DUVI. Diario da Universidade de Vigo
Inicio arrow Institucional
Xoves, 14 de setembro do 2017

Entre o 20 e 22 de setembro co gallo da celebración das 35ª Jornadas de Gerencia Universitaria

Vigo converterase a próxima semana no epicentro da análise dos retos da xestión universitaria

200 profesionais abordarán cuestións como financiamento, profesionalización ou xestión de recursos


Image A Universidade de Vigo acollerá entre os días 20 ao 22 de setembro a 35ª edición das Jornadas de Gerencia Universitaria nas que uns 200 profesionais, entre poñentes e público, analizarán cuestións fundamentais para o desenvolvemento da súa actividade nas universidades. “O formato das xornadas deste ano é totalmente distinto a como se fixeron en anteriores ocasións. Trátase de abordar temáticas que non sexan lugares comúns para todos e nós pretendemos que se fale de temas diferentes, cousas que preocupan e que van enlazadas con poñer en valor, tanto á Universidade de Vigo como o Sistema Universitario Galego, SUG”, explica o xerente da institución académica viguesa, Manuel Fernández Jáuregui, que hai ano e medio aceptou o reto de deseñar as xornadas, organizadas por Crue Universidades Españolas. As xornadas desenvolveranse baixo o lema Retos en la gestión de los recursos en las universidades, desarrollo y estrategias de futuro.
Mércores, 13 de setembro do 2017

A Unidade de Igualdade convoca os premios que levan o nome da escritora galega

Egeria, unha muller pioneira que rachou cos roles tradicionais

Recoñecen a inclusión da perspectiva de xénero nos traballos fin de grao e de mestrado


ImageDiversos estudos sitúan a orixe da viaxeira e escritora Egeria na Gallaecia no século IV. Muller pioneira en moitos aspectos, peregrinou a Terra Santa e, ao seu regreso, recolleu a súa experiencia no libro Itinerarium ad Loca Sancta, converténdose na primeira cronista de viaxes galega. O seu exemplo de muller aventureira, peregrina e escritora, toda unha pioneira rompendo roles de xénero na antigüidade, é o que tratan de preservar os Premios Egeria que convoca a Unidade de Igualdade da Universidade de Vigo para poñer en valor a inclusión da perspectiva de xénero nos traballos fin de grao e de mestrado. O prazo de presentación de solicitudes remata o 20 de deste mes de setembro.
Martes, 12 de setembro do 2017

A facultade celebrou un minuto de silencio en recordo desta titulada, falecida o pasado sábado

CC da Educación e do Deporte rende homenaxe a María Ferreira


ImageEgresada da Facultade de Ciencias da Educación e do Deporte, onde cursou tanto Educación Infantil, como o mestrado en Investigación en Deporte, Actividade Física e Saúde, a porriñesa María Ferreira perdeu a vida o pasado sábado nun accidente de bicicleta en Asturias, ata onde se desprazara para ver unha das últimas etapas da Vuelta Ciclista a España. Un tráxico acontecemento que deixou un fondo pesar neste centro do campus, que no mediodía deste martes celebrou un minuto de silencio na súa memoria, coa participación tanto dos que foron os e as súas docentes como de estudantes e persoal e administración e servizos.
Venres, 08 de setembro do 2017

Mato e Feijóo destacaron os logros de universidades e Xunta “nos oito anos máis difíciles para o SUG”

O Sistema Universitario Galego comeza o curso reivindicando a súa eficiencia, equilibrio e competitividade

O acto solemne de apertura do curso celebrouse este mediodía na Universidade de Vigo


ImageO Sistema Universitario Galego celebrou este mediodía no campus de Vigo o acto solemne de apertura do curso académico 2017-2018, reivindicando a existencia das tres universidades que o conforman e poñendo en valor sinais de identidade como súa singularidade, igualdade, eficiencia e competitividade. No salón de actos da Facultade de Ciencias Económicas e Empresariais o reitor da Universidade de Vigo, Salustiano Mato, destacou as luces e sombras “dos oito anos máis difíciles para o SUG”, nos que a colaboración entre as universidades e o executivo autonómico materializouse na consecución de dous plans de financiamento, a conxelación das taxas durante cinco anos consecutivos e a materialización dun mapa de titulacións. Pola súa banda, o presidente da Xunta, Alberto Núñez Feijóo, que comezou a súa intervención cunha reivindicación da democracia e das regras que a fan posible, afirmouse na eficiencia das universidades galegas e no retorno cualitativo e cuantitativo da súa activade á sociedade.
Xoves, 07 de setembro do 2017

A cuarta edición deste encontro do emprendemento terá lugar entre o 21 e o 23 de setembro

Preto de 40 actividades en doce sedes conforman a programación do Pont-Up Store 2017

Un ‘fablab’ en Belas Artes complementará a feira na que 40 empresas amosarán os seus proxectos


ImagePreto de 40 actividades, entre obradoiros, seminarios, coloquios e encontros, que se desenvolverán en doce espazos da cidade, conforman a programación do Pont-Up Store 2017, o evento dedicado ao emprendemento que a Universidade, no marco do Campus CREA S2i, promove en Pontevedra entre o 21 e 23 de setembro. Máis de 40 novas empresas amosarán nestas xornadas os seus produtos e servizos no recinto instalado na Praza de España, que nesta cuarta edición conectarase co fablab que terá lugar nas salas de exposicións da Facultade de Belas Artes e da Escola Superior de Conservación e Restauración de Bens Culturais de Galicia.
Venres, 28 de xullo do 2017

O reitor e o alcalde de Vigo asinaron hoxe un convenio de colaboración entre ambas institucións

A candidatura das Illas Cíes como patrimonio mundial natural Unesco levará o aval científico de Campus do Mar

A sinatura tivo lugar nas dependencias da antiga Reitoría á que a Universidade regresa temporalmente


ImageA Universidade de Vigo, a través de Campus do Mar, sumouse hoxe á iniciativa que no ano 2013 puxo en marcha o Concello de Vigo, que promove e lidera a proposta de candidatura das Illas Cíes como patrimonio mundial natural Unesco. Salustiano Mato e Abel Caballero asinaron este mediodía, nas dependencias da antiga Reitoría que a Universidade ocupará ata a finalizacións das obras da súa sede institucional no Berbés, un convenio de colaboración ao abeiro do que ambas institucións traballarán conxuntamente no desenvolvemento das accións de reforzo científico-técnico do expediente da candidatura. “Este é un salto cualitativo porque agora, tras varios anos apoiando a iniciativa do Concello, trátase de achegar as evidencias científicas e tecnolóxicas para que a candidatura poda ser viable”, explicou Mato.
Resultados 25 - 30 de 2385

Duvi. Diario da Universidade de Vigo. | Contacta con nós