DUVI. Diario da Universidade de Vigo
Inicio arrow Institucional arrow Campus Pontevedra

Campus Pontevedra

Martes, 26 de xaneiro do 2016

O seu novo equipo decanal mantivo unha primeira xuntanza co reitor, Salustiano Mato

CCSS e da Comunicación aposta polo fortalecemento das titulacións e a renovación de equipamentos

Na reunión, incidiuse tamén na necesidade dun maior recoñecemento do grao en Dirección e Xestión Pública


ImageManter unha primeira toma de contacto coa que iniciar un camiño de colaboración e traballo conxunto foi o propósito da xuntanza que o reitor da Universidade de Vigo, Salustiano Mato, mantivo nesta xornada co novo equipo decanal da Facultade de Ciencias Sociais e da Comunicación, que encabeza o profesor Xosé Baamonde. Unha reunión que serviu para afondar nas necesidades e plans de futuro do centro, entre os que se atopa traballar no “fortalecemento da oferta de títulos”, así como na posibilidade de optar “á consecución de fondos externos” que lle permitan dotarse de novos equipamentos de alto nivel.
Mércores, 20 de xaneiro do 2016

A Casa das Campás acolle a segunda reunión ibérica desta organización internacional

Representantes de FSC en España e Portugal debaten en Pontevedra os novos estándares de certificación forestal

O profesor da EE Forestal Juan Picos é un dos integrantes do comité encargado de adaptar as normativas


ImageA través dun sistema de auditorías que se estende ao longo de toda a cadea de produción, a organización internacional FSC encárgase de certificar que os produtos derivados do sector forestal son froito dunha xestión ambiental e socialmente responsable. Unha certificación que en cada país realízase en base a uns estándares que actualmente están a ser modificados polos diferentes comités nacionais para adaptalos ás novas directrices xerais de FSC Internacional. Para poñer en común o traballo realizado, os comités de España, do que forma parte o profesor Juan Picos, e de Portugal reúnense nesta xornada na Casa das Campás.
Martes, 29 de decembro do 2015

As contas da Universidade foron aprobadas por unanimidade no pleno celebrado na Casa das Campás

O Consello Social dá o visto e prace definitivo ao orzamento para 2016

O reitor destacou o impulso do proxecto CREAS2i como un dos obxectivos do vindeiro exercicio


ImageDespois de que as liñas xerais orzamentarias foran expostas ao Claustro e do seu paso polo Consello de Goberno a pasada semana, o orzamento da Universidade de Vigo para 2016 foi aprobado de xeito definitivo polo pleno do Consello Social, na sesión que desenvolveu este martes na Casa das Campás. Co voto favorable de todos os membros presentes, o orzamento da institución académica para o vindeiro exercicio, que ascende a 160,6 millóns de euros, un 2,79% menos do aprobado para o presente ano, recibiu o “apoio decisivo” deste órgano, como salientou o reitor, Salustiano Mato, ao remate da xuntanza desenvolvida na sede da Vicerreitoría do campus de Pontevedra. Reunión na que o presidente do Consello Social, Ernesto Pedrosa, puña de relevo “o bo estado financeiro” dunha institución académica que pechou con superávit os catro últimos exercicios.
Martes, 22 de decembro do 2015

A través dun convenio polo que a institución provincial destinará 150.000 euros a bolsas para estudantes

Deputación e Universidade fomentan a mobilidade do alumnado con menos recursos

Dirixidas a axudar na realización de estadías internacionais e prácticas ao abeiro do programa Erasmus+


ImageRachar coas barreiras económicas que poidan impedir ao alumnado realizar estadías formativas ao abeiro de programas de mobilidade como Erasmus+. Ese é o propósito do convenio que a presidenta da Deputación de Pontevedra, Carmela Silva, asinou nesta xornada co reitor da Universidade de Vigo, Salustiano Mato, polo que o ente provincial destina 150.000 euros ao financiamento de 150 bolsas de 1000 euros, dirixidas ao alumnado dos campus de Pontevedra e Vigo con menos recursos económicos, co propósito de contribuír a que poidan realizar estadías formativas no marco dos programas Erasmus+ Estudos e Erasmus+ Prácticas.
Venres, 18 de decembro do 2015

Silva e Mato destacan que o acordo contribuirá ao desenvolvemento económico e social

Universidade e Deputación de Pontevedra asinan por primeira vez un protocolo de colaboración a catro anos

En dúas semanas constituiríase unha comisión mixta, que elaborará a folla de ruta desta cooperación


ImageA presidenta da Deputación de Pontevedra, Carmela Silva, e o reitor da Universidade de Vigo, Salustiano Mato, asinaron hoxe o primeiro protocolo de colaboración institucional que define o marco de relación entre ambos organismos para os próximos catro anos. Mediante este protocolo, as dúas entidades promoverán a cooperación para o desenvolvemento científico e tecnolóxico, procurando unha aplicación práctica do coñecemento en proveito da sociedade. O impulso dos proxectos de especialización CREA S2i, no campus de Pontevedra, e Vigo Tecnolóxico, a promoción do emprego e o emprendemento xuvenil ou a colaboración en actividades de captación do alumnado con mellor traxectoria académica son algúns dos eixos do primeiro acordo marco de colaboración para un período de catro anos que a Deputación subscribe coa Universidade.
Xoves, 17 de decembro do 2015

A Xunta de Goberno do ente provincial aprobou o convenio que asinará coa Universidade

A Deputación impulsará con 150.000 euros a mobilidade do alumnado

Dirixidos ao estudantado de Vigo e Pontevedra que realice estudos e prácticas no marco do programa Erasmus+


Image Favorecer a mobilidade do alumnado dos campus de Vigo e Pontevedra, así como impulsar e promover o acceso ao mercado laboral e a formación íntegra do alumnado universitario son os dous obxectivos do convenio polo que a Deputación Provincial achegará 150.000 euros á Universidade de Vigo, destinados a que ao alumnado poida realizar estudos ou prácticas formativas en Europa, no marco do programa Erasmus+. Concretamente, trátase de 150 bolsas de 1000 euros que serán asignadas segundo a nota media do expediente académico, entre os alumnos e alumnas destes dous campus seleccionados neste programa.
Resultados 55 - 60 de 388

Duvi. Diario da Universidade de Vigo. | Contacta con nós