DUVI. Diario da Universidade de Vigo
Inicio arrow Actividades Académicas
Luns, 08 de maio do 2017

Alumnado da Universidad Anáhuac Xalapa completa a súa formación en CCSS e da Comunicación

De Veracruz a Pontevedra para afondar nas claves da alta dirección

Once estudantes de posgrao mexicanos participan na sétima edición deste seminario


ImageO director do Ifevi, Arsenio Prieto; o secretario xeral da Asociación de Industriais Metalúrxicos de Galicia (Asime), Enrique Mallón; o responsable de Comunicación e RRPP de PSA en Vigo, Pedro Hortas; ou a directora de márketing do RC Celta, Maruxa Magdalena. Estes son algúns dos relatores e relatoras que nos últimos días achegan a once estudantes de posgrao da Universidad de Anáhuac Xalapa, situada no estado mexicano de Veracruz, ás claves da dirección empresarial e comunicativa. Fano na Facultade de CCSS e da Comunicación, onde asisten entre os días 2 e 10 á sétima edición do Curso de Alta Dirección en Empresas e Comunicación.
Venres, 05 de maio do 2017

Impartido por Mago Cali por terceiro ano consecutivo

Un obradoiro converte en máxicas as tardes dos luns

Preto de 20 persoas asisten a esta actividade no edificio Miralles


Image“Aprender maxia serve para moitos aspectos da vida”, explica Juan Carlos González, máis coñecido como Mago Cali e responsable de impartir o obradoiro de Iniación á Maxia organizado polo Servizo de Extensión Universitaria dentro da programación do segundo cuadrimestre. As 19 alumnas e alumnos matriculados este ano adquiriron durante o seminario que remata a próxima semana, ademais de nocións de maxia, habilidades matemáticas, de memoria “e tamén algo de psicoloxía aplicada dirixida a presentar mellor os xogos”, explica o responsable do obradoiro, que asegura que non se precisan aptitudes especiais para aprender maxia, “tan só interese na disciplina”.
Xoves, 04 de maio do 2017

CCSS e da Comunicación acolle o 11 de maio unha xornada sobre estas plataformas

O Social Media Day tornase o Día das Redes Galegas

Egresadas e egresados desta facultade protagonizarán os relatorios da xornada


ImageDebater e pór de relevo o papel que xogan as redes sociais na comunicación do século XXI constituían dous dos obxectivos cos que o profesor Xabier Rolán impulsou hai tres anos na Facultade de Ciencias Sociais e da Comunicación o Social Media Day, coincidindo coa conmemoración, o cuarto luns de xaneiro, do Día do Community Manager. Estes obxectivos mantéñense no presente ano nun evento que muda de nome e de data, pasando a ser o Día das Redes Galegas e a celebrarse o 11 de maio, no Mes das Letras, co propósito de reivindicar precisamente a necesidade de que o idioma gañe espazo nestas plataformas.
Xoves, 04 de maio do 2017

A facultade acolleu o faladoiro ‘(Trans)formando o mundo’, promovida polo Concello

CC da Educación e do Deporte achégase á realidade silenciada da mocidade transexual

A escritora Eva Mejuto e Éric Dopazo, da asociación Arelas, compartiron un coloquio co alumnado


Image“A min facíanme sentir mal por ser diferente. Aposto a que a moitos de vós tamén”, apuntaba o mozo transexual Éric Dopazo ao alumnado da Facultade de Ciencias da Educación e do Deporte, que este xoves acolleu o faladoiro (Trans)formando o mundo, un ciclo de actividades promovidas polo Concello para dar visibilidade á realidade das persoas transexuais. “A transexualidade na mocidade e na adolescencia era algo que ata hai pouco estivo practicamente agochado do debate público”, salienta a escritora Eva Mejuto, que presentou o seu libro 22 segundos, que narra a historia dun mozo transexual, nun acto que se completou cun coloquio con Dopazo.
Xoves, 04 de maio do 2017

A Facultade de Ciencias acollerá o 10 de maio un taller con este obxectivo

Aprendendo a consumir enerxía dun xeito máis sustentable

A actividade está organizada por Amigos da Terra en colaboración co centro


ImageO mércores 10 de maio, a Facultade de Ciencias do campus de Ourense acollerá o taller A túa enerxía pode cambialo todo!. A cita está organizada por Amigos da Terra en colaboración co centro co obxectivo de amosar aos participantes cousas que poden facer na súa vida cotiá para frear o cambio climático e impulsar unha nova economía arredor da enerxía. Con esta iniciativa, a asociación ecoloxista quere amosar ás persoas interesadas pasos sinxelos que poden levar a cabo e que contribúen “a cambiar cara un modelo que aposte polas enerxías renovables, polo aforro e o uso intelixente da enerxía”.
Xoves, 04 de maio do 2017

Nun seminario de iniciativa empresarial dirixido pola profesora Maruxa Álvarez

Os novos profesionais da Bioloxía aprenden a converter en negocio os resultados de investigación

A iniciativa reuniu a especialistas universitarios e profesionais do mundo da empresa


ImageO alumnado do programa de doutoramento en Biotecnoloxía Avanzada tivo este xoves a oportunidade de coñecer de preto o proceso de converter ideas procedentes de resultados de investigación en oportunidades de negocio. Fíxoo no Seminario de Iniciativa Empresarial, unha actividade dirixida pola profesora Maruxa Álvarez e coa que se busca, por segundo ano consecutivo, propiciar a conexión entre o mundo académico e o empresarial. “A idea do seminario é que o alumnado do doutoramento e dos últimos cursos do grao en Bioloxía poidan coñecer máis de preto a realidade empresarial e divertirse creando o seu propio proxecto, partindo da idea e chegando a un prototipo de empresa”, explica Álvarez.
Resultados 49 - 54 de 2742

Duvi. Diario da Universidade de Vigo. | Contacta con nós