DUVI. Diario da Universidade de Vigo
Inicio arrow Institucional
Mércores, 22 de marzo do 2017

Universidade e Deputación renovaron este mércores o seu convenio de colaboración anual

220.000 euros para actividades culturais e deportivas, investigación e mobilidade no campus de Ourense

Os representantes das dúas institucións salientaron a alianza existente entre ambas


Image220.000 euros para a promoción e o fomento de actuacións e programas en materia de cultura, educación e deporte a desenvolver no campus de Ourense e que redunden en beneficio da sociedade e do interese xeral da provincia. Con este obxectivo, Salustiano Mato, reitor da Universidade de Vigo, e Manuel Baltar, presidente da Deputación Provincial de Ourense, asinaron este mércores o convenio de colaboración anual entre as dúas institucións, incrementándose a contía que a entidade provincial destina neste 2017 ao financiamento de actividades culturais e deportivas, de mobilidade de estudantes e de fomento da investigación realizadas desde o campus ourensán. Trátase, apuntou o reitor, “dun convenio estrutural” que permite continuar consolidando o campus de Ourense como “o campus non central máis solvente” do mapa universitario galego.
Mércores, 22 de marzo do 2017

Con cadansúa axuda complementaria de 1000 euros

O Centro Comercial Gran Vía axudará economicamente a alumnado excelente que participe no programa Erasmus+

Manuel J. Fernández e Fernando Pinto asinaron este mércores o convenio de colaboración


ImageAs tres alumnas ou alumnos con mellor expediente académico seleccionados para participar o próximo curso no programa Erasmus+ recibirán cadansúa axuda complementaria de 1000 euros financiada polo Centro Comercial Gran Vía de Vigo. Así se establece no convenio de colaboración asinado este mércores entre esta entidade e a Universidade de Vigo, un documento no que se explican os detalles dun novo lanzamento das denominadas bolsas Erasmus+ Gran Vía de Vigo, axudas que xa se puxeran en marcha en 2015 e que agora volven pórse a disposición do alumnado universitario vigués.
Mércores, 22 de marzo do 2017

O campus de Ourense uniuse este mércores á celebración do día mundial deste recurso natural

Compoñendo un futuro ao son da auga

Arredor de 300 escolares de centros do sur de Galicia participaron nunha xornada de portas abertas


ImageO día 22 de marzo, declarado polas Nacións Unidas como o Día Mundial da Auga, é unha data que pretende concienciar ás persoas da importancia da auga doce e promover a sustentabilidade da xestión deste recurso. Desde a posta en marcha do seu proceso de especialización como Campus da Auga, esta data é para o campus de Ourense un día de celebración, un día para abrir as súas portas ás futuras xeracións de universitarios e amosar o que se coce nas súas aulas e laboratorios. Arredor de 300 estudantes de Educación Secundaria Obrigatoria e Bacharelato das provincias de Ourense e Pontevedra participaron este mércores nas actividades organizadas co gallo desta data sinalada para a Universidade de Vigo. A todos eles e elas, Salustiano Mato, reitor da Universidade de Vigo, deulles a benvida recalcándolles o desexo da institución académica de que, con iniciativas coma esta, “naza en vós a paixón polos estudos universitarios”.
Martes, 21 de marzo do 2017

Profesor do Departamento de Psicoloxía Evolutiva e Comunicación, faleceu o pasado venres

O campus fica en silencio en memoria de Antonio Maceira

Centos de persoas reuníronse ás portas da Facultade de Ciencias da Educación e do Deporte


ImageAlumnado, profesorado e persoal de administración e servizos da Facultade de Ciencias da Educación e do Deporte baleiraron este mediodía o interior deste centro do campus para reunirse ás súas portas e gardar un minuto de silencio en memoria do profesor Antonio Delfín Maceira Gago, falecido o pasado venres. “Era un gran profesor, moi querido por todos e o seu falecemento supón un gran pesar para toda a comunidade universitaria, especialmente para esta facultade”, salientou o decano do centro, Vicente Romo, trala celebración desta pequena homenaxe ao que foi docente deste centro desde os seus inicios.
Luns, 20 de marzo do 2017

A nova titulación comezaría a impartirse na Escola de Enxeñería Industrial no curso 2018-2019

O Consello de Goberno aproba á declaración de interese do grao de Enxeñería Biomédica

Considerarase a futura implantación en 2019/20 dun Grao en Deseño e Creación en Pontevedra


Image A Universidade de Vigo comeza a dar pasos cara ao novo mapa de titulacións e faino coa aprobación por parte do Consello de Goberno da declaración dunha nova titulación de grao e sete de máster, que se implantarían no curso 2018-2019, mentres que cara ao curso 2019-2020 o órgano de goberno manifestou o seu interese cara á considerar unha aprobación formal doutras declaracións de interese para implantar neste caso outro grao e dous novos mestrados. En relación coas declaracións de interese aprobadas hoxe, o Consello deu luz verde á presentada pola Escola Enxeñería Industrial para a implantación no curso 2018-2019 dun Grao en Enxeñería Biomédica. Cara ao curso 2019-2020, o Consello de Goberno manifestouse favorable a considerar unha oferta futura cara á aprobación formal dunha declaración de interese para que se poida impartir na Facultade de Belas Artes un Grao en Deseño e Creación.
Venres, 17 de marzo do 2017

A versión en liña da feira de emprego universitario celebrarase do 21 ao 24 de marzo

A II edición da Finde.U Virtual contará coa participación de máis de cen empresas de toda Europa

En 2016 ofertáronse 1324 postos de emprego e recibíronse máis de 4400 currículos


ImageMáis de cen empresas procedentes de toda Europa participarán a vindeira semana na II edición da Feira Internacional Virtual de Emprego Finde.Eu, unha cita organizada polas universidades de Vigo, Porto e Tras Os Montes e Alto Douro, que este ano se celebrará do 21 ao 24 de marzo e na que a expectativa é superar os bos resultados que xa se acadaron na anterior edición, na que participaran 78 empresas que ofertaron 1324 postos de emprego para os que se recibiron máis de 4400 currículos. A matrícula para o alumnado, totalmente gratuíta, manterase aberta ata o xoves.
Resultados 43 - 48 de 2307

Duvi. Diario da Universidade de Vigo. | Contacta con nós