DUVI. Diario da Universidade de Vigo
Inicio arrow Cultura arrow Campus Pontevedra

Campus Pontevedra

Xoves, 20 de abril do 2017

O director de 'Timecode', curta nomeada aos Oscar, participou na Semana da Creatividade e da Innovación

Juanjo Giménez: "Parte da maxia do cine é que non hai fórmulas para que unha película funcione"

Un encontro sobre investigacións multidisciplinares e un relatorio sobre educación oceánica completaron a xornada


ImageAínda que o título da conferencia que na tarde deste xoves ofreceu no Museo de Pontevedra, no marco das actividades da Semana da Creatividade e da Innovación, era Estratexias dun economista para ser nomeado aos Óscar, o primeiro que deixa claro o director e produtor Juanjo Giménez é que “parte da maxia de dedicarse ao mundo do cine é que non hai ningunha fórmula” que garanta o éxito dun determinado traballo. “Cando te dedicas ao cine, o primeiro que aprendes é que non hai regras”, recoñece o cineasta barcelonés, cuxo relatorio viuse precedido pola proxección de Timecode, a curta o pasado mes levábao ata a gala de entrega dos Oscar.
Mércores, 19 de abril do 2017

O certame convidaba ao alumnado de bacharelato a deseñar accións de mellora da súa contorna

Preto de 50 estudantes achegaron os seus proxectos ao Concurso Intercentros da EE Forestal

As e os participantes visitarán o centro este venres para participar na entrega de premios


ImageA construción dun miradoiro de aves, a rehabilitación dun lavadoiro, a recuperación dun monte afectado polos lumes forestais ou a fabricación dun manual con trampas para a avespa velutina son algúns dos doce proxectos, ideados por 48 estudantes de bacharelato de diferentes puntos de Galicia, que este venres optan ao primeiro premio do Concurso Intercentros da Escola de Enxeñaría Forestal. Convidar ao alumnado a deseñar propostas de mellora da súa contorna natural máis próxima é o propósito central dun certame no que o equipo gañador obterá un premio de 1000 euros.
Luns, 17 de abril do 2017

Coa inauguración da exposición ‘Onde pisas?’, que amosa a evolución vivida pola Xunqueira do Lérez

A Semana da Creatividade e da Innovación arrinca ollando cara o pasado

A mostra que percorrerá as diferentes facultades e escolas reúne fotografías desde 1920 á actualidade


ImagePoñer de relevo o valor ambiental do espazo que pisa cada día a comunidade universitaria nas diferentes facultades e escolas que se atopan asentadas no campus da Xunqueira é o propósito central de Onde pisas?, unha exposición que propón un percorrido visual pola evolución vivida por este espazo ao longo do pasado século. Catro paneis con fotografías aéreas que mostran os cambios producidos na Xunqueira do Lérez entre 1920 e a actualidade integran unha mostra itinerante que se insire dentro das actividades do proxecto Green Campus e que serviu este luns para poñer o arranque á conmemoración da Semana da Creatividade e da Innovación.
Venres, 07 de abril do 2017

O luns ábrese a inscrición para as seis actividades que a Vicerreitoría promove entre xuño e setembro

A educación na sociedade dixital, o apego e a danza súmanse aos cursos de verán do campus

Cerámica e ensino con xoguetes interactivos completan un programa aberto á cidadanía


ImageOs retos que para supón para o ensino a sociedade dixital, a importancia do apego e a resiliencia na saúde física e psicolóxica e un achegamento á danza histórica e ao método Laban constitúen as principais novidades da oferta formativa, aberta a toda a cidadanía, que a Vicerreitoría do campus impulsa para este verán. Entre xuño e setembro, o campus acollerá seis cursos de Extensión Universitaria, entre os que tamén figuran novas edicións dos talleres centrados no ensino de ciencias con xoguetes interactivos e de introdución as técnicas cerámicas, ao que se suma á súa vez un segundo curso centrado no traballo con moldes cerámicos.
Luns, 03 de abril do 2017

O grupo Seitura presenta este xoves o seu disco ‘Pontevedra boa vila’ na sede da Vicerreitoría

Coros que forman parte da historia e composicións esquecidas soarán na Casa das Campás

O 20 abril, un trío de fagot, oboe e clarinete interpretará unha serie de composicións pouco coñecidas


ImageDa recuperación das pezas que o coro Aires da Terra, comandado polo gaiteiro e farmacéutico pontevedrés Perfecto Feijóo, rexistrou nun disco de pedra a principios do pasado século á posta en valor dunha serie de pouco coñecidas composicións de cámara contemporáneas, da man dunha pouco usual formación de vento. A través destas dúas propostas a música será protagonista nas vindeiras semanas na Casa das Campás, onde este xoves o grupo Seitura presentará o seu disco Pontevedra boa vila, e onde o 20 de abril o trío de canas Veteris ofrecerá un recital baseado na combinación de fagot, oboe e clarinete.
Mércores, 29 de marzo do 2017

A iniciativa ‘El Pliego’ foi coordinada polas profesoras de BBAA Anne Heyvaert e Ana Soler

Un proxecto internacional de edición gráfica reúne 224 obras chegadas de once países

17 centros participaron na iniciativa coordinada polo grupo DX5, que dará lugar diferentes exposicións


ImageIntervir, a través das múltiples técnicas de edición gráfica que permiten crear unha imaxe múltiple, nas catro caras dunha folla de papel pregada en dous é a proposta que desde o grupo dx5 de Belas Artes propuxeron no proxecto internacional de intercambio, interacción gráfica e edición El Pliego / Le Pli / A Folder. Coordinado polas profesoras Ana Soler e Anne Heyvaert, esta iniciativa reuniu 224 obras procedentes de once países, compiladas agora nun catálogo dixital e nunha serie de libros formados por cadernos que reúnen todas as obras, que servirán como punto de partida ás exposicións que desenvolverán as entidades participantes.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 599

Duvi. Diario da Universidade de Vigo. | Contacta con nós