DUVI. Diario da Universidade de Vigo
Inicio arrow Institucional arrow Campus Pontevedra

Campus Pontevedra

Martes, 19 de xullo do 2016

Salustiano Mato e Juan Manuel Corbacho reuníronse este martes co equipo directivo da escola

Enxeñaría Forestal, primeiro centro do campus con selo Q de Calidade

O reitor reafirma o “relevante papel” da EEF no doutoramento do Campus Crea e na Área de Transferencia


ImageA Escola de Enxeñaría Forestal acaba de converterse no primeiro centro do campus de Pontevedra en conseguir o selo Q de Calidade, un distintivo co que a Universidade premia a aqueles centros que demostraron, de xeito voluntario e ante avaliadores independentes, a súa aposta e compromiso coa excelencia. O reitor, Salustiano Mato, e o vicerreitor, Juan Manuel Corbacho, reuníronse este martes na sede da vicerreitoría do campus co equipo directivo da escola e cos responsables da Área de apoio á docencia e calidade, xuntanza na que trataron numerosas cuestións relativas ao futuro da escola.
Venres, 15 de xullo do 2016

Este xoves celebrouse o seu acto de nomeamento como académicos correspondentes

Martinho Montero Santalha e Isaac Alonso Estraviz, novos representantes de Galicia na Academia das Ciências de Lisboa

A entidade fundada en 1779 é unha das institucións científicas máis antigas


ImageDesde este xoves, a Academia das Ciências de Lisboa, unha das institucións científicas máis antigas, fundada en 1779, conta con tres novos académicos correspondentes galegos. Trátase de Martinho Montero Santalha, Isaac Alonso Estraviz e Ângelo Cristovão, os dous primeiros docentes da Universidade de Vigo. O seu acto de toma de posesión celebrouse en Lisboa nunha sesión especial sobre A Língua Portuguesa na Galiza na que a lusofonía foi a grande protagonista. Eles serán os encargados de dar continuidade á representación galega na institución, anteriormente ostentada polos profesores Ricardo Carvalho Calero e Ernesto Guerra da Cal.
Luns, 27 de xuño do 2016

O Consello de Campus deu o seu apoio á memoria do título que se prevé implantar no curso 2017/2018

Máis de 100 investigadores participarán no programa de doutoramento do CREA S2i

O que será o primeiro produto académico do proxecto de especialización busca promover investigacións interdisciplinares


ImageCon seis liñas de investigación, que vinculan a innovación cos eidos da saúde, o deseño, a comunicación, os recursos naturais, a gobernanza e a docencia; e coa participación dun total de 111 investigadores e investigadoras, preto dun 20% pertencentes a outras universidades e centros de investigación, o programa de doutoramento do proxecto de especialización CREA S2i deu nesta xornada un novo paso cara a súa implantación no curso 2017/2018. Na sesión celebrada esta mañá na Casa das Campás, o Consello de Campus deu o seu apoio unánime á memoria do que será “o primeiro produto académico” deste proxecto de especialización.
Xoves, 23 de xuño do 2016

Coa certificación á súa implantación que vén de outorgarlle a ACSUG

A EE Forestal ve recoñecido o seu sistema de garantía de calidade

Convértese no primeiro centro do campus en obter este recoñecemeto


ImageA implicación do seu equipo directivo e da súa Comisión de Garantía de Calidade co funcionamento do centro, a presenza nesta comisión de egresados e representantes do mundo empresarial, a proximidade de trato entre profesorado, alumnado e PAS ou o bo funcionamento da coordinación horizontal e vertical. Estas son algunhas das fortalezas da EE Forestal recoñecidas pola comisión avaliadora da ACSUG, que vén de outorgar a este centro do campus pontevedrés a certificación á implantación do seu sistema de garantía interna de calidade, a primeira que se concede a un centro do campus de Pontevedra.
Martes, 07 de xuño do 2016

Ante a ausencia de candidaturas para relevar a Eva María Lantarón á fronte da dirección do centro

Gustavo Rodríguez, nomeado novo decano en funcións de Fisioterapia

Preparar o curso 2016/2017, primeiro obxectivo do equipo que completan Iris Machado e Lourdes Maceiras


ImageDespois de que o proceso electoral aberto na Facultade de Fisioterapia no mes de abril co propósito de elixir novo decano ou decana se pechase sen que se presentasen candidaturas, o profesor do Departamento de Bioloxía Funcional e Ciencias da Saúde Gustavo Rodríguez vén de ser nomeado polo reitor novo decano en funcións deste centro. Á fronte dun equipo que completan as docentes Iris Machado como vicedecana e Lourdes Maceiras como secretaria académica, Rodríguez Fuentes toma o relevo de Eva María Lantarón na dirección desta facultade, co primeiro obxectivo de completar os preparativos para o curso académico 2016-2017.
Mércores, 01 de xuño do 2016

A terceira edición deste evento desenvolverase na Praza de España entre o 22 e o 24 de setembro

O Pont-Up Store converterá Pontevedra na capital do emprendemento

Ata o 30 de xuño poden presentarse candidaturas para ocupar un dos 36 postos dispoñibles na carpa


ImageAxudar aos novos e novas emprendedores no inicio da súa traxectoria empresarial e contribuír a espallar a “cultura emprendedora” entre a sociedade son, como salienta o profesor Pedro Figueroa os dous obxectivos principais do Pont-Up Store, o evento que o vindeiro mes de setembro tratará de converter a Pontevedra “na capital do emprendemento creativo”. Así o salientou o reitor da Universidade de Vigo, Salustiano Mato, na presentación da terceira edición deste espazo de emprendemento, que mantén aberto o prazo de presentación de candidaturas para todas aquelas iniciativas empresariais con menos de tres anos e medio de traxectoria que queiran dar a coñecer os seus produtos e servizos no evento, con tres modalidades de participación gratuítas, que se desenvolverá entre o 22 e o 24 de setembro na Praza de España.
Resultados 55 - 60 de 416

Duvi. Diario da Universidade de Vigo. | Contacta con nós