DUVI. Diario da Universidade de Vigo
Inicio arrow Institucional arrow Campus Pontevedra

Campus Pontevedra

Venres, 17 de febreiro do 2017

O vicerreitor do campus de Pontevedra mantivo unha xuntanza co alcalde e os responsables do festival

Universidade e FIC Bueu exploran vías de colaboración

O obxectivo é asinar un convenio que permita ao alumnado realizar prácticas neste evento audiovisual


ImageTraballar nun convenio que permita que o alumnado poida realizar prácticas en diversas áreas do Festival Internacional de Curtametraxes de Bueu. Este é o compromiso xurdido da xuntanza que o vicerreitor do campus de Pontevedra, Juan Manuel Corbacho, e o profesor da Facultade de Ciencias Sociais e da Comunicación Alfonso Sola veñen de manter co alcalde, Félix Juncal, e edil de Cultura, Juan Carlos Eirea, desta localidade, xunto cos responsables deste evento audiovisual. “Isto ofrecería a alumnado de facultades como CCSS e da Comunicación ou Belas Artes a posibilidade de vivir de preto un festival en todas as súas facetas”, salientou o vicerreitor.
Mércores, 15 de febreiro do 2017

A institución académica dá conta da súa oferta formativa no salón que se celebra no Pazo da Cultura

A Universidade reúnese co seu futuro en Edugal

Diferentes centros e titulacións están representados no stand e participan nas charlas de orientación da feira


ImageMáis de 2000 alumnos e alumnas de preto de 35 institutos de diferentes puntos de Galicia pasarán entre este mércores e este venres polo recinto feiral de Pontevedra, onde se celebra a sexta edición do Salón da Oferta de Educación e Formación de Galicia Edugal e onde a Universidade de Vigo conta un ano máis cun espazo propio no que informar e asesorar respecto da súa oferta académica aos que poderían ser os seus estudantes nun futuro próximo. “É o noso público potencial e interésanos darlles a coñecer, en todo o que se poida, a oferta académica da Universidade”, salientaba neste senso o vicerreitor do campus, Juan Manuel Corbacho.
Mércores, 01 de febreiro do 2017

Desenvolvida entre o 23 e o 27 de xaneiro no marco do proxecto Green Campus

O campus recolle 136 aparellos na terceira campaña de RAEEs

A Facultade de Ciencias Sociais e da Comunicación liderou a recollida, con 50 dispositivos, seguida da Casa das Campás


ImageDende aparellos propios de oficina como ratos, impresoras ou teclados ata electrodomésticos como microondas. O campus de Pontevedra envorcouse coa terceira campaña de recollida de aparellos eléctricos e electrónicos (RAEEs), unha iniciativa impulsada pola Vicerreitoría e enmarcada no proxecto Green Campus que buscaba concienciar da importancia do correcto tratamento dos residuos electrónicos e que nesta edición conseguiu recoller un total de 136 aparellos de todo tipo: dende 32 cargadores, 15 auriculares, 13 cables, sete ratos e sete teléfonos móbiles, seis altofalantes, cinco impresoras ou catro radios ata CPUs, monitores, teclados, calculadoras, portátiles, mandos a distancia ou mesmo microondas, aspiradores, un espertador, un tocadiscos, unha prancha, unha depiladora ou un espremedor.
Mércores, 25 de xaneiro do 2017

Representantes de Universidade, Concello e Deputación asistiron á posta en marcha do composteiro

O campus comeza o seu camiño cara os residuos cero

Con 10 módulos, acollerá os restos dos preto de 250 servizos diarios dos dous comedores universitarios


ImageRestos de entre 200 e 250 comidas diarias dos comedores da Facultade de Ciencias Sociais e da Comunicación e da Escola de Enxeñaría Forestal que servirán para abonar os xardíns universitarios. O campus de Pontevedra puxo en marcha este mércores o seu propio composteiro, instalado coa colaboración do Concello e da Deputación e co que a comunidade universitaria se suma ao Plan Revitaliza da institución provincial. Este plan de compostaxe intégrase de xeito harmonioso tanto no proxecto Green campus como no de especialización CREA S2i, que ten a innovación sustentable como un dos seus eixos principais.
Luns, 23 de xaneiro do 2017

III Semana de recollida de RAEEs, enmarcada no proxecto Green Campus

Dar unha saída ecolóxica aos vellos aparellos electrónicos

Na última edición desta iniciativa, promovida pola Vicerreitoría, recuperáronse 162 dispositivos


ImageAno novo, aparellos novos. O Nadal é época de renovación de equipos e dispositivos tecnolóxicos e o campus de Pontevedra quere darlle un final ecolóxico a todos aqueles aparellos antigos que quedan abandonados en armarios e caixóns. Por este motivo, dende este luns e ata o vindeiro 27 de xaneiro estará en marcha a III Semana da recollida de residuos de aparellos eléctricos e electrónicos (RAEEs), unha iniciativa impulsada pola Vicerreitoría e enmarcada no proxecto Green Campus que nesta ocasión busca recoller todos aqueles equipos que xa non lle son útiles aos membros da comunidade universitaria ou a usuarios e usuarias particulares.
Venres, 20 de xaneiro do 2017

O campus celebra unha xornada de concienciación co gallo do Día Internacional da Mediación

Unha clara aposta pola resolución de conflitos con menor custe emocional e económico

Arredor do 60% dos casos que acoden ao servizo de mediación familiar da Xunta rematan en acordo


ImageNon só ten un menor custe emocional e económico, senón que contribúe tamén "a pacificar a sociedade". Co gallo do Día Internacional da Mediación, o campus de Pontevedra celebrou este venres unha xornada de concienciación sobre a importancia da resolución pacífica dos conflitos cunha pegada de carteis na Casa das Campás e en distintas institucións e cunha mesa informativa na praza da Peregrina. A iniciativa foi organizada polo grupo de Psicoloxía Xurídica xunto coa dirección e alumnado do curso de Especialista de Mediación e o grupo de innovación docente 'Educación transformadora: ciencia, comunicación e sociedade'.
Resultados 31 - 36 de 416

Duvi. Diario da Universidade de Vigo. | Contacta con nós