DUVI. Diario da Universidade de Vigo
Inicio arrow Institucional arrow Campus Ourense

Campus Ourense

Martes, 28 de xuño do 2016

Alumnado da Universidade tamén realizará prácticas externas neste municipio

Investigadores do campus dotarán ao Concello de Barbadás dunha ferramenta para o fomento do emprendemento

No marco dun convenio establecido entre a institución académica e a administración local


ImageNo seu compromiso coa transferencia do coñecemento á sociedade na que se insire, a Universidade de Vigo traballa na posta en marcha de todo tipo iniciativas cos concellos da súa contorna que redunden en beneficio dos cidadáns. No marco desta liña de acción, este martes asinouse no campus de Ourense un convenio de cooperación educativa co Concello de Barbadás e presentouse un proxecto de reposicionamento e promoción económica deste municipio que está a desenvolver un grupo de investigadores e docentes da Facultade de Ciencias Empresariais e Turismo.
Venres, 17 de xuño do 2016

A súa Xunta de Titulación aprobou este venres as normativas e regulamentos precisos

O Grao de Enxeñaría Aeroespacial, listo para recibir aos seus primeiros 50 estudantes o 1 de setembro

Os futuros alumnos e alumnas do centro xa poden coñecer desde os horarios ata a planificación docente


ImageO 1 de setembro de 2016 comezará a súa andaina o novo Grao en Enxeñaría Aeroespacial, que se impartirá no campus de Ourense. Para facelo, este venres a súa Xunta de Titulación reuniuse para aprobar todas as normativas e regulamentos precisos para que este grao, único no mapa de titulacións galego, inicie a súa andaina. Os estudantes que formarán a primeira promoción destes estudos xa poden coñecer desde o calendario de exames ata a planificación docente do primeiro curso. “O grao xa está listo para despegar e para que aterren os seus primeiros alumnos e alumnas en setembro”, destacou Arno Formella, director comisario da Escola de Enxeñaría Aeronáutica e do Espazo que acolle esta titulación.
Mércores, 01 de xuño do 2016

A exposición está organizada co gallo das vodas de prata da Universidade de Vigo

'25 anos máis' chega ao Carballiño no seu percorrido pola provincia

Anteriormente estivo en Ourense, Ribadavia, A Rúa, Verín e Xinzo de Limia


ImageO percorrido da exposición 25 anos máis, organizada pola Universidade de Vigo co gallo do seu 25 aniversario, por diferentes concellos da provincia de Ourense continúa en xuño no Carballiño. A vila acolle desde este mércores a mostra na súa Praza Maior co obxectivo de achegar o campus de Ourense aos seus cidadáns e como recoñecemento ao feito de que deste e dos concellos da provincia procede boa parte do seu alumnado e neles traballan tamén boa parte dos seus egresados e egresadas. A inauguración da exposición na Praza Maior da localidade contou coa participación de Virxilio Rodríguez, vicerreitor do campus de Ourense, e Francisco José Fumega, alcalde do Carballiño.
Martes, 24 de maio do 2016

A décima edición desta feira internacional foi presentada este martes

O Programa de Maiores presentará en Galisénior as vantaxes da formación despois dos 55 anos

Alumnado do campus achegarase a explicar a súa experiencia


ImageOs días 25 e 26 de maio Expourense acollerá a celebración da décima edición de Galisénior, Salón Internacional das Persoas Maiores. A cita convoca un ano máis aos axentes involucrados na mellora da calidade de vida e benestar deste segmento de poboación e un ano máis a o Programa Universitario de Maiores do campus de Ourense volverá a participar nela. Farano principalmente a través dun posto informativo propio e dunha sesión na que se presentarán as características e novidades deste programa e a experiencia nel dalgúns dos seus alumnos e alumnas.
Venres, 13 de maio do 2016

Este venres celebrouse un acto de homenaxe á docente da Universidade de Vigo

Na memoria, Mercedes Durany Castrillo, historiadora

Cando se cumpre o primeiro cabodano do seu falecemento


Image“Como amigos, colegas e alumnos necesitabamos realizar un acto aberto á sociedade que dalgún xeito servise para manifestar en colectividade tanto o aprecio e o respecto que sentimos por ela como a dor pola súa perda. Supoño que no fondo é un intento de asumir esta realidade”. Con estas palabras, Susana Reboreda, decana da Facultade de Historia do campus de Ourense, resumía o sentir das persoas que este venres se deron cita na homenaxe que o centro e o Departamento de Historia, Arte e Xeografía da Universidade de Vigo organizaron en memoria de Mercedes Durany, profesora titular de Historia Medieval falecida o pasado ano.
Mércores, 11 de maio do 2016

O catedrático da Universidade de Vigo será o único español do equipo

Humberto Michinel formará parte da xunta directiva da European Optical Society

A súa elección supón un recoñecemento á súa dilatada traxectoria no eido da fotónica


ImageHumberto Michinel, catedrático de Óptica da Universidade de Vigo, vén de ser elixido para formar parte da próxima xunta directiva da European Optical Society (EOS). Será o único español dunha entidade que agrupa ás sociedades estatais de Óptica da UE e que ten como obxectivo contribuír ao progreso nesta área de coñecemento e promover o seu desenvolvemento tanto no contexto europeo coma no internacional. O seu nomeamento supón un recoñecemento á dilatada traxectoria de Michinel no eido da fotónica. “Ser elixido para a xunta directiva da Sociedade Europea de Óptica, co apoio de diferentes países, non deixa de ser unha boa noticia”, comenta o docente, que é na actualidade vicepresidente da International Commission for Optics. Alén do recoñecemento persoal que supón, Humberto Michinel salienta que a súa elección “supón un apoio ás liñas de traballo en investigación que levamos a cabo desde o campus de Ourense”.
Resultados 49 - 54 de 435

Duvi. Diario da Universidade de Vigo. | Contacta con nós