglutide, un axente terapéutico empregado no tratamento da diabetes, é capaz de modular a reposta inflamatoria, o que permite abrir novas liñas de investigación para o tratamento e busca dunha cura para a diabetes e a obesidade, patoloxías que, á súa vez, están asociadas a múltiples enfermidades neurodexenerativas, entre elas o alzhéimer.
Martes, 12 de setembro do 2017

No pasado ano participaron máis de 6000 persoas e para este ano a matrícula xa está aberta

Comeza un curso moi deportivo

O programa de actividades inclúe escolas deportivas, ligas, servizo de saúde e diferente tipos de abonos


ImageTanto para as persoas que queiran retomar a actividade física tras as vacacións estivais, como para aquelas que pretenden comezar a realizar algún deporte como propósito para o novo curso, a Área de Benestar, Saúde e Deporte ten deseñado un completo programa formativo para o primeiro cuadrimestre. Para todo tipo de persoas, con calquera condición física e sexa cal sexa o deporte que lles interese, a programación cubre case todas as necesidades. Como cada ano, desenvolveranse escolas deportivas, ligas universitarias, escolas deportivas, programas de lecer na natureza, etc. e ofértanse tamén abonos para o uso da instalacións deportivas universitarias ou dos centros asociados en Vigo, Ourense e Pontevedra. O prazo de matrícula estañá aberto dende o día 1 deste mes.
Martes, 12 de setembro do 2017

Traballa no desenvolvemento de metodoloxías que melloren o funcionamento dos biobancos

O Centro de Investigación Mariña postúlase como referente mundial na preservación funcional de recursos biolóxicos mariños

Será pioneiro no uso dun láser de infravermellos de desconxelación ultrarápida en tipos celulares mariños


Image A preservación de recursos biolóxicos mariños en estado funcional en calquera época do ano suporía unha auténtica revolución para a I+D mariña ao reducir de maneira significativa os custos, tanto de recolección, como o mantemento de organismos en catividade, así como problemas asociados á estacionalidade dos recursos. Aínda que a criobioloxía comezou a aplicarse ao medio mariño na década de 1970, na actualidade non existen máis dunha ducia de laboratorios no mundo dedicados, na maior parte dos casos a tempo parcial ou como actividade secundaria, a esta disciplina científica. O Centro de Investigación Mariña da Universidade de Vigo consciente desta oportunidade estratéxica, traballa desde hai anos para confirmarse como unha referencia internacional neste ámbito, centrándose no desenvolvemento de metodoloxías que melloren o funcionamento dos grandes biobancos mariños existentes e cos que o centro colabora.
Luns, 11 de setembro do 2017

Vigo celebrou este luns o acto de benvida ao seu alumnado internacional

Italia e Alemaña, principais países de procedencia dos 384 estudantes de intercambio dos tres campus

A esta cifra haberá que sumar os que aínda poden solicitar unha estadía no segundo cuadrimestre


ImageMuller, beneficiaria do programa Erasmus, procedente de Italia ou Alemaña e coa Facultade de Filoloxía e Tradución como centro de acollida. Este é o perfil xeral do alumnado de intercambio que cursará os seus estudos durante este curso 2017-2018 na Universidade de Vigo. En total son 384 mozas e mozos entre os tres campus: 84 deles quedaranse todo o curso académico, 276 optaron polo primeiro cuadrimestre e 24 polo segundo, aínda que para esta última opción a matrícula continúa aberta ata finais de ano. Do total, 241 son mulleres e 143 homes. Dos 384 estudantes que xa confirmaron a súa estadía na Universidade de Vigo 300 elixiron escolas e facultades de Vigo; 25 de Ourense e 59 de Pontevedra. Para todos eles, este luns o campus de Vigo celebrou o tradicional acto de benvida.
Resultados 19 - 24 de 6039

Duvi. Diario da Universidade de Vigo. | Contacta con nós