DUVI. Diario da Universidade de Vigo
Inicio arrow Campus de Vigo
Mércores, 19 de xullo do 2017

A campaña 'Dasme un anaco?' busca estudantes e persoal que queira participar en programas de voluntariado

Doar tempo, doar solidariedade

Ademais dos proxectos propios da institución, tamén se pode colaborar con ONG


ImageOs motivos son moitos: por axudar ao próximo, por coñecer novas vías de realización persoal, por devolver á sociedade o recibido, por xustiza social, por ocupar o tempo de lecer, etc. e cada persoa elixe os seus para ser voluntario ou voluntaria. Por iso, A Universidade de Vigo pon en marcha a campaña Dasme un anaco? Faite voluntario, que busca membros da comunidade universitaria dispostos a compartir o seu tempo, coñecementos e solidariedade con outros. A institución ofrece unha serie de proxectos e programas de voluntariado, propios e alleos, que se adapten ao que busca cada individuo e que, ao tempo, sexan de utilidade a diferentes colectivos sociais e obxectivos diversos.
Martes, 18 de xullo do 2017

Segundo Z. del Carmen Velásquez, as reformas derivaron nunha “tendencia endurecedora” en ambos países

Unha tese analiza similitudes e diferenzas entre o proceso penal xuvenil en España e Venezuela

A investigadora remarca que as medidas cautelares privativas de liberdade deben ter “carácter excepcional”


ImageAs medidas cautelares persoais reguladas no proceso penal xuvenil en España e Venezuela gardan similitudes pero tamén diferenzas. Para facer un estudo comparado da lexislación en ambos países a investigadora Zugey del Carmen Velásquez centrou a súa tese de doutoramento en estudar ambas casuísticas co fin de expoñer a regulación concreta de cada ordenamento xurídico e destacar os aspectos que poden mellorar ambas regulacións, exportando dun sistema ao outro “aquilo que mellor se adecúe ao interese superior do menor”. Un dos aspectos nos que se centrou Velásquez no seu estudo son as medidas cautelares e conclúe a que a súa aplicación en ambos países desvirtúa a súa natureza cautelar. E é que segundo a investigadora, estas medidas teñen como finalidade “asegurar o normal desenvolvemento do proceso, garantindo a presenza do investigado en todas as fases do proceso, especialmente, no xuízo, así como na execución da eventual sentenza condenatoria”.
Martes, 18 de xullo do 2017

A inscrición está aberta ata o xoves 20 de xullo

Partovia, Cuntis, Laias e o Talaso Atlántico, aulas dunha nova edición do curso sobre termalismo

As actividades comezan o 25 de xullo en Carballiño e prologaranse ata o venres 28


ImageUnha viaxe por algúns dos centros termais máis importantes de Galicia: os Balnearios de Carballiño e Partovia, as Termas de Cuntis, o Balneario de Laias e o Talaso Atlántico en Oia. Esta é a atractiva proposta da XVI edición do curso de verán sobre termalismo que este ano estrea unha nova temática: Termalismo e vida saudable.O programa recolle unha serie de conferencias nas que se estudarán os beneficios das augas medicinais e mariñas para a saúde e un conxunto de actividades que servirán para pór en práctica os coñecementos teóricos aprendidos e para adestrar a futuros profesionais. Todas as persoas interesadas en coñecer a potencialidade dos hábitos termais para a saúde poden inscribirse nesta actividade ata o vindeiro xoves 20 de xullo.
Luns, 17 de xullo do 2017

O docente Burghard Baltrusch é o investigador principal do proxecto internacional POEPOLIT

Unha análise do carácter político de certas expresións poéticas na actualidade occidental

Céntrase no período que vai de mediados do século XX á actualidade en catro espazos xeográficos


Image Que na poesía actual se pode observar, de forma aínda máis clara ca nas vangardas, a presenza do político como unha experiencia humana colectiva, mais tamén como un interface entre o público e o privado, entre a subxectivización e o suxeito, entre o global e o local , entre a asimilación e a subversión, entre a participación e a resistencia, etc. é a hipótese de partida do proxecto de investigación Poesía actual e política: análises das relacións contemporáneas entre produción cultural e contexto sociopolítico. POEPOLIT está financiado con algo máis de 36.000 euros do Programa Estatal de Fomento de la I+D+i de Excelencia 2016 e nel traballará un equipo internacional integrado por 18 persoas de 11 universidades e sete países, liderado polo docente e investigador do Departamento de Filoloxía Galega e Latina Burghard Baltrusch.
Venres, 14 de xullo do 2017

O proxecto, dirixido polo Centro Ramón Piñeiro, foi desenvolvido por investigadores de Vigo e Santiago

O sintetizador de voz CoToVía permite converter un texto escrito en galego nunha cadea oral

Permite a accesibilidade web a persoas con discapacidades visuais e a automatización das comunicacións


ImageTras máis dunha década de traballo de investigadores do Grupo de Tecnoloxías Multimedia da Universidade de Vigo e do Instituto da Lingua Galega da Universidade de Santiago de Compostela, coordinados polo Centro Ramón Piñeiro, este venres presentouse oficialmente a versión definitiva do sintetizador de voz CoToVía. Trátase dunha ferramenta informática que permite a conversión dun texto escrito en galego nunha cadea oral. Os encargados de presentalo foron o secretario xeral de Política Lingüística, Valentín García e o director científico do Centro Ramón Piñeiro para a Investigación en Humanidades (CRPIH) e coordinador do proxecto, Manuel González.
Venres, 14 de xullo do 2017

Son 50 décimas dirixidas contra don Diego Zernadas, o coñecido Cura de Fruíme

Descobren un manuscrito inédito escrito en galego culto en plenos Séculos Escuros

Xosé A. Fdez Salgado, profesor da FFT, transcribe e estuda unha longa carta en verso sen asinar e sen datar


ImageÉ unha longa carta en verso, sen asinar e sen datar, pero de arredor de 1770, con 50 décimas dirixidas contra don Diego Zernadas, o coñecido Cura de Fruíme, unha das figuras máis sobranceiras da Galicia da Ilustración. O profesor da Facultade de Filoloxía e Tradución Xosé A. Fernández Salgado acaba de publicar o libro Cincuenta décimas contra don Diego Zernadas, publicado por Edicións Laiovento, no que dá a coñecer a edición e estudo dun manuscrito inédito, escrito en galego, que se encadra dentro do período coñecido como dos Séculos Escuros.
A escaseza de textos escritos en galego do século XVIII acrecentan a valía destas Cincuenta décimas e obrigan a matizar afirmacións sobre o anecdótico uso do galego escrito nesta altura.
Resultados 43 - 48 de 6039

Duvi. Diario da Universidade de Vigo. | Contacta con nós