DUVI. Diario da Universidade de Vigo
Inicio arrow Institucional arrow Campus Vigo

Campus Vigo

Xoves, 09 de febreiro do 2017

Os equipos de goberno de ambas as dúas institucións reuníronse hoxe no campus de Ponferrada

As universidades de Vigo e León reforzan a súa colaboración en I+D, financiamento internacional e cooperación territorial

Salustiano Mato asegura que "o que temos que facer é sumar e complementarnos"


Image Fortalecer o traballo conxunto en I+D; identificar oportunidades de financiamento internacional e afianzar a cooperación interterritorial académica e institucional. Con este triplo obxectivo traballarán as universidades de Vigo e León, cuxos equipos de goberno celebraron hoxe no campus de Ponferrada da Universidade de León o primeiro encontro bilateral entre ambas as dúas institucións. Finalizadas as catro mesas de traballo arredor das que hoxe se desenvolveu o traballo dos equipos reitorais nos ámbitos das sinerxías en materia de investigación e organización académica; a especialización dos campus; a proxección cidadá e a xestión e organización universitaria, ambos os dous reitores coincidiron en sinalar a importancia desta alianza. O reitor da Universidade de Vigo, Salustiano Mato, asegurou que “o que temos que facer é sumar e complementarnos".
Mércores, 08 de febreiro do 2017

O Cimpa céntrase na promoción das matemáticas en países en desenvolvemento

O Centro Internacional de Matemáticas Puras e Aplicadas nomea secretario xeral ao investigador Iván Area

O docente tamén colabora co African Institute for Mathematical Sciences


Image Sete meses despois da súa incorporación ao consello de administración, o docente e investigador do Departamento de Matemática Aplicada II da Universidade de Vigo Iván Area vén de ser nomeado secretario xeral do Centro Internacional de Matemáticas Puras e Aplicadas, Cimpa, centro de categoría 2 da Unesco con base en Niza, financiado por Francia, Noruega Suiza e España. A promoción das matemáticas en países en desenvolvemento a través da organización de distintas actividades é o principal cometido do Cimpa, que a finais de xaneiro celebrou en Niza a reunión anual do Comité de Orientación e Pilotaxe.
Martes, 07 de febreiro do 2017

Realizouse unha declaración de apoio á participación do alumnado no Consello Galego de Universidades

O Consello de Goberno aproba os criterios de elaboración da programación docente anual para o vindeiro curso

Mato confirmou que se traballa na elaboración de propostas de interese para implantar novos títulos


Image Os criterios de elaboración da programación docente anual para o curso 2017-2018 recibiron hoxe o visto e prace da maioría dos membros do Consello de Goberno, reunidos nunha sesión ordinaria na que, entre outros asuntos, tamén se deu luz verde á aprobación da convocatoria de concesión de anos sabáticos para o vindeiro curso e aos seus criterios de puntuación; á modificación do Regulamento de estudos de doutoramento e aos prezos mensuais para o vindeiro curso nos complexos residenciais O Castro de Vigo, As Burgas de Ourense e no complexo residencial Alcai de Allariz. Noutro dos puntos da orde do día, o reitor da Universidade de Vigo, Salustiano Mato, deu lectura a unha declaración institucional de apoio á participación do estudantado no Consello Galego de Universidades, onde na actualidade carecen de representación.
Martes, 07 de febreiro do 2017

O cambio de denominación foi publicado este martes no DOG

A ETS de Enxeñaría de Minas pasa a denominarse Escola de Enxeñaría de Minas e Enerxía

A directora salienta que "o novo nome visibiliza moito mellor os actuais estudos que se imparten neste do centro”


ImageTras superar todos os trámites administrativos necesarios, o Diario Oficial de Galicia publicou este martes a modificación de denominación da Escola Técnica Superior de Enxeñaría de Minas polo de Escola de Enxeñaría de Minas e Enerxía, un cambio que levaban meses agardando no centro e que foi recibido con gran satisfacción por parte dos seus responsables, que fixeron fincapé en que a nova denominación reflicte mellor a realidade dunha escola na que, desde o curso 2010/2011, cos cambios derivados da implantación do Espazo Europeo da Educación Superior, se imparten os graos en Enxeñaría da Enerxía e Enxeñaría dos Recursos Mineiros e Enerxéticos.
Venres, 03 de febreiro do 2017

O Comité Executivo do Consorcio procederá a súa aprobación o vindeiro luns

Universidade e Zona Franca crean a Cátedra Ardán

Permitirá acadar un maior coñecemento dos mecanismos que favorecen o avance das empresas galegas


Image O reitor da Universidade de Vigo e a delegada do Consorcio da Zona Franca ultimaron hoxe os derradeiros aspectos da nova Cátedra Ardán, que trala súa aprobación, comezará funcionar este ano. A cátedra, que nace froito da colaboración que manteñen ambas as dúas institucións para ofrecer anualmente o informe económico e de competitividade sobre a empresa galega, será levada para a súa aprobación ao Comité Executivo do Consorcio que se reunirá o vindeiro luns. A creación da cátedra permitirá reforzar as capacidades do servizo de información económica Ardán, para contribuír de xeito máis eficiente á creación de riqueza en Galicia a través do estudo e investigación da evolución económica e dos factores que determinan a competitividade de territorios e empresas.
Venres, 03 de febreiro do 2017

O curso pasado acadouse un récord con 92 mobilidades internacionais

Preto de 950 docentes da Universidade participaron desde o curso 2001-2002 no programa Erasmus+

Portugal e Italia son os países preferidos polo profesorado para as súas estadías


ImageA mobilidade internacional non é patrimonio exclusivo do alumnado universitario e aínda que é o estudantado o que máis participa en programas de intercambio como o Erasmus+, a presenza do profesorado é cada vez maior. Así se confirma no caso da Universidade de Vigo, onde desde o curso 2001-2002 ao pasado 2015-2016 foron 934 as e os docentes que participaron no programa Eramus+, que financia estadías dun mínimo de dous días e dun máximo de cinco nos países cos que a institución académica viguesa ten asinados convenios. Dos 24 docentes do curso 2001-2002 pasouse no 2015-2016 a 92, a cifra máis elevada nos 15 últimos cursos.
Resultados 55 - 60 de 1408

Duvi. Diario da Universidade de Vigo. | Contacta con nós