DUVI. Diario da Universidade de Vigo
Inicio arrow Institucional
Xoves, 28 de setembro do 2017

É o segundo recoñecemento deste tipo que recibe en Arxentina

Luis Rodríguez Ennes será investido doutor honoris causa pola Universidade de Flores

A cerimonia terá lugar o día 27 de outubro


ImageO catedrático emérito da Universidade de Vigo Luis Rodríguez Ennes vén de sumar un novo recoñecemento á súa dilatada traxectoria. A Universidade de Flores, en Arxentina, comunicoulle a concesión do seu doutoramento honoris causa. Esta é a segunda distinción deste tipo que recibe, despois de que o pasado mes de abril foi investido doutor honoris causa pola Universidade Nacional do Comahue, do mesmo país. A concesión foi decidida por unanimidade polo Consello Superior da Universidade de Flores, estando previsto que a cerimonia de entrega sexa o 27 de outubro, antes do inicio do IV Congreso de Principios Xerais e Dereito Romano que se celebrará nesa institución.
Venres, 22 de setembro do 2017

Nun acto celebrado na Morgan Library, o reitor recibiu o manuscrito que contén a obra de Martin Codax

800 anos e máis de 5300 quilómetros despois, o Pergamiño Vindel inicia o seu retorno a Vigo

“Estamos moi contentos de compartir este tesouro coa Universidade”, asegurou o director da Morgan, Colin Bailey


ImageO versos das cantigas de Martin Codax resoaron este venres sala North Parlor da Morgan Library&Museum de Nova York no transcurso da cerimonia na que a institución propietaria do Pergamiño Vindel, que contén a obra poética do trobador galego, entregou temporalmente “un dos seus tesouros”, como recoñeceu o seu director Colin B.Baley, á Universidade de Vigo. A institución académica comezou hai dous anos un proceso de negociación coa Morgan Library co obxectivo de acadar o retorno a Vigo do pergamiño que contén as sete cantigas, seis delas con notación musical, do trobador Martin Codax, co obxectivo de mostralo publicamente na contorna onde foi concibido no século XIII. “Grazas, dicimos en galego. Grazas á Morgan por facer súa a nosa petición e confiarlle a esta universidade un dos seus tesouros máis prezados", dixo Salustiano Mato na súa intervención na Morgan.
Venres, 22 de setembro do 2017

40 empresas amosan os seus produtos e servizos neste evento do Campus CREA S2i

O Pont-Up Store converte Pontevedra no escaparate do emprendemento

Un laboratorio de fabricación dixital e un espazo de degustación, novidades desta edición


ImageXente que se atreve a soñar. Ese é o lema da cuarta edición do Pont-Up Store, un evento promovido pola Universidade, dentro do Campus CREA S2i, co Concello de Pontevedra como patrocinador principal, dirixido a dar apoio e visibilidade aos novos emprendedores e emprendedoras. 40 novas empresas que son “a constatación dun futuro prometedor” para o emprendemento en Galicia, como salienta o director do evento, Pedro Figueroa, dan a coñecer os seus proxectos nas xornadas de venres e sábado no recinto instalado na Praza de España. Fano nos stands e nas actividades que engloba un evento que fai de Pontevedra “un escaparate da innovación, da creatividade e da vangarda dos emprendedores e emprendedoras de Galicia".
Xoves, 21 de setembro do 2017

É un 1,75% inferior a 2015, cunha emisión media de 0,95 toneladas de CO2 por persoa

A Universidade segue reducindo a súa pegada de carbono por persoa e marca outro mínimo histórico en 2016

O incremento do uso do transporte público e do gas natural, claves na redución das emisións


ImageEn 2008, a Oficina de Medio Ambiente da Universidade comezou a calcular a pegada de carbono e a pegada ecolóxica da institución. A primeira é unha medida do impacto ambiental que estuda as emisións de gases de efecto invernadoiro á atmosfera (medidas en kg de CO2 equivalentes). A segunda é a cantidade de terreo estándar (medido en hectáreas globais equivalentes) que é necesaria para absorber os impactos ambientais asociados a unha actividade determinada. Nestes nove anos, as emisións dos tres campus universitarios fóronse reducindo e, segundo o estudo do 2016, que acaba de ser feito público pola OMA, volve marcase outro mínimo histórico, con 0,95 toneladas de CO2 por persoa, o que supón unha redución dun 1,75% respecto a 2015. Estas emisións tradúcense nunha pegada ecolóxica de 7924 hectáreas globais e de 0,328 hectáreas por persoa.
Mércores, 20 de setembro do 2017

Nas 35 Jornadas de Gerencia Universitaria organizadas impulsadas pola CRUE

200 especialistas analizan en Vigo os retos de futuro na xestión dos recursos das universidades

A conferencia inaugural afondou nun modelo universitario baseado na innovación e non só no emprendemento


Image200 representantes de universidades públicas e privadas de todo o Estado reúnense dende este mércores e ata o venres en Vigo nas 35ª Jornadas de Gerencia Universitaria, unha edición organizada pola Universidade de Vigo que se centra en analizar os retos na xestión das universidades e en perfilar estratexias de futuro, prestando especial atención á xestión dos recursos, a profesionalización da dirección, os restos da administración electrónica, as infraestruturas e o papel da investigación e a transferencia na relación coa sociedade. O acto inaugural estivo presidido polo reitor da Universidade de Vigo, Salustiano Mato; o conselleiro de Cultura, Educación e Ordenación Universitaria, Román Rodríguez; o presidente do Consello Social da Universidade de Vigo, Ernesto Pedrosa; o xerente da Universidade viguesa, Manuel Fernández Jáuregui e o xerente da Universitat de Lleida, Josep M. Sentís.
Martes, 19 de setembro do 2017

Grazas ao convenio asinado este martes para pór en marcha un curso con 40 prazas

Universidade e Deputación alíanse para formar en igualdade a profesorado e alumnado

Impartido por María Álvarez Lires e Azucena Arias, desenvolverase entre outubro e marzo


ImageGrazas ao convenio de colaboración asinado este martes no Pazo Provincial, a Universidade de Vigo e a Deputación Provincial de Pontevedra impulsarán un programa de formación en igualdade dirixido tanto ao profesorado e alumnado universitario como ao persoal docente dos centros dependentes da institución provincial e dos centros de ensino dependentes da Consellería de Educación. O ente provincial financiará, con máis de 7000 euros, este curso coordinado polas profesoras María Álvarez Lires e Azucena Arias, que conta cun total de 40 prazas e que se desenvolverá no campus entre o vindeiro mes de outubro e marzo de 2018.
Resultados 13 - 18 de 2384

Duvi. Diario da Universidade de Vigo. | Contacta con nós