DUVI. Diario da Universidade de Vigo
Inicio arrow Campus de Ourense
Martes, 27 de xuño do 2017

Dez mulleres participan en Ourense nun programa de uso terapéutico do teatro

Reescribindo vidas trala diagnose dun cancro

Impartido polas investigadoras María Luisa Mondolfi e Sara Fernández


ImageDesde o pasado mes de abril e ata finais deste mes de xuño, un grupo de mulleres acode unha mañá á semana á Casa da Xuventude de Ourense para participar nunha actividade que se ten convertido para elas nun aliciente vital moi importante. Con idades, formacións e traxectorias moi diversas, todas elas comparten un nexo común: a diagnose dun cancro recentemente. Xuntas traballan, baixo a “guía” das investigadoras da Universidade de Vigo María Luisa Mondolfi e Sara Fernández, na reescritura das súas vidas a través dun programa de dramaterapia, de uso terapéutico do teatro.
Luns, 26 de xuño do 2017

O Pavillón de Deportes acolle desde este luns e ata o venres esta actividade

Unha trintena de adestradores asisten ao campus de formación da Fundación Aíto García Reneses

A cita chega por primeira vez en Galicia cun destacado panel de docentes


ImageEste luns arrancou no Pavillón de Deportes universitario o Campus de Formación para Adestradores Galicia 2017, unha cita “de luxo” para adestradores de baloncesto interesados en mellorar a súa formación aprendendo “dun elenco inigualable” de docentes. Ata o venres, 30 adestradores e adestradoras de diferentes puntos da xeografía galega asisten a unha formación organizada por primeira vez en Galicia pola Fundación Aíto García Reneses, contando neste caso coa colaboración da Universidade de Vigo e da Federación Galega de Baloncesto.
Luns, 26 de xuño do 2017

Cunha xornada sobre a xurisdicións penal e contencioso-administrativa neste tema

A actividade do Observatorio de Estudos sobre Corrupción Pública arranca en xullo

A entidade creouse o pasado mes de marzo na Facultade de Dereito ourensá


ImageO pasado mes de marzo Salustiano Mato, reitor da Universidade de Vigo, e José Ramón Parada, presidente da Fundación Alfonso Martín Escudero, asinaron un convenio para a creación do Observatorio de Estudos sobre Corrupción Pública, xestionado desde a Facultade de Dereito polo Grupo de Investigación Medea Iuris deste centro. O vindeiro 13 de xullo a entidade celebrará a súa primeira actividade, que será unha Xornada sobre as xurisdicións penal e contencioso-administrativa na loita contra a corrupción pública. Nela, daranse cita expertos do eido académico e profesional para abordar unha das problemáticas que maior preocupación xera na sociedade.
Venres, 23 de xuño do 2017

47 alumnos e alumnas festexaron o venres o remate dos seus estudos

Traballo Social pechou os actos de graduación deste curso no campus

Tamén celebraron a súa despedida os nenos e nenas de dous a tres anos da escola infantil


ImageEste venres pecháronse os actos de graduación deste curso 2016/2017 no campus de Ourense. Os encargados de pór o broche a estas conmemoracións foron os estudantes do último curso tanto do Grao en Traballo Social como da Escola Infantil do campus de Ourense. Uns e outros recolleron os distintivos que acreditan o remate dun ciclo e o inicio dunha nova etapa entre o aplauso dos asistentes a cada un dos eventos. Como en toda graduación, non faltou a emoción, o sorriso, a lembranza do tempo compartido, os bos desexos para o futuro e algunha que outra bágoa.
Venres, 23 de xuño do 2017

Este venres inaugurouse unha mostra da creadora lusa Mónica Oliveira

A Sala Alterarte despide o curso con 'Encruzilhadas'

A exposición está curada polo profesor da Universidade de Vigo Javier Blanco


ImageDeste este venres 23 de xuño e ata o 1 de setembro, os muros da sala de arte contemporánea do campus de Ourense, a Sala Alterarte, acollen a exposición Encruzilhadas. Nela, a creadora e docente lusa Mónica Oliveira amosa ao visitante 17 obras con formas de sobres e gaiolas coas que quere abordar as cuestións da comunicación na sociedade actual e a busca dun espazo nela por parte dos individuos. Coa apertura desta mostra, Alterarte pecha a súa programación do curso 2016/2017 e comeza a recta final da terceira edición do seu proxecto expositivo Estado Crítico, que reúne a unha decena de artistas escollidos por outros tantos curadores e curadoras docentes da Universidade.
Venres, 23 de xuño do 2017

33 estudantes do Programa Universitario de Maiores festexaron o remate de ciclo

O alumnado sénior tamén se gradúa no campus

O acto tivo lugar este xoves no Edificio Politécnico do campus


ImageEntre os actos de graduación que estas semanas se suceden no campus de Ourense este xoves foi o alumnado sénior o que celebrou o remate de ciclo. A XIII promoción de graduadas e graduados universitarios sénior e a II promoción de graduadas e graduados universitarios superior festexaron con membros da comunidade universitaria, familiares e amigos a consecución dun título que simboliza as ansias de seguir medrando como persoas que teñen demostrado cada un deles e delas. Con máis de 55 anos, os homenaxeados e homenaxeadas volveron ás aulas non para orientar a súa vida laboral senón pola paixón de aprender e por ese afán recibiron o aplauso dos presentes na graduación.
Resultados 55 - 60 de 3743

Duvi. Diario da Universidade de Vigo. | Contacta con nós