DUVI. Diario da Universidade de Vigo
Inicio arrow Institucional arrow Campus Pontevedra

Campus Pontevedra

Xoves, 31 de marzo do 2016

A SECF entregou os seus premios nacionais universitarios no campus pontevedrés

De volta á orixe, 25 anos despois, para pór en valor a investigación no eido forestal

Nesta edición, foron recoñecidos investigadores das universidades de Valladolid, León e Politécnica de Madrid


ImageNo ano 1991, constituíase en Pontevedra a Sociedad Española de Ciencias Forestales (SECF), organismo que reúne a investigadores, empresas e profesionais deste eido co propósito de fomentar o estudo e o progreso das ciencias e técnicas forestais en España. 25 anos despois, a SECF retornou a Pontevedra para facer entrega, nun centro que tamén alcanza este ano o cuarto de século, a EE Forestal, dos premios cos que cada ano recoñece ás investigacións realizadas por alumnado de toda España nun sector no que “faise moito traballo de I+D, moitas veces non o suficientemente recoñecido”, como lembrou o seu presidente, Felipe Bravo.
Xoves, 17 de marzo do 2016

A escola reuniu na Peregrina aos diferentes centros de formación e investigación neste eido do municipio

A EE Forestal toma a rúa para reivindicar que sen bosques non hai vida

A súas achegas á economía e ao medio ambiente foron o eixo deste acto con motivo do día mundial na súa defensa


ImagePola súa contribución á loita contra o cambio climático, por ser fonte dunha longa serie de recursos renovables, como a madeira, pola súa importancia na preservación da biodiversidade ou polos seus efectos na regulación das concas hídricas e no control da erosión. Por estes e outros motivos os bosques son “unha máquina perfecta, que case non precisa mantemento e que nos dá moitos servizos e bens”, como lembrou nesta xornada o director da Escola de Enxeñaría Forestal, Enrique Valero, no acto que, con motivo da conmemoración do Día Mundial dos Bosques o vindeiro luns 21, o centro promoveu esta tarde na Praza da Ferrería.
Venres, 11 de marzo do 2016

Apostan por consolidar a cooperación en proxectos conxuntos que beneficien á cidadanía

Concello de Pontevedra e Universidade acordan unha bonificación do 95% no pago do IBI polos edificios do campus

O reitor cualificou o convenio de “histórico”, xa que afianza o compromiso de colaboración entre ambas institucións


ImageDe “histórico” cualificou o reitor da Universidade de Vigo, Salustiano Mato, o acordo acadado co Concello de Pontevedra, que suporá unha bonificación do 95% no pago do Imposto sobre Bens Inmobles polos edificios do campus de Pontevedra. Este venres en rolda de prensa o reitor e o alcalde da cidade, Miguel Anxo Fernández Lores, explicaron os detalles dun convenio que suporá, en palabras do rexedor pontevedrés, unha “redución drástica do pago que tiña que facer a Universidade polos inmobles”, de preto de 100.000 euros anuais. Mato remarcou que se trata “dun antes e un despois”, unha decisión que agradeceu á corporación municipal e que considera “xenerosa pero tamén intelixente”, xa que suporá “un marco inmellorable para fortalecer aínda máis a colaboración que xa temos entre ambas entidades”.
Martes, 08 de marzo do 2016

CCSS e da Comunicación e Ciencias da Educación e do Deporte comezan a operar con este combustible

A chegada do gas natural ao campus permitirá reducir a factura enerxética e as emisións de CO2

Esta actuación forma parte dos compromisos adquiridos no proxecto Green Campus


ImageUnha importante redución das emisións de dióxido de carbono á atmosfera, sumadas a un aforro de entre o 10% e o 15% na factura enerxética anual son os dous principais motivos que levaron a Vicerreitoría, no marco do proxecto Green Campus, a apostar polo gas natural como combustible para as calefaccións dos centros. Tralas obras realizadas a finais do pasado ano pola empresa subministradora para achegar o gas á Xunqueira e a posterior adaptación das caldeiras, Ciencias da Educación e do Deporte e CCSS e da Comunicación convertéronse nesta xornada nos primeiros centros do campus en comezar a operar con este combustible.
Venres, 04 de marzo do 2016

Coa constitución da comisión mixta de traballo entre a institución académica e o ente provincial

Universidade e Deputación avanzan na senda da “suma de capacidades”

O apoio a congresos ou a colaboración nun futuro observatorio de turismo, entre os temas abordados


ImageEn decembro, a Universidade de Vigo e a Deputación de Pontevedra asinaban un protocolo de colaboración co que se sistematizaba o marco de colaboración entre ambos organismos. Un acordo “histórico”, como lembrou o reitor, Salustiano Mato, que este venres deu un paso adiante coa primeira reunión da comisión mixta de traballo, encargada de concretar os diferentes ámbitos nos que se verá plasmada esta “suma de capacidades”. Nesta primeira xuntanza, os representantes de Universidade e Deputación traballaron na definición da metodoloxía coa que se canalizará esta cooperación, así como na definición dun programa anual de actuación.
Xoves, 03 de marzo do 2016

O Departamento de Filoloxía Galega e Latina editou un libro en recoñecemento a este docente xubilado

Letras que recoñecen o maxisterio, dentro e fóra das aulas, de Xosé Luís Sánchez Ferraces

A publicación, que reúne once artigos sobre lingua e literatura, foi presentada en Ciencias da Educación e do Deporte


Image“Din que cando a gratitude é absoluta, as verbas sobran, e estou de acordo”, salientou o docente, xubilado no 2010, Xosé Luis Sánchez Ferraces, antes de incumprir o previamente afirmado para agradecer o recoñecemento que nesta xornada lle brindaron os que foron os seus compañeiros e compañeiras tanto no Departamento de Filoloxía Galega e Latina da Universidade, como na Facultade de Ciencias da Educación e do Deporte. Fixérono nun acto neste centro do campus pontevedrés, onde exerceu durante 35 anos como docente, que serviu tamén para presentar o libro elaborado polo departamento na súa honra.
Resultados 43 - 48 de 388

Duvi. Diario da Universidade de Vigo. | Contacta con nós