DUVI. Diario da Universidade de Vigo
Inicio arrow Investigación
Venres, 30 de xuño do 2017

Ao abeiro de 'Galtfish', proxecto centrado no estudo da produción do sal e salgaduras en época romana

Investigadores de Vigo e Santiago descobren en Adro Vello unha gran mostra de peixe de hai 1700 anos e restos óseos de sete persoas

Adolfo Fernández (UVigo) e Olalla López (USC) lideraron a intervención no xacemento de O Grove


Image Pola súa dimensión e o seu estado de conservación, a mostra de peixe de hai 1700 anos de antigüidade que agochaba o pío número 1 do xacemento romano de Adro Vello (O Grove), “pode ser un achado único”, asegura Adolfo Fernández, docente e investigador do Grupo de Estudos en Arqueoloxía, Antigüidade e Territorio da Universidade de Vigo (Geaat). Xunto á docente e investigadora do Departamento de Zooloxía, Xenética e Antropoloxía Física da USC Olalla López e a un grupo de sete investigadoras e investigadores de ambas as dúas universidades, Adolfo Fernández encargouse durante unha semana da dirección técnica da intervención arqueolóxica desenvolvida en Adro Vello, onde tamén se localizaron os restos óseos de sete persoas: un recén nacido e tres nenos e outros tres adultos, de diferentes épocas, que abranguen do século V ou VI ata o XVII.
Xoves, 29 de xuño do 2017

Un equipo de 20 persoas traballará durante o mes de xullo neste xacemento de Allariz

Os arqueólogos volverán a Armea para deixar ao descuberto a súa atalaia e sondar a zona das Pioucas da Santa

A intervención será realizada un ano máis polo Grupo de Estudos en Arqueoloxía, Antigüidade e Territorio


ImageRematar de escavar a finca da atalaia, de propiedade municipal, deixando toda esta zona exposta ao público, e realizar varias sondaxes na contorna do xacemento da "Cibdá de Armea" para ver a súa posible potencialidade expositiva para o futuro, entre elas, a zona das Pioucas da Santa. Con estes obxectivos presentouse este xoves a campaña 2017 de escavacións arqueolóxicas en Armea, no Concello de Allariz. Un equipo de 20 persoas liderado por arqueólogos do Grupo de Estudos en Arqueoloxía, Antigüidade e Territorio da Universidade de Vigo (Geaat) volverá en xullo á zona para continuar sacando á luz un xacemento do que estiman só está descuberto arredor dun 5% da súa superficie. Esta actuación verase complementada cunha intervención en San Salvador dos Penedos, concretamente no Castelo de Malpaso e a súa contorna.
Xoves, 29 de xuño do 2017

A Universidade viguesa é un dos cinco socios do proxecto Erasmus+ LEAP

Especialistas europeos analizan en Vigo como trasladar á universidade o exitoso método Lean

Traballan no desenvolvemento de varios xogos electrónicos que poidan ser empregados como recursos didácticos


ImageNaceu no mundo da industria, concretamente nas fábricas de Toyota, como unha filosofía de xestión baseada na mellora continua e na eliminación de gastos superfluos (de tempo, de diñeiro, de espazo, de consumo enerxético...) durante a fabricación de produtos. Hoxe o Lean Manufacturing, baseado na premisa de que ‘todo pode facerse mellor’, está considerado como un dos métodos de xestión da produción máis estendidos e revolucionarios da historia. Conscientes desta realidade especialistas de cinco universidades europeas están a analizar como contribuír a que estas prácticas industriais se trasladen tamén á formación universitaria, e fano a través do proxecto europeo Lean and Agile Practices Linking Engineering Higher Education to Industry ), no que participa a Universidade de Vigo xunto con centros de Portugal, Reino Unido , Estonia e Grecia.
Xoves, 29 de xuño do 2017

No X Congreso da Asociación de Centros de Linguas no Ensino Superior, ACLES

55 universidades debaten en Vigo sobre a internacionalización lingüística do ensino superior

Coa participación de 200 persoas procedentes de institucións académicas de Europa e Asia


ImageTanto na docencia como na investigación o inglés gaña cada vez máis peso nas institucións universitarias. Moitas universidades ofrecen titulacións completas ou materias neste ou noutros idiomas estranxeiros e poñen a disposición do alumnado e do persoal formación complementaria de idiomas para a mobilidade internacional e a I+D deseñando sistemas de acreditación de coñecementos lingüísticos. Isto responde á Estratexia para a Internacionalización das Universidades Españolas 2015-2020, pero neste contexto faise necesaria unha posta en común das estratexias de plurilingüismo que se están a desenvolver en cada universidade, algo que durante os tres próximos días se debaterá en Vigo no marco do X Congreso da Asociación de Centros de Linguas no Ensino Superior, ACLES, inagurado este xoves polo reitor, Salustiano Mato.
Mércores, 28 de xuño do 2017

Investigadores de CCSS e da Comunicación analizaron as publicacións en Facebook dos principais partidos

Para que o candidato capte a atención, mellor que apareza só na foto

Mediante o uso do ‘eye-tracking’ observaron que as fotografías individuais obsérvanse máis que as grupais


ImageSe un partido político quere dar visibilidade ao seu candidato ou candidata a través das redes sociais, o mellor que pode facer é empregar nelas fotografías nas que apareza só ou en primeiro plano. Esta é unha das principais conclusións que os investigadores da Facultade de Ciencias Sociais e da Comunicación Xosé Rúas e Iván Puentes extraen do estudo que realizaron das imaxes publicadas na rede social Facebook por cinco candidatos nas eleccións xerais de xuño de 2016 mediante o uso do eye-tracking, un dispositivo de seguimento do movemento dos ollos diante da pantalla.
Mércores, 28 de xuño do 2017

O congreso MESIC 2017, no que participan 200 especialistas, prolongarase ata o venres

Profesionais de máis de 25 nacionalidades debaten en Vigo o presente e futuro da industria 4.0

A cita é o principal punto de encontro entre expertos e expertas dedicados ao mundo da enxeñaría de fabricación


ImageProfesionais procedentes de máis de 25 nacionalidades debaten esta semana en Vigo o presente e futuro da denominada industria 4.0 ou industria intelixente, base do que xa comeza a coñecerse como 4ª Revolución Industrial. Fano no 7º Congreso Internacional da Sociedade de Enxeñaría de Fabricación, MESIC 2017, cita que arrancou hoxe no Auditorio Pazo de Congresos Mar de Vigo e na que coincidiron un importante número de representantes académicos e institucionais, que non dubidaron en referirse a este encontro como o lugar ideal no que potenciar e fortalecer, “aínda máis se cabe”, as relacións entre a empresa e a universidade, “neste novo e estimulante escenario”, tal e como salientou na inauguración Juan José Aguilar, presidente da Sociedad de Ingeniería de Fabricación (SIF).
Resultados 49 - 54 de 2328

Duvi. Diario da Universidade de Vigo. | Contacta con nós