DUVI. Diario da Universidade de Vigo
Inicio arrow Cultura arrow Campus Pontevedra

Campus Pontevedra

Xoves, 22 de xuño do 2017

O profesor Juan Picos é un do expertos seleccionados nunha iniciativa impulsada por EIP-Agri

A EE Forestal, representada nun grupo de traballo da UE sobre os efectos do cambio climático neste sector

O seu obxectivo é definir un documento cunha serie de claves en materia de adaptación e mitigación


ImageAnalizar os efectos que o cambio climático pode ter nos ecosistemas forestais e os posibles xeitos de combatelos, así como estudar as vías nas que este sector pode contribuír á loita contra o quentamento global son os dous eixos centrais do debate que un grupo de 20 expertos e expertas de 13 países manterán ao longo dun ano tras seren seleccionados pola Dirección Xeral de Agricultura da Comisión Europea co propósito de definir un documento que poida servir como guía en futuras políticas e actuacións. Un grupo de traballo que esta semana celebra a súa primeira reunión en Eslovenia e do que forma parte o investigador da EE Forestal Juan Picos.
Mércores, 21 de xuño do 2017

O centro acolle dous talleres sobre esta técnica, inseridos no programa de cursos de verán da Vicerreitoría

Belas Artes propón un dobre achegamento ao universo da cerámica

Tras un primeiro obradoiro sobre moldes, a actividade desta semana céntrase na produción manual


ImageUn achegamento teórico e práctico a unha disciplina que combina arte e artesanía reúne nestes días a 27 alumnos e alumnas na Facultade de Belas Artes, participantes na segunda edición de Cerámica agora, un dos cursos de extensión universitaria promovidos para este verán pola Vicerreitoría do campus. Iimpartido polo artista Pablo Barreiro, este taller viuse precedido pola primeira edición dun curso de iniciación aos moldes cerámicos, sumando deste xeito o concepto da serie a este dobre achegamento a unhas técnicas que forman parte da historia da humanidade, pero que tamén están presentes na produción artística contemporánea.
Luns, 19 de xuño do 2017

O profesor de BBAA Ignacio Pérez-Jofre comisaría unha exposición de obras xurdidas da reciclaxe

Creacións artísticas que antes foron refugallo nas rúas

Resultado dun taller da asociación Emaús, ‘Reconstrución’ pode verse na Fundación Barrié de Vigo


ImageBolsas de plástico, envoltorios, cabichas, anacos de papeis ou de cristal, táboas ou cartóns, diferentes residuos atopados na rúa convertéronse nos materiais no que un grupo de persoas en risco de exclusión social deron forma, o pasado ano, a unha serie de obras no marco dun taller da Fundación Emaús coordinado polo profesor da Facultade de Belas Artes Ignacio Pérez-Jofre. Obras que agora buscan promover unha reflexión sobre a reciclaxe e a recuperación daquilo que é rexeitado na exposición Reconstrucción, a mostra comisariada por este docente e artista que ata o 17 de setembro pode visitarse na sede da Fundación Barrié en Vigo.
Xoves, 15 de xuño do 2017

O profesor de Belas Artes conformou esta mostra cun cento de fotografías domésticas e anónimas

Xosé Manuel Buxán reúne no CGAC a bañistas do mundo nunha exposición pioneira

Imaxes tomadas en diferentes países entre 1880 e 1963 integran este proxecto artístico


ImageA fotografía atopada ou found photography é unha vía de traballo artístico amplamente desenvolvida no contexto internacional, sustentada en outorgar un novo valor a material fotográfico doméstico e anónimo para construír con el un proxecto expositivo e editorial, pero tamén un eido por explorar no contexto español. De aí que desde o CGAC se destaque o carácter pioneiro de Bañistas, a exposición na que o profesor de Belas Artes Xosé Manuel Buxán reúne un cento de imaxes de homes en traxe de baño, realizadas entre 1880 e 1963, que constitúen a primeira exposición de fotografía atopada no contexto dos centros institucionais de España.
Luns, 12 de xuño do 2017

O festival presentou a programación da súa segunda edición, que terá lugar do 27 de xuño ao 2 de xullo

As creacións do alumnado do campus abrirán Novos Cinemas

O cineasta arxentino Matías Rodríguez, protagonista dunha retrospectiva, impartirá un curso en Belas Artes


ImageDez curtas realizadas polo alumnado do campus, co cineasta Oliver Laxe como guía, que poñen en relación a contorna do Lérez coas persoas que a habitan e transitan, serán exhibidas no Teatro Principal na xornada de apertura de Novos Cinemas, que este luns presentou a programación da súa segunda edición, que se desenvolverá entre o 27 de xuño e o 2 de xullo. Un total de 40 filmes integran a programación dun festival promovido pola produtora Matriuska co apoio da Vicerreitoría do campus, o Concello, a Deputación e a Agadic, e definido pola súa “aposta polo talento emerxente”, como salientou o seu director técnico, Suso Novás.
Martes, 06 de xuño do 2017

O egresado Oscar Vicente, fisioterapeuta do Al-Shabab FC, impartiu unha conferencia no campus

Previndo lesións sobre os terreos de xogo de Arabia Saudita

No seu relatorio, incidiu no grao de especialización do traballo que se desenvolve con futbolistas


ImageTitulado da Facultade de Fisioterapia foi en Mallorca, ata onde Óscar Vicente Rodríguez marchou co propósito de seguir preparándose como triatleta profesional, onde este egresado do campus pontevedrés lle xurdiu a oportunidade de converterse en fisioterapeuta dun club de fútbol de Arabia Saudita. Ata a capital deste país de Oriente Medio marchou hai uns meses, para entrar a formar parte do equipo médico do Al-Shabab, unha experiencia que hoxe debullou na súa antiga facultade, nunha conferencia centrada no papel que xogan estes profesionais na prevención de lesións neste deporte.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 617

Duvi. Diario da Universidade de Vigo. | Contacta con nós