DUVI. Diario da Universidade de Vigo
Inicio arrow Investigación
Luns, 22 de maio do 2017

Celebrarase a finais de mes en Gotemburgo coa participación da investigadora Nuria González Prelcic

A Universidade coorganiza unha escola internacional de verán sobre procesamento de sinais para o acceso sen fíos 5G


Image A Universidade de Vigo xunto ás de Chalmers, Linköping, Texas en Austin e Aalborg organiza a edición de 2017 da Joint IEEE SPS Eurasip Summer School on Signal Processing for 5G Wireless Access, que se celebrará entre os días 29 de maio e 1 de xuño na cidade de Gotemburgo. A escola sueca de verán é unha das máis recoñecidas no ámbito internacional sobre procesamento de sinais para o acceso sen fíos 5G e nesta edición as conferencias centraranse en catro temas: MIMO masivo, comunicación mmWave, posicionamento e comunicación de máquina a máquina.
Venres, 19 de maio do 2017

Ecimat abandeira a creación do EBB que coordinará o funcionamento de biobancos mariños europeos

O programa Interreg Atlantic Area achega á Universidade máis de 400.000 euros para dous proxectos do ámbito mariño

Pola súa banda, o grupo de investigación en Aplicacións dos Láseres participa no proxecto Bluehuman


ImageSon a creación do maior e máis diverso banco de recursos biolóxicos mariños do mundo e a valorización dos resultados da investigación no ámbito dos materiais de orixe mariña para aplicacións nos campos da saúde e do benestar humano, dúas iniciativas que poden contribuír a mellorar a calidade de vida dos habitantes das rexións atlánticas de España, Francia, Irlanda, Reino Unido e Portugal? A Unión Europea considera que si e por iso o programa Interreg Espazo Atlántico 2014-2020, como parte da estratexia europea 2020, vén de concederlle máis de 418.000 euros a estes dous proxectos de tres anos de duración: 268.000 no caso do EBB- European Marine Biological Resource Centre Biobank, coordinado polo Centro de Singular de Investigación Mariña Ecimat e Campus do Mar e 150.000 euros no do proxecto Bluehuman, Biotecnoloxía azul como innovación na saúde humana para o crecemento intelixente en Europa, no que participa o grupo de investigación en Aplicacións Industriais dos Láseres e que coordina a Universidade do Minho.
Dos máis de 100 proxectos presentados á primeira fase do programa Interreg Espazo Atlántico, só 42 recibirán financiamento para o seu desenvolvemento.
Venres, 19 de maio do 2017

Carla López analizou na súa tese a “estratexia 2.0” dos campionatos de Europa de deportes colectivos

Os eventos deportivos universitarios priman a información fronte a participación nas redes sociais

A maioría dos torneos analizados deu prioridade á busca de visibilidade fronte á relación cos seus públicos


ImageNa actualidade, a promoción de eventos deportivos como os Campionatos de Europa Universitarios non se concibe sen o uso das redes sociais, sostén a investigadora Carla López, quen analizou na súa tese a comunicación realizada nestas plataformas polos organizadores dos torneos. No seu estudo, López Rodríguez constatou que, pese as posibilidades de interacción que outorgan as redes sociais, os usuarios e usuarias remataron sendo máis espectadores que participantes e os eventos deportivos universitarios tenden a empregar as redes sociais “como unha extensión do medio offline, no que o usuario ve pero non participa”.
Xoves, 18 de maio do 2017

Cun orzamento de 2,3 millóns de euros, proverá información de calquera punto do planeta a baixo custo

Cinae e Aistech suman forzas para desenvolver unha rede de nanosatélites de observación, comunicación e control

A misión real con lanzamento está prevista para o ano 2019


ImageA finais do ano 2016 a Unidade Mixta de Investigación, presentada polo Centro de Innovación Aeroespacial de Galicia, Cinae, e a empresa Aistech Space S.L. denominada A fábrica do futuro aplicada ao desenvolvemento dunha constelación de satélites de observación, comunicacións e control marítimo e aéreo recibía da Axencia Galega de Innovación, GAIN, unha axuda de preto de 700.000 euros. Con anterioridade á concesión da axuda, a unidade mixta, que hoxe foi presentada nun acto celebrado nas instalacións do Cinae, constituíase coa finalidade de coordinar a cooperación entre o centro de innovación e a empresa para o deseño, fabricación, lanzamento e operación dunha rede de 25 nanosatélites co obxectivo de obter datos de posicionamento de buques e avións, xunto con fotografías térmicas da superficie terrestre e recompilar datos de redes de sensores distribuídas polo planeta.
Martes, 16 de maio do 2017

O profesor da EE Forestal Juan Picos participa en Chile nun seminario da asociación Alasa

As aseguradoras de América Latina debaten sobre o seguro forestal cun investigador do campus

Os danos producidos pola vaga de lumes que sufriu o país andino motivan esta actividade


ImageOnce persoas falecidas, milleiros de vivendas destruídas e máis de 550.000 hectáreas afectadas é o balance que, en xaneiro e febreiro deste ano, deixou unha vaga de lumes forestais no centro e sur de Chile. Poñer en valor a importancia dos seguros forestais como unha ferramenta de protección dos propietarios das superficies arbóreas fronte a este tipo de sucesos é o obxectivo do seminario internacional que a Asociación Latinoamericana para el Desarrollo del Seguro Agropecuario promove en Valdivia, coa participación do investigador da EE Forestal Juan Picos, cuxa tese de doutoramento analizaba a viabilidade deste tipo de pólizas en Galicia.
Martes, 16 de maio do 2017

Investigadores de Vigo e da Rey Juan Carlos traballan na Ecimat para avaliar as interaccións ecolóxicas

Un estudo analiza a capacidade de colonización en Galicia da alga invasora 'C. fragile'

En contra do que sucede noutros países, na costa galega a especie nativa consigue facer fronte á alóctona


ImageCodium fragile é unha das algas invasoras máis daniñas en sistemas costeiros, xa que é quen de desprazar ás especies nativas en todo o mundo. No Atlántico noreste os seus primeiros rexistros son de principios do século XX, pero, sen embargo, en España non se describe esta especie ata 1966, concretamente no mar Cantábrico. O seu éxito no proceso de invasión é principalmente atribuído á súa ampla tolerancia fisiolóxica tanto á temperatura como á salinidade, tipos de substrato ou contaminantes, así como polo seu rápido crecemento durante o verán, a pouca presión de herbívoros e os diversos modos de reprodución e dispersión. Sen embargo, nas costas da península ibérica varios estudos científicos conseguiron demostrar que a especie nativa, C. tomentosum, conseguía facer fronte á especie invasora. Así, para poder coñecer ben o carácter invasor desta alga, científicos da Universidade de Vigo e da Rey Juan Carlos están a desenvolver un estudo sobre unha alga que, a pesares de ser orixinaria de Xapón, se atopa xa distribuída por todo o mundo.
Resultados 49 - 54 de 2268

Duvi. Diario da Universidade de Vigo. | Contacta con nós