DUVI. Diario da Universidade de Vigo
Inicio arrow Investigación
Luns, 20 de febreiro do 2017

A investigadora arxentina Cecilia Perea reflexiona sobre a performance na Casa das Campás

Da Patagonia a España, tralas pegadas da arte do aquí e o agora

A docente presenta o libro que recolle o seu estudo da arte de acción no espazo público entre 1992 e 2010


Image“Nos seus inicios, a performance propúñase como unha acción efémera da que non quedaban nin rexistros nin pegadas”, salienta a investigadora da Universidad Nacional de la Patagonia Austral María Cecilia Perea, quen presenta na Casa das Campás o libro no que fai balance da súa investigación respecto da arte de acción que se desenvolveu no espazo público en España entre 1992 e 2010. “Cando iniciamos esta investigación, non atopamos estudos previos dedicados á performance no espazo público”, recoñece Perea, que afonda no seu libro nun período no que a arte de acción “se consolida en España como un campo de creación, investigación e produción”.
Xoves, 16 de febreiro do 2017

María Victoria Carrera vén de realizar un estudo sobre o acoso e o ciberacoso

Os malos tratos verbais, a exclusión social e a agresión física, principais manifestacións do 'bullying'

A investigadora enquisou a 623 adolescentes da cidade de Ourense


ImageTodas as condutas de bullying e ciberbullying estudadas prodúcense nos centros escolares ourensáns. Os malos tratos verbais, a exclusión social e a agresión física son as manifestacións máis habituais do acoso. En relación ao ciberacoso, as situacións de maior incidencia son enviar mensaxes ameazantes ou insultantes a outras persoas; escribir bromas, rumores, chismes ou comentarios que poñen en ridículo a un compañeiro ou compañeira ou difundir segredos, información ou imaxes comprometidas de alguén. Os mozos exercen máis significativamente estes comportamentos violentos e entre uns e outros os que máis agriden son os que teñen actitudes sexistas e racistas. Estas son algunhas das conclusións dun estudo que vén de realizar María Victoria Carrera, profesora da Facultade de Ciencias da Educación do campus de Ourense, no que aborda estes fenómenos.
Xoves, 16 de febreiro do 2017

José María Nuñez deseñou na súa tese un modelo de medición con dispositivos de baixo custo

Un investigador do CUD desenvolve un sistema de telemetría que mellora as imaxes radar de barcos en movemento

O prototipo permite trasladar en tempo real datos sobre o movemento e posición dunha embarcación


ImageAo igual que unha fotografía pode perder definición se o suxeito que sae nela se move no momento de realizala, as imaxes electromagnéticas que xeran os radares de alta resolución de embarcacións que se atopan en movemento tamén presentan unha serie de distorsións que dificultan a súa detección. Desenvolver un sistema de telemetría de baixo custo que, a través da colocación de diferentes dispositivos nunha embarcación, permita obter unha imaxe nítida desta desde un radar centrou a investigación que José María Nuñez, profesor do Centro Universitario da Defensa (CUD), da Escola Naval Militar de Marín, centro adscrito á Universidade de Vigo, desenvolveu para a súa tese de doutoramento, “un estudo multidisciplinar que englobou múltiples tecnoloxías e campos”.
Mércores, 15 de febreiro do 2017

Arranca no campus a 2ª edición do congreso internacional CIJIELC

As novas xeracións de investigadores en estudos literarios e culturais intercambian en Vigo opinións e inquietudes

O encontro prolongarase ata o venres e nel presentaranse preto de cincuenta traballos


Image“É un encontro de mozas e mozos investigadores, maioritariamente de España, pero tamén doutras nacionalidades e, por suposto, cunha representación moi ampla do sistema universitario galego, cuxos traballos xiran en torno ao mundo das humanidades”. Así describe Gabriela Rivera, unhas das organizadoras, o Congreso Internacional de Jóvenes Investigadores en Estudios Literarios y Culturales, unha cita que, por segundo ano consecutivo, reúne na Facultade de Filoloxía e Tradución a medio cento de novos valores que tratan de abrirse camiño no mundo da investigación filolóxica e cultural.
O congreso, organizado por persoal en formación do Departamento de Literatura Española e Teoría da Literatura e apoiado polo grupo de investigación Elicin (Elyce-Literacine), arrancou este mércores e prolongarase ata o vindeiro venres.
Mércores, 15 de febreiro do 2017

O profesor Rafael García Campos ofreceu un relatorio sobre a tecnoloxía de exploración mariña

Robótica e intelixencia artificial na procura dun mellor coñecemento dos fondos submarinos

A conferencia insírese nas actividades de divulgación científica Live Science! de Ciencias do Mar


Image O fundador e director do Laboratorio de Visión Subacuática do grupo de Visión e Robótica Informática da Universitat de Girona, Rafael García Campos, ofreceu este mediodía un relatorio no salón de graos do Edificio de Ciencias Experimentais no que abordou o desenvolvemento da tecnoloxía ao servizo da exploración submarina. O investigador da universidade catalá debullou na súa intervención, que se insire no programa de divulgación científica Live Science! organizado polo alumnado da Facultade de Ciencias do Mar, o traballo que se está a levar a cabo institución académica xerundense para desenvolver a tecnoloxía precisa para a exploración do fondo mariño.
Martes, 14 de febreiro do 2017

Os corredores sométense nestes días a unha avaliación do rendemento en CC da Educación e do Deporte

Os ciclistas do Rías Baixas poñen a proba a súa forza sobre o pedal

Coordinadas polo profesor Óscar García, estas probas permiten tamén obter datos para investigacións


ImageCoñecer a potencia máxima que son capaces de aplicar ao pedal, para a partires de aí poder definir que frecuencias e intensidades permitirán optimizar o seu proceso de adestramento. Ese é o propósito central das probas de valoración do rendemento ás que, da man do profesor Óscar García, se someten nestes días en Ciencias da Educación e do Deporte os deportistas do Club Ciclista Rías Baixas. Os corredores veñen realizando desde decembro nun programa de adestramento de forza nas instalacións do centro, ás que nestes días se lles suman unhas probas “que supoñen esforzos máximos”, como explica García.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 2143

Duvi. Diario da Universidade de Vigo. | Contacta con nós