DUVI. Diario da Universidade de Vigo
Xoves, 10 de decembro do 2015

Todos os galardóns desta 15 edición recaeron en estudantes da Universidade de Vigo

O Concurso de Proxectos Tecnolóxicos premia un videoxogo para zurdos e un sistema de detección de trastornos

O acto de entrega celebrouse este xoves na Escola Superior de Enxeñaría Informática


ImageUn videoxogo para zurdos e un sistema de detección de trastornos neurometabólicos acadaron este xoves os primeiros premios na 15ª edición do Concurso de Proxectos Tecnolóxicos que organiza Expourense e a Escola Superior de Enxeñaría Informática do campus de Ourense. O certame, que premia os mellores traballos fin de grao e de mestrado do alumnado das universidades galegas e do Norte de Portugal que cursen titulacións da área de tecnoloxías da información e as comunicacións, outorgou todos os seus galardóns a estudantes da Universidade de Vigo.

Duvi | Ourense
Un videoxogo para zurdos e un sistema de detección de trastornos neurometabólicos acadaron este xoves os primeiros premios na 15ª edición do Concurso de Proxectos Tecnolóxicos que organiza Expourense e a Escola Superior de Enxeñaría Informática do campus de Ourense. O certame, que premia os mellores traballos fin de grao e de mestrado do alumnado das universidades galegas e do Norte de Portugal que cursen titulacións da área de tecnoloxías da información e as comunicacións, outorgou todos os seus galardóns a estudantes da Universidade de Vigo.

O acto de entrega dos galardóns celebrouse no campus de Ourense nun acto que contou coa participación de Ana Garriga, directora da Escola Superior de Enxeñaría Informática; Emma González, directora adxunta de Expourense, e Rosendo Fernández, vicepresidente da Deputación Provincial de Ourense. Todos eles coincidiron en destacar a importancia do obxectivo desta iniciativa, que é vincular as actividades de I+D+i da universidade no terreo da informática e as telecomunicacións co mundo empresarial, sensibilizando ás empresas sobre o que lles pode achegar a aplicación da innovación e a investigación para o aumento da produtividade e da competitividade e estimulando a capacidade innovadora dos estudantes para desenvolver proxectos cunha visión empresarial.

Premios das diferentes modalidades

O primeiro premio da Modalidade A recaeu no traballo Rock Bird, de Iván Trigos, alumno do Máster en Enxeñaría Informática, da Escola Superior de Enxeñaría Informática de Ourense. O seu traballo consistiu na preparación e elaboración dun videoxogo adaptado ao sistema operativo. Trátase dun xogo que promete a máxima diversión sen un grande esforzo mental a través das aventuras dun intrépido paxaro. Unha das principais novidades que ofrece é a posibilidade de adaptar a pantalla para xogadores zurdos. Esta aplicación estará dispoñible proximamente para descarga gratuíta na Play Store de Android.

Na Modalidade B o primeiro premio foi para o traballo Sistema para a detección de grandes insercións e eliminacións xenética e axuda ao diagnóstico de trastornos neurometabólicos, de Nuria Canle, do grao en Enxeñaría Informática do campus de Ourense. Trátase dunha ferramenta deseñada para servir de axuda nas análises xenómicas, para axilizar o traballo dos xenetistas e para axudar a diagnosticar máis rapidamente trastornos como o autismo ou o cancro. O segundo premio foi para Nicolás Vila, do Grupo MILE, polo proxecto GVarvi, un software de adquisición de sinais de frecuencia cardíaca en resposta a estímulos audiovisual, e o accésit para Santiago Iglesias, do Grupo LIA2, polo proxecto Software para o recoñecemento de características de nanotubos.

Ademais, e como unha das novidades desta edición, a Deputación de Ourense entregou o premio Provincia Intelixente, que recaeu en Nicolás Ladero polo traballo Deseño, implantación e validación dun sistema de recoñecemento de fontes sonoras sobre un SBC. Por último, o premio para o proxecto con máis seguidores en Facebook foi para Nicolás Vila. Nesta 15ª edición repartíronse un total 1400 euros en premios.
< Ant.   Seg. >

Duvi. Diario da Universidade de Vigo. | Contacta con nós