DUVI. Diario da Universidade de Vigo
Inicio arrow Investigación arrow Campus Pontevedra

Campus Pontevedra

Xoves, 19 de outubro do 2017

A Rede RIES desenvolve en CC da Educación e do Deporte unha xornada sobre transferencia

Na procura de canles para levar a investigación educativa á sociedade

O seu obxectivo é achegar a investigadores a unha serie de ferramentas para divulgar os seus traballos


ImageIntegrada por sete grupos de investigación, que teñen como nexo común o traballo no eido da inclusión social, a Rede RIES realizou un estudo bibliométrico sobre a investigación educativa feita en Galicia entre 2012 e 2014. Unha das principais conclusións daquel traballo foi, como salienta a súa coordinadora, María del Mar Lorenzo, “que os investigadores tiñamos que facer un maior esforzo por difundir o noso traballo dunha forma moito máis axeitada”. Achegarlles diferentes ferramentas e dinámicas para divulgar os seus traballos é o principal obxectivo das Xornadas de Investigación que este xoves se desenvolven no campus.
Martes, 17 de outubro do 2017

O profesor asociado Manuel Isorna é o promotor do evento que terá lugar os días 24 e 25 de novembro

O congreso internacional sobre cannabis agarda reunir en Catoira máis de 400 persoas

O seu obxectivo é abordar esta droga desde a perspectiva sanitaria, legal e educativa


ImageOs datos do Observatorio Español sobre Drogas sitúan no 33% a porcentaxe de estudantes de entre 14 e 18 anos que afirman ter consumido cando menos unha vez cannabis, a substancia ilícita máis consumida por adolescentes no mundo e o eixo do congreso internacional que en novembro reunirá en Catoira a preto de 40 especialistas e profesionais dos ámbitos da medicina, a psicoloxía clínica e as ciencias da saúde. Promovido polo profesor asociado da Universidade e técnico do Concello de Catoira Manuel Isorna, o I Congreso Internacional sobre o cannabis e os seus derivados agarda reunir no auditorio desta localidade a máis de 400 persoas.
Mércores, 11 de outubro do 2017

Ciencias da Educación e do Deporte acolle o vindeiro xoves unhas xornadas da Rede RIES

Unha rede sobre inmigración afondará no campus na importancia de achegar a investigación á sociedade

Con inscrición gratuíta, o curso está dirixido a analizar recursos para dar a coñecer traballos científicos


Image“Unha das tarefas máis importantes dun investigador é a divulgación do coñecemento científico, dada a importancia deste para a vida das persoas”, salienta a profesora da Facultade de Ciencias da Educación e do Deporte Margarita Pino, coordinadora das xornadas que, o vindeiro xoves 19, reunirán nesta facultade a investigadores e investigadoras das tres universidades galegas. A Rede de Inmigración, Educación e Sociedade (RIES) abordará nesta xornada os diferentes recursos e ferramentas que os investigadores e investigadoras teñen á súa disposición para facer chegar os seus traballos á sociedade.
Xoves, 05 de outubro do 2017

Vigo é unha das universidades participantes en ‘Lapassion’, iniciativa coordinada polo Politécnico do Porto

O Campus CREA S2i internacionalízase cun proxecto que conecta 15 institucións europeas e americanas

Financiado cun millón de euros no programa Erasmus+, promove a mobilidade de docentes e estudantes


ImageA Universidade de Vigo é unha das 15 institucións de Europa e América Latina que forman parte do proxecto europeo Lapassion, que coordina o Instituto Politécnico do Porto e que busca identificar e promover, a ambos lados do Atlántico, boas prácticas docentes vinculadas con proxectos multidisciplinares e de colaboración desenvolvidos polo alumnado nos eidos da creatividade e da innovación social. Dúas liñas de traballo que constitúen o “corazón conceptual” do proxecto de especialización CREA S2i e que motivan que o campus pontevedrés participe de maneira significativa neste proxecto financiado con preto dun millón de euros polo programa europeo Erasmus +. Ao longo dos próximos tres anos, Lapassion promoverá a mobilidade de docentes, que contribuirán á formar a investigadores da América Latina nestes eidos, así como estadías de estudantes nas once institucións americanas participantes.
Martes, 03 de outubro do 2017

O Centro Universitario da Defensa acolle un simposio europeo enmarcado no congreso Tecniacústica

Preto de 70 especialistas e profesionais debaten en Marín sobre os últimos avances en acústica submarina

A Escola Naval celebrou tamén nesta xornada o acto oficial de inicio de curso, coa presenza do xefe do Estado Maior


ImageDas prestacións dos sónar aos efectos que teñen nos animais mariños os ruídos que xeran barcos ou portos, afondar nos últimos avances e liñas de investigación arredor dos múltiples ámbitos de traballo que abrangue a acústica submarina é o propósito do simposio europeo que este martes reúne a preto de 70 especialistas e profesionais na Escola Naval Militar. O Centro Universitario da Defensa, adscrito á Universidade, exerce por primeira vez como sede dunha das actividades satélite de Tecniacústica, o congreso organizado polas sociedades española e portuguesa de acústica, que a partir deste mércores se desenvolve na Univerisdade da Coruña. “Para nós é mo importante que o profesorado do ámbito das telecomunicacións ou da enxeñaría mecánica se poña en contacto con empresas e investigadores deste ámbito, xa que isto crea sinerxías”, salienta o investigador do CUD, Javier Rodríguez.
Martes, 26 de setembro do 2017

O ente presentou na escola o seu premio á innovación neste sector

A Cámara de Comercio convida ao alumnado da EE Forestal a desenvolver proxectos innovadores

O prazo de presentación de propostas permanece aberto ata o 16 de outubro


ImagePotenciar o sector forestal e a súa capacidade de innovación é o propósito co que a Cámara de Comercio de Pontevedra, Vigo e Vilagarcía de Arousa impulsou, a través da súa mesa forestal, da que forma parte a EE Forestal e no marco do Plan Social de Ence, o premio ao proxecto innovador forestal, dotado cun galardón de 5000 euros e un accésit de 2000 euros. Co propósito de dalo a coñecer entre o alumnado e animalo a emprender e innovar, o vicepresidente primeiro da Cámara, Eduardo Barros, presentou nesta xornada esta iniciativa no centro, acompañado polo director da escola, Juan Picos, e o director territorial de Ence, Ence Antonio Casal.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 78

Duvi. Diario da Universidade de Vigo. | Contacta con nós