DUVI. Diario da Universidade de Vigo
Inicio arrow Institucional arrow Campus Vigo

Campus Vigo

Venres, 07 de abril do 2017

Coa participación de responsables do Technion Haifa de Israel e do Rockefeller Philanthropy

As Xornadas de fundraising para a promoción do mecenado universitario apostan pola internacionalización na súa 4ª edición

A obra social, a marca pública universitaria e as redes sociais, abordaranse nas sesións o 4 e 5 de maio


Image As IV Xornadas de fundraising para a promoción do mecenado universitario, organizadas desde a Reitoría da Universidade de Vigo, coa colaboración do seu Consello Social e a participación da Conferencia de Consellos Sociales, desenvolveranse os vindeiros 4 e 5 de maio, cun clara aposta pola internacionalización e cun programa no que se abordarán, a través de relatorios e obradoiros, cuestións como a obra social, a marca pública universitaria, as redes sociais, o libro branco sobre mecenado universitario e os observatorios de antigos alumnos. As xornadas, cuxa inscrición é gratuita, celebraranse na sede da Fundación Barrié en Vigo.
Xoves, 06 de abril do 2017

Emilab está impulsado pola Vicerreitoría de Estudantes e o Centro de Linguas

Un repositorio virtual ofrece ao profesorado recursos e materiais de apoio para a docencia en inglés

Inclúe manuais, dicionarios, cursos de pronunciación, exercicios e un servizo de consulta


ImageNeste curso 2016-2017 a Universidade de Vigo oferta 127 materias de grao e 90 de mestrado que se poden cursar en inglés nas diferentes titulacións, así como a posibilidade de completar un cuadrimestre enteiro en inglés en varios centros. Esta aposta pola internacionalización e polo plurilingüismo da institución precisa da implicación do persoal docente e, para facilitarlles a tarefa de impartir as clases nunha lingua estranxeira, a Vicerreitoría de Estudantes en colaboración co Centro de Linguas acaba de poñer en marcha Emilab, unha plataforma web de apoio á docencia e redacción de artigos en inglés.
Martes, 04 de abril do 2017

Mato tamén defendeu o papel de fornecedor da universidade nos centros tecnolóxicos

O reitor traslada á directora de Gain os detalles do proceso de especialización dos tres campus

Patricia Argerey coincide na necesidade dunha “especialización real” e aposta pola transferencia


Image Nas súa primeira visita á Universidade de Vigo trala súa toma de posesión o pasado mes de decembro como directora da Axencia Galega de Innovación, Patricia Argerey coñeceu esta mañá da man do reitor, Salustiano Mato, o proceso de especialización que se está a desenvolver en cada un dos tres campus da institución viguesa a través do Vigo Tecnolóxico e os campus da Auga e Crea, en Ourense e Pontevedra, respectivamente. Mato tamén aproveitou a visita de Argerey para defender o papel de “fornecedores e mantedores” que realiza a Universidade cos centros tecnolóxicos e que, non obstante, non está a recibir, segundo o reitor, o recoñecemento que Mato considera que debera ter.
Luns, 03 de abril do 2017

Salustiano Mato e Beatriz Mato reuníronse para avanzar as liñas de traballo conxunto

Universidade e Consellería de Medio Ambiente sentan as bases para colaborar a prol dunha Galicia máis sostible

Economía circular, cambio climático e mellora do ciclo da auga, entre as áreas de actuación previstas


Image Co obxectivo de facer efectiva a transferencia de coñecemento que se xera na Universidade de Vigo en cuestións relacionadas co medio ambiente, o reitor Salustiano Mato e conselleira de Medio Ambiente e Ordenación do Territorio, Beatriz Mato, mantiveron este luns no campus de Vigo a súa primeira xuntanza institucional que, segundo avanzou a titular de Medio Ambiente do Goberno galego, permitiría asinar un convenio marco de colaboración, que posteriormente se traduciría en acordos específicos en catro temas concretos, como son a economía circular, o cambio climático, o empoderamento dos ríos e a mellora do ciclo integral da auga. “Trátase de sistematizar dun xeito máis intenso e máis ordenado e se cabe máis ambicioso, a colaboración coa Consellería”, sinalou Mato, que agradeceu a visita ao campus de Vigo da conselleira.
Mércores, 29 de marzo do 2017

No transcurso da súa primeira visita oficial á Universidade cifrou en oito millóns o investimento previsto

Núñez Feijóo ratifica o “compromiso inalterable” da Xunta co desenvolvemento de Campus do Mar na ETEA

O titular do executivo galego gabou a “solvencia e capacidade de multiplicar recursos” da institución académica


Image “O compromiso do goberno galego será inalterable con este proxecto. Porque o temos acordado, porque o temos pactado, porque imos cumprilo e porque somos conscientes de que é un proxecto que temos que materializar con urxencia”. Nestes termos referiuse ao desenvolvemento do proxecto de Campus do Mar en terreos da ETEA o presidente da Xunta, Alberto Núñez Feijóo, na súa primeira visita institucional á Universidade de Vigo, onde se reuniu co reitor, Salustiano Mato, e co seu equipo de goberno, así como coas comisionadas e comisionados da institución académica. Na súa comparecencia ante os medios de comunicación, o titular do Goberno galego detallou o investimento que se destinará ao desenvolvemento do proxecto e que cifrou en oito millóns de euros, “entre os fondos da Xunta de Galicia e de Zona Franca”, uns fondos que, non obstante, lembrou Feijóo, precisan que haxa un desbloqueo previo das instalacións de Campus do Mar na ETEA para poder ser aplicados.
Venres, 24 de marzo do 2017

Celebrarase no campus do 25 ao 27 de maio

Un congreso reunirá en Vigo a responsables de protocolo e relacións institucionais das universidades españolas e portuguesas

Debaterán sobre a transformación e os retos desta disciplina para adaptala ao contexto do século XXI


ImageAs e os responsables de protocolo e relacións institucionais das universidades españolas e portuguesas reuniranse no campus de Vigo entre o 25 e o 27 de maio para debater sobre a necesaria transformación da disciplina para adaptarse ás novas tecnoloxías ou ás redes sociais, conciliando conceptos como imaxe, márketing, relacións públicas, linguaxe, publicidade e comunicación. A xuntanza celebrarase no marco do XVI encontro estatal e o VIII hispano-luso, que por primeira vez teñen como sede unha universidade galega, como explican as organizadoras, Carmen Estévez, xefa da Secretaría do Equipo de Goberno e Ángeles Casal, xefa de Negociado da Secretaría Xeral.
Resultados 37 - 42 de 1408

Duvi. Diario da Universidade de Vigo. | Contacta con nós