DUVI. Diario da Universidade de Vigo
Inicio arrow Cultura
Xoves, 11 de maio do 2017

As persoas interesadas poden votar o seu micropoema favorito ata o 31 de maio

Preto de 30 obras participan na II edición do Microconcurso da biblioteca da EE de Telecomunicación


ImageAmor, estudos, humor, homenaxe ás nais... son algunhas das temáticas que compoñen os 27 poemas presentados ao II Microconcurso de poesía organizado pola Biblioteca da Escola de Enxeñaría de Telecomunicación. Coa finalidade de variar o formato dos textos, que o ano pasado foron microrrelatos, a organización decidiu apostar esta vez pola poesía, un xénero que tivo “moi boa acollida”, segundo explica Tina Parcero, técnica especialista da biblioteca, que fai fincapé en que a cifra de participantes é sensiblemente superior á da pasada edición, e confía en que siga medrando en futuras convocatorias.
Mércores, 10 de maio do 2017

A presenza do idioma nos medios foi un dos eixos da 'Resaca das Letras' de CCSS e da Comunicación

Unha mañá de debate e celebración para reivindicar o uso do galego en todos os eidos

O filólogo Matías da Torre e o deputado Luís Villares incidiron na importancia do proceso de normalización


ImageO papel que ten o galego nos medios de comunicación e o proceso de normalización lingüística foron dous dos eixos da Resaca das Letras, a iniciativa coa que a Facultade de Ciencias Sociais e da Comunicación celebraba este mércores por adiantado o Día das Letras Galegas. Relatorios, presentacións e actuacións musicais combináronse nunha mañá de debate e celebración que abriu o filólogo e profesor Matías da Torre denunciando que o idioma “está totalmente relegado nos medios de comunicación de masas” e pechou o ex-maxistrado e voceiro de En Marea, Luís Villares, poñendo o acento na importancia das políticas de normalización para garantir unha liberdade lingüística ao seu xuízo afectada pola ausencia dunha "competencia lingüística plena" con conxuto da sociedade e pola existencia de “prexuízos” contra o galego.
Mércores, 10 de maio do 2017

O prazo de inscrición nos cursos de extensión universitaria ábrese o 15 de maio

Sete opcións e 400 prazas para continuar aprendendo durante o verán

Abranguen temáticas que van desde a xestión da empresa familiar ás características das augas minerais


ImageEste mes de maio remata a docencia nas diferentes titulacións pero a actividade formativa na universidade continúa a través de diferentes iniciativas, entre elas os cursos de extensión universitaria, coñecidos como cursos de verán. Desde principios de xuño e ata finais de setembro, o campus de Ourense organiza sete destes cursos, abertos á cidadanía interesada e que teñen como obxectivo fundamental levar a formación en todo tipo de temáticas a públicos e/ou espazos diferentes aos habituais no eido académico. O número de prazas dispoñibles ascende a 400.
Martes, 09 de maio do 2017

A Biblioteca Central organizou en CCSS e da Comunicación un acto conmemorativo do Día das Letras Galegas

Voces, sons e verbas para honrar a Casares

A actividade contou coa estrea do grupo de música tradicional do campus e coa participación do coro


ImageMúsica para Casares é o título da actividade coa que a Biblioteca Central do campus quixo festexar este martes, de xeito adiantado, o Días das Letras Galegas e render homenaxe a Carlos Casares. E a música foi a grande protagonista da conmemoración levada a cabo ás portas de Ciencias Sociais e da Comunicación, grazas ás actuacións do coro e do grupo de música tradicional do campus, que se estreaba nesta actividade. Mais na celebración tampouco faltaron as verbas e as letras de Casares, grazas ás intervencións de sete alumnas do grao en Educación Primaria, que deron lectura a diferentes textos do escritor.
Luns, 08 de maio do 2017

A través do Ciclo que a Vicerreitoría do campus promove co Instituto Francés

O novo cinema francés chega á Casa das Campás

Sete filmes integran a programación que arrinca este venres coa proxección de ‘Mauvais Sang’


ImageDar a coñecer cinema francés actual que non chegou ás salas españolas, “un cinema novo que non esquece o legado da Nouvelle Vague”, legado que os e as cineastas galegos “reformulan de tal maneira que a día de hoxe poidan conectar cos espectadores”. Este é, como sinala a programadora Bárbara Santos, o obxectivo central de O Novo Cinema Francés: Entre a melancolía e a renovación, o ciclo de proxeccións, con entrada libre, que a Vicerreitoría do campus promove para as tardes dos venres, entre este 12 de maio e o 23 de xuño, na Casa das Campás, coa colaboración do Instituto Francés de Cine.
Luns, 08 de maio do 2017

A profesora de Belas Artes Rosa Elvira Caamaño presenta a mostra ‘En busca del ideal’

Corenta e dous exemplos de arte que captura a beleza clásica e natural

A exposición estará aberta ao público ata finais de maio na sede de Afundación


Image“A pintura non é fantasía, é ante todo un oficio manual”, afirma Rosa Elvira Caamaño, artista e profesora de Belas Artes, cuxos cadros estarán expostos durante este mes de maio na sede de Afundación de Vigo. Os traballos presentados nesta exposición, “que vén a ser un resumo de corenta anos de estudo e dedicación”, explica Caamaño, comprenden corenta e dúas obras pintadas nos últimos sete anos. A artista leva “entre colectivas e individuais, máis de cen exposicións” e nesta mostra, En busca del ideal, reflíctese a súa idea de que “non se trata de copiar exactamente o que se ten diante dos ollos, senón de crear e expresar un mundo ideal a partir da beleza”.
Resultados 55 - 60 de 2027

Duvi. Diario da Universidade de Vigo. | Contacta con nós