DUVI. Diario da Universidade de Vigo
Inicio arrow Cultura
Luns, 24 de abril do 2017

Compartirán actuación coa coral do IES A Xunqueira I na Facultade de CCSS e da Comunicación

O coro do campus ofrece este mércores o seu primeiro concerto

O recital, programado para as 19.30 horas, pecharase coa interpretación conxunta de catro pezas


ImageMáis aló da súa participación en graduacións e actos académicos ou da interpretación dunha serie de pezas nos corredores da Facultade de Ciencias da Educación e do Deporte, onde desenvolven os seus ensaios, o coro do campus de Pontevedra tiña ata agora unha materia pendente; ofrecer un concerto de seu. De aí que a actuación que o vindeiro mércores 26, ás 19.30 horas, compartirán co coro do IES A Xunqueira I na Facultade de Ciencias Sociais e da Comunicación poida considerarse o concerto de debut da agrupación que dirixe o profesor Marco Lucato e que integra tanto alumnado do campus como persoas alleas á comunidade universitaria.
Venres, 21 de abril do 2017

Desde este venres e ata o 9 de xuño a creadora amosa a súa obra no campus

María Prada 'pecha aspas »' na Sala Alterarte

Nunha mostra curada pola docente da Universidade de Vigo Anne Heyvaert


ImagePecha aspas » é o resultado de varios anos de complicidade e indagacións arredor da natureza da imaxe sobre papel e o valor do pregue. Nesta mostra, con pequenos ensaios visuais realizados en paralelo á súa investigación doutoral, María Prada interrógase sobre a literalidade e a representación, experimentando con efectos de superficie”. Con estas palabras Anne Heyvaert, docente da Facultade de Belas Artes da Universidade de Vigo, presenta a exposición Pecha aspas » da creadora María Prada que desde este venres ocupa os muros da Sala Alterarte do campus de Ourense e da que é comisaria.
Xoves, 20 de abril do 2017

O director de 'Timecode', curta nomeada aos Oscar, participou na Semana da Creatividade e da Innovación

Juanjo Giménez: "Parte da maxia do cine é que non hai fórmulas para que unha película funcione"

Un encontro sobre investigacións multidisciplinares e un relatorio sobre educación oceánica completaron a xornada


ImageAínda que o título da conferencia que na tarde deste xoves ofreceu no Museo de Pontevedra, no marco das actividades da Semana da Creatividade e da Innovación, era Estratexias dun economista para ser nomeado aos Óscar, o primeiro que deixa claro o director e produtor Juanjo Giménez é que “parte da maxia de dedicarse ao mundo do cine é que non hai ningunha fórmula” que garanta o éxito dun determinado traballo. “Cando te dedicas ao cine, o primeiro que aprendes é que non hai regras”, recoñece o cineasta barcelonés, cuxo relatorio viuse precedido pola proxección de Timecode, a curta o pasado mes levábao ata a gala de entrega dos Oscar.
Xoves, 20 de abril do 2017

A Aula Rosaura foi a encargada de abrir a Mostra Internacional de Teatro Universitario de Ourense

Unha nova edición da Miteu que arranca con 'natureza propia'

O seu espectáculo tivo como temática a igualdade e a muller


ImageComo xa vén sendo tradición, a Aula Universitaria de Ourense Rosaura arrancou este xoves unha nova edición da Mostra Internacional de Teatro Universitario de Ourense, a Miteu, que este ano celebrada a súa 22 edición. Os actores e actrices do primeiro nivel das aulas teatrais do campus saíron a escena por primeira vez ante o público para amosar a súa Natureza propia, unha peza na que sacaron a escena mulleres inspiradoras de diferentes épocas, xeografías e perfís.
Mércores, 19 de abril do 2017

O certame convidaba ao alumnado de bacharelato a deseñar accións de mellora da súa contorna

Preto de 50 estudantes achegaron os seus proxectos ao Concurso Intercentros da EE Forestal

As e os participantes visitarán o centro este venres para participar na entrega de premios


ImageA construción dun miradoiro de aves, a rehabilitación dun lavadoiro, a recuperación dun monte afectado polos lumes forestais ou a fabricación dun manual con trampas para a avespa velutina son algúns dos doce proxectos, ideados por 48 estudantes de bacharelato de diferentes puntos de Galicia, que este venres optan ao primeiro premio do Concurso Intercentros da Escola de Enxeñaría Forestal. Convidar ao alumnado a deseñar propostas de mellora da súa contorna natural máis próxima é o propósito central dun certame no que o equipo gañador obterá un premio de 1000 euros.
Martes, 18 de abril do 2017

O prazo de inscrición remata o 19 de abril e impartirase o 2 de maio no edificio Miralles

Formar para previr e dar resposta ao acoso sexual e por razón de sexo

O curso impartirao a experta en igualdade Karen Campos McCormack, da IE University


Image Os dereitos á igualdade, á non discriminación, á salvagarda da dignidade, á integridade moral, á intimidade e ao libre desenvolvemento son básicos nos estados democráticos e están recollidos e garantidos na Constitución Española, na Lei para a igualdade efectiva entre homes e mulleres e en diversas normativas da Unión Europea. Así e todo, é necesario facer un traballo de concienciación, por iso a Universidade de Vigo organiza o curso Prevención e resposta ao acoso sexual e por razón de sexo. O prazo de inscrición está aberto na plataforma Bubela ata este mércores 19 de abril e pode matricularse todo o persoal de administración e servizos.
Resultados 49 - 54 de 1999

Duvi. Diario da Universidade de Vigo. | Contacta con nós