DUVI. Diario da Universidade de Vigo
Inicio arrow Investigación
Martes, 12 de setembro do 2017

Traballa no desenvolvemento de metodoloxías que melloren o funcionamento dos biobancos

O Centro de Investigación Mariña postúlase como referente mundial na preservación funcional de recursos biolóxicos mariños

Será pioneiro no uso dun láser de infravermellos de desconxelación ultrarápida en tipos celulares mariños


Image A preservación de recursos biolóxicos mariños en estado funcional en calquera época do ano suporía unha auténtica revolución para a I+D mariña ao reducir de maneira significativa os custos, tanto de recolección, como o mantemento de organismos en catividade, así como problemas asociados á estacionalidade dos recursos. Aínda que a criobioloxía comezou a aplicarse ao medio mariño na década de 1970, na actualidade non existen máis dunha ducia de laboratorios no mundo dedicados, na maior parte dos casos a tempo parcial ou como actividade secundaria, a esta disciplina científica. O Centro de Investigación Mariña da Universidade de Vigo consciente desta oportunidade estratéxica, traballa desde hai anos para confirmarse como unha referencia internacional neste ámbito, centrándose no desenvolvemento de metodoloxías que melloren o funcionamento dos grandes biobancos mariños existentes e cos que o centro colabora.
Luns, 11 de setembro do 2017

Nunha nota elaborada polo seu Observatorio Municipal de Galicia

A Rede Localis chama a atención sobre a dependencia económica dos concellos con outros niveis de goberno

No documento tamén analizan a evolución dos principais impostos


ImageO 41% de todos os ingresos non financeiros dos municipios galegos de ata 5000 habitantes proceden doutras administracións públicas. Só o 38% dos ingresos non financeiros derívanse da recadación vía recursos propios ou cedidos aos concellos, o que dificulta a consecución da autonomía fiscal e supón unha forte dependencia económica doutros niveis de goberno. Estes son algúns dos datos e conclusións sobre os que chama a atención a Rede Localis, a Rede de Administración Local potenciada desde ou Grupo Gen da Universidade de Vigo, nunha nota do seu Observatorio Municipal de Galicia feita pública este luns.
Luns, 11 de setembro do 2017

A intervención corre a cargo do Grupo de Estudos de Arqueoloxía, Antigüidade e Territorio

Arranca a segunda campaña arqueolóxica en San Salvador dos Penedos

Durante dúas semanas realizarán sondaxes no seu castelo e necrópole altomedieval


ImageEste luns, e por segundo ano consecutivo, membros do Grupo de Estudos de Arqueoloxía, Antigüidade e Territorio da Universidade de Vigo volveron ao xacemento de San Salvador dos Penedos, no Concello de Allariz, para continuar profundando no seu coñecemento histórico. Durante dúas semanas, sete persoas baixo a dirección científica de Patricia Valle e Adolfo Fernández traballarán sobre o terreo realizando sondaxes tanto na necrópole como no castelo deste enclave altomedieval.
Xoves, 07 de setembro do 2017

A científica do CSIC Patricia Pereiro presentou a súa tese no marco do programa de doutoramento Do*Mar

Un estudo avanza no coñecemento da resposta inmune antiviral e resistencia do rodaballo ao seu principal virus, o VHSV

Entre os resultados do estudo destaca o deseño da primeira vacina de ADN para combater o ataque do patóxeno


ImageO rodaballo é unha das especies máis importantes para o sector acuícola en Galicia e a secuenciación do seu ADN por parte do Grupo de Inmunoloxía e Xenómica do Instituto de Investigacións Mariñas en 2016 foi un grande avance para optimizar a súa produción. Agora, a tese da investigadora deste grupo Patricia Pereiro, no marco do Programa de Doutoramento en Ciencias Mariñas, Tecnoloxía e Xestión Do*Mar avanza no coñecemento da resposta inmune antiviral e a resistencia do rodaballo ao seu principal virus, a septicemia hemorráxica viral (VHSV). Ademais, a científica tamén deu un paso máis no referente aos métodos para combatelo, deseñando a primeira vacina de ADN que codifica a glicoproteína G de VHSV. A tese, con mención internacional e dirixida por Beatriz Novoa e Antonio Figueras, foi defendida no Instituto de Investigacións Mariñas e realizada no ao abiero do programa de doutoramento do Campus do Mar.
Luns, 04 de setembro do 2017

A entidade está considerada a maior organización mundial de fotónica

Humberto Michinel será desde o 1 de outubro secretario xeral da International Commission for Optics

O catedrático da Universidade de Vigo era ata o de agora un dos seus vicepresidentes


ImageHumberto Michinel, catedrático de Óptica da Universidade de Vigo, vén de sumar un novo recoñecemento e nomeamento á súa dilatada traxectoria. Despois de ser elixido o pasado mes de setembro presidente da European Optical Society (EOS), o docente do campus de Ourense tomará posesión o día 1 de outubro como secretario xeral da International Commission for Optics (ICO), considerada a maior organización mundial de fotónica. A súa elección produciuse no 24th Congress of International Commission for Optics, que se celebrou do 21 ao 25 de agosto en Xapón.
Luns, 04 de setembro do 2017

Coa colaboración da Universidade de Vigo, o CINBIO e a Rede de Excelencia SICI

Especialistas internacionais en canles iónicas reúnense para analizar os últimos avances neste ámbito

A Reunión RECI VI celébrase en Santiago de Compostela entre o 6 e o 8 deste mes


ImageAs canles iónicas son unhas proteínas complexas situadas nas membranas celulares de, entre outras, neuronas e células musculares que forman poros, que permiten que os ións atravesen as células para a transmisión de información. Hoxe en día, coñécese que o funcionamento incorrecto destas canles xera un bo número de enfermidades chamadas ‘canalopatías’, entre as que se atopan doenzas comúns como a hemicrania ou xaqueca. Para afondar na investigación deste ámbito, máis de 150 profesionais de diversos países do mundo, viaxn a Santiago de Compostela para participar esta semana na VI Reunión da RECI (Red Española de Canales Iónicos).
Resultados 13 - 18 de 2328

Duvi. Diario da Universidade de Vigo. | Contacta con nós