DUVI. Diario da Universidade de Vigo
Inicio arrow Cultura arrow Campus Ourense

Campus Ourense

Mércores, 18 de outubro do 2017

Este mércores inaugurouse a exposición e presentouse o catálogo deste proxecto expositivo

Alterarte amosa no Marcos Valcárcel os fondos doados polos artistas que participaron en 'Estado Crítico 2'

As obras forman parte da colección desta sala do campus de Ourense


ImageEntre xaneiro de 2013 e agosto de 2015, a sala de arte contemporáneo do campus de Ourense, a Sala Alterarte, desenvolveu o proxecto expositivo Estado Crítico 2. 10 Comisarios 10 Artistas. Ao seu abeiro, foi acollendo once mostras doutros tantos creadores curadas por profesores da Universidade de Vigo. Ao londo deste tempo e como xa vén sendo tradición neste espazo, cada un dos artistas participantes doou unha obra súa á colección da sala universitaria. Este mércores inaugurouse no Centro Cultural Marcos Valcárcel da Deputación de Ourense a mostra Estado Crítico 2 na Colección Alterarte ao mesmo tempo que se presentou o seu catálogo.
Venres, 13 de outubro do 2017

O campus acollerá do 16 ao 20 de outubro unha actividade formativa impartida por Víctor Barro

Un anticipo do Outono Fotográfico en forma de curso

A iniciativa cumpre este ano a súa oitava edición


ImageAínda faltan algunhas semanas para a celebración do Outono Fotográfico en Ourense pero a súa presenza xa comeza a agromar. Do 16 ao 20 de outubro, o campus acollerá un ano máis a celebración do Curso de Iniciación á Fotografía Dixital que imparte Víctor Barro no marco deste certame e coa colaboración da Vicerreitoría. Será a oitava edición dunha actividade que quere ser “un espazo formativo e sobre todo creativo que esperte o fotógrafo que temos dentro de cada un de nós”. Ao longo das catro sesións que se celebrarán no Pavillón I do campus, as persoas inscritas aprenderán a manexar a cámara fotográfica dixital.
Venres, 06 de outubro do 2017

Este venres inaugurouse unha mostra do artista Luis San Sebastián

'Poder, corrupción e mentiras' para comezar o curso na Sala Alterarte

A exposición está curada polo profesor da Universidade de Vigo Ignacio Barcia


ImagePower, corruption & Lies. Poder, corrupción e mentiras. Con este título presentouse este venres na Sala Alterarte do campus de Ourense a nova mostra que ocupa os seus muros. Con obra do artista Luis San Sebastián e curada polo profesor da Universidade de Vigo Ignacio Barcia, con esta exposición o espazo de arte contemporánea abre a súa programación do curso 2017/2018 e dá continuidade á terceira edición do proxecto Estado Crítico. 10 curadores 10 artistas, que leva desenvolvéndose na Sala Alterarte desde outubro de 2015.
Xoves, 05 de outubro do 2017

A Universidade participa un ano máis na programación do Festival Internacional de Teatro de Ourense

As actividades do Fito arrancan no campus cunha conferencia e demostración de El Rayo Misterioso

Na sesión traballaron as accións físicas e a construción de personaxes


ImageDo 5 ao 15 de outubro, compañías de España, Portugal e Arxentina danse cita na décima edición do Fito, o Festival Internacional de Teatro de Ourense. O certame conta un ano máis coa colaboración do campus de Ourense, tanto a través do seu patrocinio como da acollida de diferentes actividades da súa programación nas instalacións universitarias. Este xoves a actividade do festival arrancou precisamente no campus coa celebración da conferencia-demostración Da acción de grazas ao efecto fantasmal de encantamento, na que o Grupo Laboratorio de Teatro El Rayo Misterioso, procedente de Arxentina, compartiu cos asistentes a súa forma de traballar personaxes e accións.
Venres, 29 de setembro do 2017

Virxilio Rodríguez e Jesús Vázquez asinaron este venres un convenio con este obxectivo

Universidade e Concello fomentarán a participación do alumnado no Festival de Cine Internacional de Ourense

Un xurado de estudantes outorgará un premio de 1500 euros


ImageEste venres Virxilio Rodríguez, vicerreitor do campus de Ourense, e Jesús Vázquez, alcalde de Ourense, asinaron un convenio específico de colaboración entre a Universidade de Vigo e o Concello de Ourense para a 22 edición do Festival de Cine Internacional de Ourense Ouff, que se celebrará do 20 e 27 de outubro. Con este acordo, a institución académica retoma a colaboración con esta cita cultural co obxectivo último de motivar a presenza de público universitario no festival e de achegar a este colectivo o novo cinema. Para acadalo, crearase un Premio do Xurado Universitario, outorgado por cinco estudantes e o campus acollerá unha das proxección do certame.
Mércores, 27 de setembro do 2017

Este mércores presentou unha nova edición do Festival Internacional de Teatro de Ourense

O Fito celebra unha década de vida con dez días de espectáculos

A actividade desenvolverase do 5 ao 15 de outubro


ImageUn outono máis os escenarios da cidade de Ourense prepáranse para abrir as súas portas ao Festival Internacional de Teatro de Ourense, Fito. Do 5 ao 15 de outubro, compañías de España, Portugal e Arxentina ofrecerán ao público as súas últimas producións. Serán dez días de espectáculos moi diversos, desde teatro clásico a humor xestual, complementados con achegas doutras artes, como a danza, a música ou a poesía. Entre os pratos fortes da cita estará Yllana, que fará un repaso dos seus mellores momentos nun espectáculo creado co gallo dos seus 25 anos.
<< Inicio < Ant. 1 2 3 4 5 6 7 8 9 10 Seg. > Remate >>
Resultados 1 - 6 de 608

Duvi. Diario da Universidade de Vigo. | Contacta con nós