DUVI. Diario da Universidade de Vigo
Inicio arrow Investigación
Luns, 18 de setembro do 2017

CCSS e da Comunicación acolle o II Congreso de Estudos Internacionais de Galicia

Preto de 20 especialistas afondan na necesidade dun novo relato para a Unión Europea

Na conferencia inaugural, Camilo Nogueira defendeu a UE como un "fito democrático revolucionario"


ImageTras formular unha ollada integral á acción exterior de Galicia na súa edición inaugural, o Congreso de Estudos Internacionais de Galicia que a Área de Ciencia Política e da Administración da Universidade promove xunto co Igadi buscou para a súa segunda edición centrarse nun dos marcos de acción exterior de maior incidencia para o país. Ese non podía ser outro que a Unión Europea, “o primeiro bloque internacional no que debe saber desenvolverse Galicia” e o eixo do debate que hoxe luns e mañá martes reúne na Facultade de Ciencias Sociais e da Comunicación a preto de 20 expertos en áreas como a política ou a economía, co propósito de analizar, desde Galicia, o futuro dunha unión “que está atravesando uns momentos de crise, sobre todo arredor do Brexit, pero tamén da rexeneración que busca o eixo franco-alemán”, como apunta o director do Igadi, Daniel González Palau.
Luns, 18 de setembro do 2017

A 17 edición da feira foi presentada este luns

O II Simposio Internacional de Termalismo e Calidade de Vida porá a faciana científica a Termatalia

A actividade en Expourense desenvolverase en total desde este mércores e ata o venres


ImageA Feira Internacional do Turismo Termal, Saúde e Benestar Termatalia chega esta semana á súa 17 edición convertida, tal e como salientan os seus organizadores, en “punto de referencia internacional para o negocio no turismo termal, de saúde e de benestar”. Deste xeito, contará coa participación de 260 expositores, 30 operadores de turismo e 40 países representados, con destacada presenza de América Latina e Europa e incorporando tamén a Asia-Pacífico. A faciana científica da cita, que se celebrará en Expourense os días 21 e 22 de setembro, chegará da man da celebración de xeito paralelo nela do II Simposio Internacional de Termalismo e Calidade de Vida.
Venres, 15 de setembro do 2017

Baixo a coordinación de Beatriz Mouriño, do Grupo de Oceanografía Biolóxica e Enrique Nogueira do IEO

Investigadores da Universidade, IEO e CSIC estudan os mecanismos de formación de mareas vermellas

O proxecto Remedios trata de determinar o papel da turbulencia no crecemento do fitoplancto tóxico nas rías


ImageInvestigadores e investigadoras da Universidade de Vigo, o Instituto Español de Oceanografía e o Consejo Superior de Investigaciones Científicas desenvolven o proxecto científico Remedios (RolE of Mixing on phytoplankton bloom initiation, maintEnance and DIssipatiOn in the galician ríaS, ) que ten como finalidade determinar o papel da turbulencia no crecemento do fitoplancto tóxico que provoca as mareas vermellas nas rías galegas. O estudo, financiado polo Ministerio de Economía e Competitividade arrancou a comezos de 2017 e desenvolverase ata finais de 2019, coordinado polos investigadores Beatriz Mouriño, do Grupo de Oceanografía Biolóxica da Universidade, e Enrique Nogueira, do IEO-Vigo. Xunto con estes organismos, forman parte do proxecto o Intecmar, a Universidade de Southamptom, o Ifremer (Francia) e o Scripps Institution of Oceanography (EEUU).
Xoves, 14 de setembro do 2017

O centro foi o responsable de informar das condicións do mar en múltiples probas

Torallamar consolídase como observatorio de referencia en eventos náuticos celebrados nas Rías Baixas

Levan máis de catro anos ofrecendo medidas en tempo real de datos meteorolóxicos e oceanográficos


ImageO portal de información oceanográfica e meteorolóxica Torallamar, desenvolvido polo Grupo de Oceanografía Física e persoal do Centro de Investigación Mariña da Universidade de Vigo, consolidouse este verán como observatorio de referencia para as travesías a nado de longa distancia celebradas nos últimos meses nas Rías Baixas, entre elas, o Desafío Illas Cíes (10 km), a Batalla de Rande (27 km), Arousaman (13 km) ou a Tripe Coroa Illas Atlánticas (28 Km). O centro leva xa máis de catro anos ofrecendo medidas en tempo real das condicións meteorolóxicas e oceanográficas.
Xoves, 14 de setembro do 2017

Segundo o 'III Informe de Conxuntura Socioeconómica do Ano 2017' presentado este xoves

A economía galega continúa a súa senda expansiva

Os expertos indican que o crecemento susténtase na maior contribución do saldo exterior neto


ImageO Foro Económico de Galicia, xestionado polo Grupo Gen da Universidade de Vigo, presentou este xoves en Santiago de Compostela o III Informe de Conxuntura Socioeconómica do Ano 2017, coordinado por Fernando González Laxe. Nel saliéntase como tras nove anos dende o comezo da crise, Galicia presenta un PIB real case ao mesmo nivel de 2008. “Con todo, esta recuperación macroeconómica non se traslada ao mesmo ritmo ao mercado de traballo, nomeadamente no que se refire á poboación ocupada”, advírtese no documento.
Mércores, 13 de setembro do 2017

A iniciativa do Campus da Auga terá lugar os días 20 e 21 de setembro

O II Simposio Internacional sobre Termalismo e Calidade de Vida reunirá a 200 profesionais e investigadores

A actividade desenvolverase no marco da 17ª edición da feira Termatalia


ImageUn foro de encontro de arredor de 200 profesionais e investigadores relacionados co termalismo que quere fomentar a transferencia de coñecemento e estimular o contacto entre os diferentes axentes do sector. Con este obxectivo preséntase o II Simposio Internacional sobre Termalismo e Calidade de Vida, que os días 20 e 21 de setembro de 2017 terá lugar ligada á celebración da 17ª Feira Internacional do Turismo Termal, Saúde e Benestar (Termatalia). A iniciativa está organizada no marco do proxecto de especialización do campus de Ourense como Campus da Auga.
Resultados 7 - 12 de 2329

Duvi. Diario da Universidade de Vigo. | Contacta con nós