DUVI. Diario da Universidade de Vigo
Inicio arrow Cultura arrow Campus Vigo

Campus Vigo

Luns, 20 de febreiro do 2017

A banda 'indie' ofrecerá no Vidal Bolaño o seu primeiro concerto en Vigo

Con León Benavente bota a andar este mércores unha programación cultural que se estrea co cinema asiático

Películas chinesas, xaponesas e coreanas conforman o ciclo que se proxectará no Edificio Cambón


Image A programación cultural do segundo cuadrimestre da Universidade de Vigo arranca este mércores co primeiro concerto que a banda indie León Benavente ofrecerá en Vigo desde que o grupo se formara no ano 2012. Abraham Boba, Luis Rodríguez, César Verdú e Eduardo Baos actuarán no Teatro Vidal Bolaño a partir das 18.30 horas, onde interpretarán os temas do seu segundo traballo León Benavente 2, que están a presentar por toda España e México. Co concerto de León Benavente bota a andar a programación promovida pola Vicerreitoría de Extensión Cultural e Relacións Internacionais, que introduce como gran novidade a proxección no Auditorio do Edificio Cambón de cinco películas de cinema asiático, que se encadran nunha nova edición do ciclo Cine e Lingua.
Xoves, 16 de febreiro do 2017

O proxecto PEPO, impulsado por unha investigadora de Ciencias do Mar, desenvolverase en sete colexios

Un espectáculo de monicreques amosa a nenos e nenas o impacto que os plásticos teñen nos océanos

Os protagonistas, Planki e Tonki, que loitan contra Plastikeitor para eliminar o lixo do mar


ImagePlanki e Tonki son dous microorganismos do plancto mariño. O seu inimigo é Plastikeitor, o mostro do lixo de plástico dos océanos. Da súa vitoria depende a supervivencia dos ecosistemas mariños, dos animais que os habitan e do equilibrio do planeta. Estes tres personaxes son os protagonista do proxecto de divulgación científica PEPO, que nas vindeiras semanas achegará aos estudantes de Educación Infantil de varios colexios de Vigo a problemática da contaminación que os plásticos provocan no océanos. Trátase dunha iniciativa posta en marcha por María Aranguren, estudante de posdoutoramento da Facultade de Ciencias do Mar, e financiada pola Asociación Internacional para la Investigación de Limnología y Oceanografía (ASLO) e conta coa colaboración da Vicerreitoría de Relacións Internacionais e Extensión Universitaria e a Asociación Oceanógrafos de Galicia.
Luns, 13 de febreiro do 2017

Alumnado do instituto Terras de Turonio entrevistou en directo ao reitor, Salustiano Mato

A Universidade súmase a Ponte… nas ondas! na celebración do Día Mundial da Radio

Estreouse a web Escolas nas Ondas, na que tamén colabora a institución académica viguesa


ImageA Universidade de Vigo vén colaborando con Ponte… nas ondas! desde hai anos, entre outros proxectos, encargándose de realizar o servizo de emisión e aloxamento dos programas realizados polos centros educativos. Neste contexto e coincidindo coa celebración do Día Mundial da Radio, o reitor da Universidade de Vigo, Salustiano Mato, asistiu este luns no IES Terra de Turonio de Gondomar á estrea do espazo web Escolas nas Ondas. Non foi unha visita calquera, durante a súa estancia no instituto o reitor compartiu experiencias co alumnado do centro, que iniciou a programación dun día tan especial con esta entrevista en directo.
Xoves, 09 de febreiro do 2017

Arrancan os actos de celebración do Día Internacional da Muller e a Nena na Ciencia

Menchu Comas, relato en primeira persoa dunha pioneira na exploración dos océanos

A científica do CSIC impartiu un relatorio en Ciencias do Mar no que contou a súa experiencia


ImageFoi unha das primeiras mulleres españolas en participar en campañas oceanográficas a bordo de grandes buques e tamén en submarinos como o Nautile; xefa científica en barcos coma o Hespérides ou o Sarmiento de Gamboa; realizou estudos na Antártida, no Atlántico profundo, no mar de Alborán... e hoxe compartiu experiencias co alumnado da Facultade de Ciencias do Mar. Menchu Comas, profesora de Investigación do Consello Superior de Investigacións Científicas, con destino no Instituto Andaluz de Ciencias da Terra, IACT, visitou o campus para impartir a conferencia Mujeres explorando el océano, una experiencia cercana.
Luns, 06 de febreiro do 2017

A agrupación celebra esta semana e a seguinte catro audicións para seleccionar voces

Mergúllate no mundo da música co Coro Universitario

Celebrarase no salón de actos da EEI en Torrecedeira os días 7,9,14 e 16 de febreiro


ImageCo obxectivo de renovar e reforzar a formación, o Coro Universitario desenvolverá esta semana e a seguinte un proceso de selección de novas voces no salón de actos da Escola de Enxeñería Industrial en Torrecedeira, espazo de ensaio habitual da formación musical. Ás audicións, que terán lugar os días 7,9, 14 e 16 de febreiro entre as 20.00 e as 22.00 horas, poderá concorrer calquera persoa, incluso aquelas que non estean vinculadas ao ámbito universitario e non teñan formación musical previa. Baixo o lema Mergúllate no mundo da música, as audicións que comezarán mañá martes teñen o obxectivo de incorporar ao Coro, tanto voces femininas como masculinas.
Martes, 31 de xaneiro do 2017

Un total de nove propostas integran a oferta da Vicerreitoría de Extensión Universitaria

‘Design Thinking’ e cultivo de cogomelos para renovar os obradoiros do segundo cuadrimestre

Preto dun cento de persoas participaron na primeira quenda dos cursos


Image Os obradoiros que cada cuadrimestre organiza a Vicerreitoría de Extensión Universitaria e Relacións Internacionais incorporan no segundo período do curso académico 2016-2017 dúas novidades: o design thinking e o cultivo de cogomelos. A relación de cursos para os segundo cuadrimestre deste curso complétase con outros sete obradoiros, algúns deles convertidos xa en clásicos do programa, como son os de guitarra; maxia; fotografía dixital; canto, canto, percusión, gaita e baile tradicional galego e posta en escena dunha obra teatral aos que se suman o de horta ecolóxica e o de lingua e cultura da comunidade xorda. O período de matrícula comezou o 30 de xaneiro e finalizará o 10 de febreiro.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 740

Duvi. Diario da Universidade de Vigo. | Contacta con nós