DUVI. Diario da Universidade de Vigo
Inicio arrow Investigación
Xoves, 15 de xuño do 2017

Destacados xuristas participan hoxe e mañá en Vigo nas III Xornadas internacionais de Redexmar

Como afecta a incerteza xurídica internacional aos retos da política marítima integrada da UE?

A Red de Excelencia de Estudios Jurídico-Marítimos analizará cuestións como o Brexit


Image Reino Unido é unha nación de indiscutible tradición marítima e cun peso destacado na política comunitaria, así que analizar a súa saída do mercado interior europeo semella unha cuestión de interese para as e os expertos en Dereito marítimo. O Brexit, pero tamén como afectan ás políticas de emprego, de pesca, de enerxía e de seguridade marítima, as “sorpresas políticas” que se están a producir nos últimos tempos, centran as III Xornadas Internacionais que a Red de Excelencia de Estudios Jurídico-Marítimos, Redexmar, que esta tarde comezaron e que se prolongarán ata mañá no salón de sesións da Autoridade Portuaria de Vigo.
Xoves, 15 de xuño do 2017

O CINDU 2017 reúne dende este xoves e ata o sábado 300 expertos de 12 países no campus de Vigo

250 experiencias innovadoras para axudar a deseñar o futuro da docencia universitaria

A profesora Juana M. Sancho defendeu a necesidade de que o profesorado responda aos desafíos do s. XXI


ImageEn 2009, nun contexto de profundo cambio para o ensino universitario, docentes das universidades de Vigo, Santiago e Coruña organizaban a primeira edición dun congreso internacional que tiña como obxectivo convertese nun punto de encontro e debate sobre os importantes cambios que o sistema sufría naquel momento coa adaptación ao EEES, os novos plans de estudo e as necesidades de acreditación e mellora da calidade docente. Dende entón, cada dous anos o campus de Vigo acolle o Congreso Internacional de Docencia Universitaria, Cindu, que é xa un referente nacional. Na súa quinta edición, que arrancou este xoves na Facultade de Ciencias Económica e Empresariais, “participan 250 expertas e expertos de universidades de 12 países”, entre eles Arxentina, Brasil, Canadá, Chile, Colombia, Francia, México ou Perú, como explica o profesor Pedro Membiela, membro do comité organizador.
Xoves, 15 de xuño do 2017

A iniciativa foi promovida no marco dunha xuntanza de profesorado en Olimpia (Grecia)

Profesorado do campus participa na creación dunha rede iberoamericana de estudos sobre olimpismo

A investigadora de Ciencias da Educación e do Deporte María José Martínez Patiño é unha das súas promotoras


ImageOlimpia, o berce das Olimpiadas, foi recentemente a sede dunha sesión internacional que reuniu a profesorado de Ciencias da Actividade Física e do Deporte de diferentes universidades e onde os e as representantes dos países de fala hispana e portuguesa asinaron o Consenso de Olimpia, que ten como obxecto potenciar as relacións entre os investigadores e investigadoras de ambas beiras do Atlántico para traballar conxuntamente na investigación sobre o movemento olímpico. A de Ciencias da Educación e do Deporte María José Martínez Patiño é unha das impulsoras dun acordo que foi acollido con “grande interese” polos representantes americanos.
Mércores, 14 de xuño do 2017

A finais de mes celebrarase na cidade o 7º Congreso de la Sociedad de Ingenería de Fabricación

Vigo, punto de referencia internacional da Enxeñaría de Fabricación

Coordinado polo catedrático Enrique Ares, ao simposio asistirán máis de 400 persoas de 18 países


Image A cidade de Vigo converterase entre os días 28 ao 30 de xuño na capital internacional da Enxeñaría de Fabricación con motivo da celebración do 7º Congreso Internacional de la Sociedad de Ingenería de Fabricación, MESIC2017, organizado pola Universidade de Vigo, a Asociación de Industriales Metalúrgicos de Galicia, Asime, e o Ilustre Colegio de Ingenieros Industriales de Galicia. Profesionais e persoal investigador e docente de case unha vintena de países tomarán parte no congreso que hoxe foi presentado no Concello de Vigo, que xunto a Deputación de Pontevedra colabora na organización do evento no que se afondará, en palabras do catedrático do Departamento de Deseño da Enxeñería da Universidade de Vigo e coordinador do simposio, Enrique Ares, “no proceso de transformación do coñecemento a través da fabricación 4.0”.
Mércores, 14 de xuño do 2017

A investigadora Ainara Duque deseñou na súa tese esta ferramenta de avaliación psicolóxica

Un cuestionario busca predicir as consecuencias da retirada deportiva

O estudo que realizou con futbolistas constata que dous terzos non planifican este momento


ImageTratar de predicir como vai afectar a un ou unha deportista o momento da súa retirada, para así poder planificar unha intervención preventiva que contribúa a minimizar ou eliminar os efectos dunha transición que nalgúns profesionais chega a producir estrés, depresión ou perda de identidade. Esa é a finalidade principal da ferramenta de avaliación que Ainara Duque Ingunza desenvolveu no marco da súa tese de doutoramento, que ten como principal novidade a “visión prospectiva” que achega respecto das perspectivas que teñen os deportistas en activo sobre a súa futura retirada. Unha visión “apenas desenvolvida” no eido da psicoloxía do deporte e que levou a esta investigadora a deseñar un cuestionario de adaptación á retirada deportiva, que validou cunha mostra de 346 deportistas de 51 modalidades.
Mércores, 14 de xuño do 2017

Xunto con Luis Graça, inmunólogo do Instituto de Medicina Molecular (IMM) da Universidade de Lisboa

'Nature communications' publica un artigo co-asinado polo investigador do grupo de Inmunoloxía Jose Faro

Céntrase nas características dos linfocitos T, eido clave para a comprensión das enfermidades autoinmunes


ImageO científico do grupo de Inmunoloxía e investigador do Cinbio Jose Faro acaba de publicar un artigo na revista Nature communications, como colaborador cun grupo do Instituto de Medicina Molecular da Universidade de Lisboa. O docente da Universidade de Vigo é asinante co-senior xunto co experto portugués Luis Graça, sendo ambos os supervisores do estudo. O artigo é a continuación doutro traballo publicado en 2011 que, como explica o investigador do Cinbio foi “froito de un proxecto financiado polo Estado español que eu tiña acadado en 2008 sobre un estudo matemático-experimental dos procesos inmunolóxicos chamados 'Reacción de Centro Xerminal’, no que contei coa colaboración do Inmunólogo experimental Luis Graça, do Instituto de Medicina Molecular (IMM) da Universidade de Lisboa”.
Resultados 19 - 24 de 2270

Duvi. Diario da Universidade de Vigo. | Contacta con nós