DUVI. Diario da Universidade de Vigo
Inicio arrow Investigación
Xoves, 09 de febreiro do 2017

Pontevedra acolle entre o 27 e o 29 de abril a décimo terceira edición dun congreso centrado nestes eidos

Un encontro internacional e multidisciplinar para estreitar lazos entre deporte e saúde

A organización agarda poder reunir a máis de 300 asistentes no evento que terá lugar no Pazo da Cultura


ImageUn enfoque multidisciplinar, no que teñan cabida as investigacións e innovacións en rendemento deportivo, educación física, nutrición ou actividade física saudable constitúen o eixo en torno ao que cada ano se articula o Congreso Internacional de Ciencias do Deporte e a Saúde, que entre os días 27 e 29 de abril celebrará en Pontevedra a súa décimo terceira edición. Conferencias, talleres e a presentación de investigacións combinaranse ao longo de tres xornadas nun evento organizado polo Concello, a Vicerreitoría do campus, a Universidade da Coruña e a asociación Sportis, no que a organización agarda reunir a máis de 300 expertos, profesionais e estudantes.
Mércores, 08 de febreiro do 2017

Santiago Lago e Manuel Baltar asinaron este mércores un convenio de colaboración

O Grupo de Investigación Gen e a Deputación de Ourense alíanse para dar pulo ao municipalismo

O obxectivo é converter a Red Localis en referente estatal no estudo deste eido


ImageA Deputación de Ourense e o Grupo de Investigación Governance and Economics Research Network (Gen), a través da súa Asociación Gen+, veñen de asinar este mércores un convenio de colaboración que ten como obxectivo profundar no coñecemento da realidade do municipalismo non só galego senón tamén estatal a través da realización de estudos e actividades de investigación e difusión sobre este tema. Entre as medidas contempladas no acordo están a posta en marcha dun observatorio de ámbito galego, a celebración dun congreso estatal e a realización dun informe sobre o goberno local en España. Con esta alianza, desde o Grupo Gen, que ten a súa sede na Facultade de Ciencias Empresariais e Turismo do campus de Ourense, buscan que a súa Red Localis dea un salto cualitativo e se converta en referente estatal en temas locais.
Mércores, 08 de febreiro do 2017

O obxectivo é potenciar a transferencia ao mercado dos resultados da I+D+i mariña

A Universidade participa en tres dos catro proxectos seleccionados na convocatoria europea Blue Labs

A EE de Telecomunicación coordinará un deles, centrado no uso de drones para detectar lixo na costa


ImageA convocatoria europea Blue Labs: innovative solutions for maritime challenges recibiu 50 propostas de proxectos, que foron avaliados pola Axencia Executiva para as Pequenas e Medianas Empresas. Delas tan só foron seleccionadas catro, tres das cales contan coa participación da Universidade de Vigo. Esta alta taxa de éxito nunha convocatoria europea moi esixente recoñece as achegas dende o eido científico e tecnolóxico ao eido do crecemento azul ou Blue Growth e as iniciativas seleccionados serán financiadas polo Fondo Europeo Marítimo e de Pesca. Os proxectos con participación viguesa abordan temas como o aproveitamento das macroalgas invasoras para a industria farmacéutica o alimentaria; a aplicación das tecnoloxías dos UAV's (drones) e o procesado dixital das imaxes para a detección de lixo en praias e a implementación dun innovador “laboratorio” para desenvolver solucións novas e viables na xestión da contaminación mariña, en particular, de mareas negras.
Martes, 07 de febreiro do 2017

Vitoria Canoura, premio ao mellor traballo de fin de Máster en Dirección Pública e Liderado Institucional

O desenvolvemento do goberno electrónico nos municipios galegos é “limitado e pouco uniforme”

Tamén foi premiado o estudo de José María Peral sobre a influencia da UE na aviación civil


ImageCoñecer o grao de desenvolvemento do goberno electrónico nos municipios galegos, a través da análise dos seus recursos web e da realización dun “experimento de e-usuario misterioso” polo que se solicitaba ás administracións información sobre unha serie de trámites, constituía o propósito central do proxecto co que Vitoria Canoura vén de ser recoñecida co premio ao mellor traballo final do mestrado en Dirección Pública e Liderado Institucional. O estudo realizado de 14 concellos permitiu a esta egresada constatar que a implantación do goberno electrónico nas administracións locais vén marcada por un “desenvolvemento moi limitado e pouco uniforme”.
Luns, 06 de febreiro do 2017

A tese de Jorge Feijóo avalía técnicas tradicionais como baños de inmersión ou papetas e outras innovadoras

Un estudo analiza os protocolos máis eficaces para eliminar os sales solubles do granito ornamental

A súa investigación permitiu empregar por primeira vez in situ as técnicas electrocinéticas na lareira dun pazo


ImageOs sales solubles son uns dos principais inimigos do patrimonio cultural e artístico e poñen en risco a perdurabilidade dos monumentos construídos en pedra. Con todo, tradicionalmente investigadores e restauradores consideraron que o granito, material máis emprego en Galicia, non é tan susceptible ao impacto dos sales como o son as rochas sedimentarias. Consecuentemente, existen moi poucos estudos sobre os efectos dos sales solubles sobre o granito ornamental e escasas análises sobre os mellores protocolos para a desalación. Este é un baleiro que tenta encher a tese de doutoramento de Jorge Feijóo, dirixida por Javier Taboada e Teresa Rivas. Nela avalía técnicas tradicionais, como baños de inmersión ou aplicación de papetas, así como outras técnicas máis innovadoras, como inhibidores e/ou modificadores da cristalización ou técnicas electrocinéticas.
Luns, 06 de febreiro do 2017

Os grupos interesados poden presentar a súa petición ata o 3 de marzo

Ábrese o prazo para solicitar espazos de investigación no edificio do Campus da Auga

A previsión é que as obras de construción do centro rematen a finais de ano


ImageCoas obras de construción do edificio do Campus da Auga a pleno rendemento e cumprindo os prazos previstos, a Vicerreitoría do Campus de Ourense vén de facer pública a convocatoria para que os grupos de investigación deste campus poidan solicitar espazos de investigación neste novo edificio, que se prevé estea rematado a finais de ano. As zonas susceptibles de cesión a grupos de investigación son espazos de investigación nas plantas dúas e tres e espazo de altura especial no Laboratorio de Hidráulica na planta baixa. O prazo de presentación de solicitudes remata o día 3 de marzo de 2017.
Resultados 43 - 48 de 2175

Duvi. Diario da Universidade de Vigo. | Contacta con nós