DUVI. Diario da Universidade de Vigo
Inicio arrow Campus de Pontevedra
Mércores, 07 de decembro do 2016

Mercedes Varela estudou na súa tese como potenciar a formación dos futuros docentes nesta materia

Un mundo sostible precisa dunha educación ambiental transformadora

O estudo de actitudes realizado permitiu detectar “tendencias acríticas” entre o futuro profesorado


Image“Temos feito grandes avances na conciencia social dos problemas ambientais, pero pouco na consecución de formas de vida sostibles”, sostén a investigadora da Facultade de Ciencias da Educación e do Deporte Mercedes Varela. Mudar esta situación, explica, pasa por potenciar unha “educación ambiental de carácter transformador”, definida polo seu enfoque transversal e o fomento “da participación, da reflexión e do pensamento crítico”. Estudar como desenvolver unha educación ambiental que proporcione ao alumnado esa “competencia para acción” a prol dun desenvolvemento sostible constituíu o obxectivo central da tese de doutoramento de Varela Losada, que a través das enquisas realizadas a estudantes de Educación Infantil e Educación Primaria constatou unha “importante tendencia” do futuro profesorado a contemplar a educación ambiental como “un tema pouco prioritario”.
Luns, 05 de decembro do 2016

A través da actividade, ‘Con outros ollos’, organizada pola profesora María Luisa Rodicio e a Comisión Unesco

O alumnado de Ciencias da Educación e do Deporte achégase ao día a día das persoas invidentes


Image Da man de María Casalderrey e da súa cadela guía Onara, os alumnos e alumnas de Ciencias da Educación e do Deporte puideron coñecer as dificultades e obstáculos ás que teñen que enfrontarse ás persoas invidentes no seu día a día, nunha actividade promovida pola profesora María Luisa Rodicio e a Comisión PEA-Unesco e impulsada polas estudantes Pilar Wibbelink, Lucía Seoane e Raquel Pérez. Unha actividade que levou ao estudantado a poñerse na pel das persoas con problemas de visión. Primeiro, tentando sortear os obstáculos colocados no propio salón de graos cos ollos vendados e un bastón, e despois acompañados por esta cadela guía.
Luns, 05 de decembro do 2016

O pianista Josep Colom ofrece este mércores un concerto no Teatro Principal, promovido pola Vicerreitoría

Música e camelias entrelázanse nun diálogo entre Mozart e Chopin

Este recital con entrada libre complétase cunha videocreación realizada con fotografías de Juan de la Sota


ImageUn diálogo imaxinario entre Mozart e Chopin, no que o pianista Josep Colom enlaza unha serie de pezas destes dous compositores, completado á súa vez pola conversa que a música establece coa videocreación elaborada por Álvaro Mayo e Inés Salvado a partires dunha serie de fotografías de camelias realizadas por Juan de la Sota. Esta é a dobre conversa que se fusiona no concerto que este pianista, Premio Nacional de Música en 1998, ofrecerá este mércores a partires das 20.30 horas no Teatro Principal, nunha actividade promovida pola Vicerreitoría , coa colaboración do Concello que conta con entrada libre ata completar aforo.
Venres, 02 de decembro do 2016

O Casal de Ferreirós acolle ata o 19 de decembro a exposición 'Arte Natura'

O alumnado de BBAA achega a Poio tres visións opostas da natureza

Comisariada por Sonia Area e Federico Catania, reúne ilustracións de Ester Iglesias, Abi Castilo e Lucía Ferreirós


Image“Optamos por centrar a nosa exposición na natureza, xa que esta nos une de forma universal a todos e consideramos que o artista non pode vivir de costas ao mundo que lle rodea”, salientan Sonia Area e Federico Hugo Catania, os dous alumnos de Belas Artes que impulsaron Arte Natura, a exposición este mediodía inauguraron no Casal de Ferreirós de Poio. Nacida como un proxecto para a materia Xestión, Ámbito Artístico e Mundo Profesional, que imparte Xosé Manuel Buxán, esta exposición reúne as ilustracións das egresadas da Ester Iglesias e Lucía Ferreirós e da alumna Abi Castillo, que achegan tres visións “contrapostas do mundo e da vida mesma”.
Venres, 02 de decembro do 2016

Docentes da Universidad Hermilio Valdizán mantiveron unha serie de encontros de traballo nesta facultade

Profesorado peruano achégase ao traballo en materia de calidade de Ciencias da Educación e do Deporte

Escolleron o centro do campus tras seren seleccionados nun programa promovido polo goberno de Perú


ImageContribuír á mellora dos procesos de calidade das institucións educativas peruanas é o obxectivo do programa Camino hacia la exelencia, que, no marco do proxecto Procalidad, que o goberno peruano promove con financiamento do Banco Mundial. Dirixido a aqueles centros e titulacións que xa superaron os seus procesos de acreditación, esta iniciativa financia tanto novos equipamentos como estadías que permitan ao seu persoal docente avanzar nese camiño cara excelencia. Un camiño que esta semana trasladou ao campus un grupo de docentes da Facultad de Ciencias de la Educación de la Universidad Hermilio Valdizán de Huánaco.
Venres, 02 de decembro do 2016

O profesor Miguel Anxo Fernández recibiu este premio literario nun acto celebrado en Ourense

Cine e docencia conflúen na novela gañadora do premio Blanco Amor

O xurado destacou a axilidade narrativa da súa novela 'Blues para Moraima'


ImageCunha “alegría inmensa”, pero consciente tamén de que supón “unha responsabilidade” na súa faceta como escritor, vén de recibir o profesor de Ciencias Sociais e da Comunicación Miguel Anxo Fernández, o XXXV Premio de Novela Longa Eduardo Blanco Amor, polo seu libro Blues para Moraima. Tras recoller este galardón nun acto celebrado no Liceo de Ourense, Fernández amosou a súa satisfacción porque o xurado deste “premio de moito prestixio”, que organiza a Deputación de Ourense, recoñecese unha novela na que viña traballando desde hai máis dunha década e na que repousan como influencias as súas vivencias como investigador cinematográfico e docente.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 3039

Duvi. Diario da Universidade de Vigo. | Contacta con nós