DUVI. Diario da Universidade de Vigo
Inicio arrow Cultura
Mércores, 05 de xullo do 2017

O campamento de verán busca conciliar a vida laboral coa familiar da comunidade universitaria

Máis dun cento de rapazas e rapaces viaxan no tempo da man do Campus Camp


ImageComo todos os veráns as e os máis pequenos da casa invadiron o campus. O luns 26 de xuño, o Campus Camp comezou unha viaxe polo tempo, na que as nenas e nenos participantes arrancaron o seu percorrido na Idade Media para rematar en setembro no futuro, pasando antes por outras épocas como a Antiga Roma ou ás décadas de 1920 e 1970. A Vicerreitoría de Extensión Universitaria busca con esta iniciativa mellorar a conciliación do ámbito laboral ou estudantil co familiar durante as vacacións estivais dos máis pequenos da casa. Por iso, ofrece unha alternativa ás fillas e fillos, de entre tres e doce anos, dos membros da comunidade universitaria.
Luns, 03 de xullo do 2017

A cita desenvolverase do 4 ao 7 de xullo na localidade ourensá

O Curso de Medios Audiovisuais de Celanova aposta pola suma de talentos na súa XIV edición

Entre os protagonistas este ano están Carlos Casares, a produción 'Dhogs' e Youtubeir@s


ImageEntre as citas que cada ano repiten na programación de cursos de extensión universitaria organizados desde o campus de Ourense está o Curso de Medios Audiovisuais de Celanova, feito en colaboración co Fundación Carlos Casares. Este ano, a actividade terá lugar do 4 ao 7 de xullo e levará por lema A obra audiovisual. Suma de talentos. Arredor de 20 profesionais do audiovisual achegaranse á localidade ourensá para analizar as últimas producións e iniciativas no sector, estando entre os protagonista desta edición a produción Dhogs, o proxecto Youtubeir@s e o potencial fílmico da obra de Carlos Casares.
Venres, 30 de xuño do 2017

Coa participación de Xavier Simón, Félix Juncal e Luciano Guimeráns

Arranca o curso sobre dinamización local pondo en valor experiencias exitosas vinculadas ao monte galego

Apostan por camiñar cara un monte multifuncional que mesture o económico, o social e o ambiental


ImagePór en valor experiencias exitosas vinculadas ao monte galego e animar a outras persoas interesadas a crear as súas propias iniciativas emprendedores. Este é o obxectivo co que este venres arrancou na Casa do Pobo de Bueu o curso sobre dinamización do monte organizado pola Universidade de Vigo en colaboración co concello de Bueu e a Asociación de Propietarios de Montes do Morrazo (APMM), unha cita na que, segundo indicaron os propios organizadores, se tratará de deixar claro que actualmente existen moitas oportunidades para desenvolver iniciativas dinamizadoras a partir da utilización sustentable dos recursos locais, xerando emprego e solucionando problemáticas relevantes como a dos incendios forestais ou a do abandono do mundo rural.
Xoves, 29 de xuño do 2017

O cineasta arxentino imparte en Belas Artes un seminario inserido na programación de Novos Cinemas

Matías Piñeiro: “Nunca concibín as ideas de ver e facer cine como instancias separadas”

A través dunha selección de filmes e directores, achega a súa persoal visión desta arte


ImageCineasta e cinéfilo son dous conceptos con fronteiras difusas para o director arxentino Matías Piñeiro, ao que o festival Novos Cinemas dedica unha retrospectiva na súa segunda edición, inaugurada este martes. O programa formativo dun evento que conta coa colaboración da Vicerreitoría do campus levou ao director á Facultade de Belas Artes, onde nas xornadas de xoves e venres imparte o seminario 36 leccións de cinema, no que, a través dun percorrido por diferentes referentes da historia da sétima arte, articula un relato sobre como ver filmes foi o que o levou a converterse en director.
Mércores, 28 de xuño do 2017

O investigador da facultade Eduardo Outeiro inaugura este xoves a exposición ‘Magnífico’

San Xoán e os solsticios danzan na Sala X

Partindo das figuras de Xoán Bautista e Xesús, o artista articula a mostra como un “baile solar”


ImageNo evanxeo de Lucas relátase que cando a virxe María, embarazada de Xesús, visitou a Isabel, embarazada á súa vez de Xoán Bautista, este deu un salto no ventre de súa nai. “De pequeno, sempre imaxinaba ese salto como un baile”, relata o artista e investigador Eduardo Outeiro do episodio que serve como punto de partida para Magnífico, a exposición que este xoves inaugura na Sala X. “O feito de que o solsticio de verán se dedique a San Xoán e o de inverno a Xesús delata que eran figuras moi paralelas”, apunta da idea sobre a que articula un “pequeno baile arredor do sol”, a partires da interacción entre dúas figuras opostas no calendario solar.
Luns, 26 de xuño do 2017

Un curso de extensión achega ao alumnado ao uso didáctico de xoguetes interactivos e do encerado dixital

Maquetas interactivas que aglutinan outro xeito de ensinar ciencias

29 estudantes participan na cuarta edición deste curso de verán da Vicerreitoría do campus


ImageA construción dunha maqueta permite achegar a nenos e nenas unha información visual respecto de determinados coñecementos que están a adquirir na aula, o que a converteu nunha clásica ferramenta no ensino. Mais tamén pode servir como o elemento que aglutine diferentes materiais didácticos de carácter dixital, como demostran as maquetas de portos, praias ou cidades nas que nestas semanas traballan as 29 alumnas e alumnos do curso de extensión universitaria Como ensinar ciencias con xoguetes interactivos, recursos en liña e encerado dixital e nas que integran o uso de robots educativos ou códigos QR cos que acceder a actividades dixitais.
Resultados 19 - 24 de 2022

Duvi. Diario da Universidade de Vigo. | Contacta con nós